Oktyabrın 22-də İstanbulda Türkdilli Dövlətlərin Əməkdaşlıq Şurasının (Türk Şurası) mediaforumu öz işinə başlayıb.
KİV-in yaydığı məlumata görə, Türkiyə Prezidenti Administrasiyasının Kommunikasiya İdarəsi tərəfindən “Köklü keçmiş, güclü gələcək" şüarı ilə keçirilən tədbirdə türk dünyasında media, serial və film sektorlarında əməkdaşlıqların inkişafı, sosial media və dezinformasiyaya qarşı birgə mübarizə yolları müzakirə ediləcək.
Foruma Türk Şurasına üzv ölkələr - Türkiyə, Azərbaycan, Qazaxıstan, Qırğızıstan və Özbəkistandan, habelə müşahidəçi ölkələr Macarıstan, Türkmənistan və Şimali Kipr Türk Cümhuriyyətindən olan media nümayəndələri, akademiklər, dövlət qurumlarının və özəl təşkilatların yüksək vəzifəli şəxsləri, sosial media təmsilçiləri, universitet tələbələri olmaqla 500-dən çox iştirakçı qatılıb.
Ölkəmiz mediaforumda Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyevin rəhbərlik etdiyi geniş nümayəndə heyəti ilə təmsil olunur. Nümayəndə heyətinin tərkibinə bir sıra dövlət rəsmiləri, elm ocaqlarının və media qurumlarının təmsilçiləri daxildir.
Forumda "Birlikdən doğan Zəfər: Qarabağ" mövzusunda keçiriləcək paneldə Qarabağ Zəfəri ilə nəticələnmiş 44 günlük Vətən müharibəsi zamanı Azərbaycanla Türkiyə arasındakı güclü həmrəyliyin bütün türk dünyası ölkələri arasında da nümayiş olunmasının vacibliyi vurğulanacaq, bütün sahələr üzrə əlaqələrin daha da inkişaf etdirilməsi istiqamətində atılacaq birgə addımlar müzakirə olunacaq.
Bundan əlavə, tədbirdə "Ortaq mədəni gələcək: Türk dünyasında serial və film sektoru", "Keçmişdən gələcəyə türk dünyası birliyi", "Türk dünyası olaraq gələcəyin qurulması" və bu kimi digər mövzularda panellərin keçirilməsi nəzərdə tutulur.
Forum oktyabrın 24-dək davam edəcək.
Jurnalistlərin Həmkarlar İttifaqının sədri,
“...Ciddi mesajlardır və işin perspektivi baxımından nikbinlik yaradır”
Media eksperti Müşfiq Ələsgərli “Bakı-Xəbər”ə şərhində bildirdi ki, türkdilli xalqların sivil toplum quruluşlarının, xüsusilə media təşkilatlarının əməkdaşlıq modellərinin qurulması yönündə ideyalar yeni deyil: “Hələ yüz il öncə fərqli variantda ortaya çıxan bu ideya son 30 ildə, yəni Azərbaycan da daxil olmaqla bir sıra türkdilli dövlətlərin müstəqillik qazanmalarından sonra daha da aktuallaşıb, ideyanın gerçəkləşdirilməsi üçün mexanizmlər axtarılıb. Amma ideyanın gerçəkləşdirilməsi üçün konkret mexanizmlər tapılmayıb və ya tapılan mexanizmlərin tətbiq edilməsi ilə bağlı problemlər yaşanıb. Son 2 il ərzində görülən işlərin üstünlüyü budur ki, ideyanın gerçəkləşdirilməsi üçün konkret mexanizmlər tapılıb, tətbiq edilir və nəticə verir. Diqqət yetirsək görərik ki, son 2 il ərzində bu yöndə təqribən 6-ya yaxın böyük formatlı tədbir keçirilib, proqramlar hazırlanıb, müzakirə və tətbiq edilib. Hazırda İstanbulda keçirilən Türkdilli Dövlətlərin Əməkdaşlıq Şurasının (Türk Şurası) media forumu konkret proqramları müzakirəyə çıxarır və tətbiqi üçün təkliflər təqdim edilir. İstanbul forumu göstərir ki, indiki prosesin arxasında ciddi siyasi iradə dayanır. Türkiyə Prezidenti Administrasiyasının, Azərbaycan Prezident Administrasiyasının forumda yüksək heyətlə təmsil olunmaları ciddi mesajlardır və işin perspektivi baxımından nikbinlik yaradır. Həmçinin, Qazaxıstan, Qırğızıstan, Özbəkistan, Macarıstan, Türkmənistan kimi dövlətlərdən media təmsilçilərinin foruma qatılması bu konsepsiyanın geniş arealda yayıldığını təsdiqləyir. Əvvəlki forumlarda indiki qədər geniş çevrəni əhatə etmək mümkün olmurdu”.
M.Ələsgərlinin sözlərinə görə, 44 günlük Vətən müharibəsi zamanı Azərbaycanla Türkiyə mediasının müştərək hərəkət etmələri güclü həmrəyliyin nümayişi idi və yüksək nəticələr verdi. İndi bu əməkdaşlıq digər türkdilli dövlətlərə nümunə kimi göstəriləcək və daha da inkişaf etdirilməsi üçün müzakirələr aparılacaq. “Təsadüfi deyil ki, forumun panellərindən biri "Birlikdən doğan Zəfər: Qarabağ" mövzusuna həsr edilib. II Qarabağ savaşında da Türkiyə-Azərbaycan mediasının müştərək hərəkəti və əldə etdiyi nəticələr gələcəkdə digər türkdilli dövlətlərin media qurumlarının əməkdaşlığı üçün yaxşı nümunə olacaq”-deyə M.Ələsgərli vurğuladı.
İradə SARIYEVA
