Zəngəzur bölgəsində, Zəngilan rayonu ilə Ermənistanın Qafan rayonu arasında yerləşən Ağdağ yüksəkliyində Azərbaycan sərhədçilərinin yerləşməsi barədə erməni tərəfində müzakirələr davam edir. Ermənistan parlamentində hakimiyyəti yenə də satqınlıqda günahlandıran çıxışlar edilir.
Bir müddət əvvəl parlamentdəki “Ermənistan” fraksiyasının üzvü Anna Qriqoryan bildirmişdi ki, hakimiyyət Qafanda yeni güzəştlərə getməyə hazırlaşır. Bunu sülh tərəfdarlarının qorxaqlığı kimi xarakterizə edən deputat qeyd etmişdi ki, yerli özünüidarəetmə qurumlarına keçiriləcək seçkilər ərəfəsində hakimiyyət özünün konstruktiv dostları ilə əməkdaşlığa gedərək, Qafandakı Pela dağını tam olaraq Azərbaycana güzəştə gedir: “Strateji əhəmiyyət daşıyan həmin dağın Azərbaycanın əlində olması ətrafdakı erməni kəndlərinin təhlükısizliyi üçün ciddi problemlər yaradır”.
Qeyd edək ki, Ermənistanda real vəziyyətlə barışmayanların sayı günü-gündən artır. Erməni politoloq Ara Vardanyan özünün “Facebook” səhifəsində yazıb ki, artıq Qarabağ məsələsi yoxdur: “Zəngəzur məsələsi, Basarkeçər məsələsi var, Qarabağ məsələsi isə yoxdur...”.
Ermənistan silahlı qüvvələrinin Baş qərargahı bundan əvvəl yüksəkliyin Azərbaycanın nəzarətinə keçdiyi haqda xəbərləri təkzib etsə də, Qafan şəhərinin meri Gevork Parsyan yeni təfərrüatlar açıqlayıb. Bildirib ki, əslində yüksəklik ötən ilin dekabrında Azərbaycanın nəzarətinə keçmişdi.
Gevork Parsyan oktyabrın 19-da Zəngəzur TV kanalına müsahibəsində bildirib ki, o vaxt yüksəkliyin bir hissəsinə Rusiya sərhədçiləri nəzarət edirdi. Amma bu günlərdə Parsyana məlum olmayan səbəblərə görə ruslar yüksəklikdən eniblər və ora tamamən Azərbaycanın nəzarətinə keçib: “Bu ərazi bizim üçün çox mühüm yüksəklikdir. İndi rusların olmamasına görə ərazi azərbaycanlıların nəzarətinə keçib”.
Parsyan deyir ki, ötənilki müharibədən əvvəl Ağdağ yüksəkliyində Ermənistanın Hava Hücumundan Müdafiə sistemi yerləşdirilmişdi. İndi isə həmin yüksəklikdən Azərbaycan Qafan şəhərini və Aqarak kəndini nəzarət altında saxlaya biləcək, 90-cı illərdə olduğu kimi.
Deyilən dağla bağlı vəziyyət necədir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, söhbət Qafanla Azərbaycan sərhədində yerləşən Ağdağ yüksəkliyindən gedir:“Qeyd edim ki, Ağdağ yüksəkliyi Zəngilan rayonu ərazisinə daxildir və sovet dövrü xəritələrinə əsasən iki ölkə arasındakı dövlət sərhədi bu yüksəklikdən keçir. Ötən ilin dekabrında Azərbaycan Zəngilan və Qubadlı istiqamətlərində öz dövlət sərhədlərini bərpa edib, nəticədə Gorus-Qafan yolunun 22 kilometrlik hissəsi Azərbaycanın nəzarətinə keçib.
Ermənilər həmin dağa Pela deyir. Ermənistandakı narahatlıq əbəs yerə deyil. Hazırda həmin dağ ordumuzun nəzarətinə keçib. Bu, sərhədlərin delimitasiyası və demarkasiyası sayəsində mümkün olub.
Qeyd edək ki, Ermənistan mətbuatında da bu yüksəkliyin Azərbaycana təhvil veriləcəyi ilə bağlı məlumatlar yayımlanırdı. Ancaq vəziyyət heç də ermənilərin ifadə etdiyi kimi deyil. Biz oranı ermənilərin əlindən alıb, yeni ərazi kimi zəbt etməmişik. Sərhədlərdə aparılan dəqiqləşdirmə nəticəsində bu baş verib. Biz hazırda öz sərhədlərimizin hər qarışına sahib çıxırıq. SSRİ dağılandan sonra həmin ərazilərdə dəqiqləşmə aparılmayıb. Hazırda bu baş verir və biz erməniləri geri çəkilməyə məcbur edirik. Ancaq təəssüf ki, ermənilər bu addımları bizim güya onların ərazisinə keçib yeni ərazilər zəbt etdiyimiz kimi qələmə verirlər. Ermənistan Azərbaycanla sərhəddə demarkasiya və delimitasiya prosesinə başlamağa hazır olduğunu ən ali səviyyədə bəyan edib.
Onun sözlərinə görə, Ermənistan Rusiyanın və digər beynəlxalq tərəfdaşlarının dəstəyi ilə Azərbaycanla sərhəddə demarkasiya və delimitasiya prosesinə başlamağa hazırdır. Görünür, revanşist qüvvələrə bu proses sərf etmədiyi üçün vəziyyəti Ermənistan cəmiyyətinə yanlış təqdimatla çatdırırlar”.
Ekspertin sözlərinə görə, həmin dağ çox böyük strteji əhəmiyyətə malikdir:
“Onların Aqaraka (Əkərək), Yeqvarda və Ujanisə getmək üçün istifadə etdiyi əsas yol indi tamamən bizim nəzarətimiz altındadır”.
Məhəmmədəli QƏRİBLİ
