Bu gün müvəqqəti olaraq Rusiya sülhməramlılarının nəzarətində olan ərazilərimizdə yaşayan ermənilərin dinc dayanmadığı və separatçılıq fəaliyyətlərini davam etdirdiyi, hətta qanunsuz silahlı birləşmə saxladıqları da məlumdur. Biz bu qanunsuz dəstələrin tezliklə zərərsizləşdirilməsini dəfələrlə gündəmə gətirmişik.
Uzun müddətdir Azərbaycan ən müxtəlif səviyyələrdə separatçıların tərksilah edilməsinin vacibliyi barədə tələblər səsləndirir, amma Rusiya sülhməramlıları buna da əhəmiyyət vermək istəmirdi. Amma deyəsən, buna da az qalıb və tezliklə qanunsuz silahlı birləşmələr ləğv ediləcək.
Erməni QHT sədri Aşot Arutunyan öz çıxışında Qarabağda - rusiyalı sülhməramlı qüvvələrin müvəqqəti nəzarəti altında olan Azərbaycan ərazisində yerləşmiş erməni hərbi birləşmələrinin tərksilah ediləcəyini deyib. O, məlumatın Qarabağdakı terrorçu-separatçıların rəhbəri Arayik Arutunyan tərəfindən ona şəxsən deyildiyini vurğulayıb: “Arayik Arutunyan Qarabağdakı silahlı birləşmələrin buraxılacağını dedi. Soruşdum ki, “sənə bu haqqı kim verib?” O isə “azərbaycanlılar bunu tələb edir”, - deyə cavab verdi”.
Erməni QHT sədri terrorçu-separatçıların başçısı A.Arutunyana istinadən qanunsuz erməni silahlı dəstələrinin ləğv ediləcəyini açıqlayıb.
“Biz bu yaxınlarda rus sülhməramlılarının nəzarətində olan ərazilərimizdə qanunsuz erməni silahlı birləşmələrini görməyəcəyik”
Hərbi ekspert Tərlan Eyvazov “Bakı-Xəbər”ə bildirdi ki, separatçıların silahlı dəstələri çoxdan ləğv edilib tarixin zibilliyinə gömülməli idi. “Erməni silahlı birləşmələri çoxdan ləğv edilməli idi. Hesab edirəm ki, bu qanunsuz dəstənin tərkisilah olunaraq ləğv edilməsi, bütövlükdə bu addımlar hətta gecikib. Çünki 9-10 noyabrda imzalanan üçtərəfli bəyanatda bunlar açıq-aydın yazılıb. Azərbaycan ermənilərə vaxt verdi, səbrlə gözlədi ki, müəyyən texniki məsələlər həllini tapsın. Bu keçən müddət ərzində Azərbaycan bütün o maddələrə çox böyük dəqiqliklə əməl etdi. Sərbəst şəkildə Ermənistanda yaşayan ermənilər Qarabağa, Qarabağdan isə Ermənistana gedib-gəldilər, Azərbaycan bu şəraiti də yaratdı, eyni zamanda sülhməramlıların onları qoruması və sair məsələlər də öz həllini tapdı. Təbii ki, onlar az-çox cızığından çıxanda da Azərbaycan cəzalarını verdi. Amma biz ötən müddət ərzində qanunsuz erməni silahlı dəstələrinin ləğv edilməsini və onların tam olaraq oradan çıxarıldığını görmədik. Düzdü, müəyyən addımlar atıldı, ağır texnika çıxarıldı, lakin silahlı yaraqlıların bu gün orada qalması göz önündədir. Onlar o mövqelərdə dururlar. Azərbaycan tərəfi də müharibədən sonra ərazilərimizdə olan terrorçuların bir qrupunu buraxdı. Halbuki, onlar müharibə bitdikdən sonra tutulmuşdular və araşdırma zamanı məlum olmuşdu ki, onlar Azərbaycana qarşı hər hansı bir insidentdə iştirak etməyiblər, atəş açıb insan öldürməyiblər, Azərbaycan xoşməramlı davranaraq onların bir qismini buraxdı. Şübhəsiz ki, üçtərəfli çalışmalar davam edir. Ərdoğanla Putinin görüşündə də bu məsələlər müzakirə edilib. Beynəlxalq İnstitutlar da Azərbaycana qarşı qərəzli mövqe tutaraq “hərbi əsir”ləri buraxın deyirlər. Onda Azərbaycan tərəf haqlı bir məsələ qoyur ki, bu silahlılar bizim ərazidən getməyib”.
T.Eyvazov qeyd edir ki, Qarabağdakı qanunsuz silahlı dəstələrin ləğv ediləcəyinə hazırlıq getdiyini həm Arayikin, həm də terrorçu-separatçı dəstəyə rəhbərlik iddiasında olanların davranış və açıqlamalarından da hiss etmək mümkündür: “Arayik də, terrorçu-separatçılara liderlik etmək iddiasında olan digəriləri də öz çıxışlarında, üstüörtülü də olsa, buna eyham vurublar. Bu mənim üşün təəccüblü deyil. Məncə, qanunsuz silahlı dəstənin ləğvi gecikib, bu tez bir zamanda ləğv edilməlidir. Rusiya arbitr rolunu axıra qədər yerinə yetirməlidir və erməni yaraqlıları tamamilə bizim ərazilərdən çıxarılmalıdır. Onların orada qalmasına heç bir zərurət yoxdur. Azərbaycan ora hücum edib orada hər hansı bir əməliyyat aparmır. Tamamilə onların təhlükəsizliyi rus sülhməramlıların üzərindədir. Sülhməramlılar da orada yerləşiblərsə, orada erməni yaraqlılarına heç bir ehtiyac yoxdur. Onlar sərbəst şəkildə dəhlizdən istifadə edirlərsə, bütün məişət və digər məsələlərini həll edə bilirlərsə, orada erməni yaraqlılarının qalmasına heç bir lüzum olmadığı zaman keçdikcə sübut olundu. Təxmin edirəm ki, biz bu yaxınlarda rus sülhməramlılarının nəzarətində olan ərazilərimizdə qanunsuz erməni silahlı birləşmələrini görməyəcəyik. Ermənilər o qanunsuz silahlı birləşmələri saxlamaqlarını onunla əsaslandırıb vay-şivən qoparırdılar “türklər bizi qıracaq, bizi öldürəcək”. Amma gördüyünüz kimi, bu baş vermədi. Əlbəttə, Qarabağdakı ermənilər də Azərbaycan vətəndaşlarıdır, bunu onlar özləri də yaxşı dərk edirlər. Şübhəsiz, separatçılar tərəfindən Azərbaycanın tələbinə əməl ediləcək və o dəstələr ləğv ediləcək. Qarabağdakı terrorçu-separatçılara rəhbərlik edənlər dərk etməyə başlayıblar ki, bu qanunsuz silahlı dəstələrin ləğv edilməsi çıxış yoludur”- deyə T.Eyvazov qeyd etdi.
İradə SARIYEVA
