Məhv olmuş “Arsax”ın sözdə “elm, təhsil və mədəniyyət naziri” Lusine Karaxanyan öz separatçılığından əl çəkmək bilmir, Azərbaycana qarşı əsassız iddialar irəli sürməkdə davam edir.
Həddini aşaraq Azərbaycanın öz tarixi irsinə, mədəni dəyərlərinə “qiymət vermədiyini” iddia edən Karaxanyan deyib ki, Azərbaycan nə “onların mədəni irsini” qaytarır, nə də hazırda ermənilərin əlində olan Azərbaycan rəssamlarının əsərlərini geri qaytarmaq istəyir. Qondarma “nazir” deyib ki, Azərbaycana mədəni dəyərlərin mübadiləsi təklif edilib, amma Azərbaycan razılaşmayıb. Karaxanyan deyib ki, Birinci Qarabağ müharibəsindən sonra erməni tərəfində azərbaycanlı rəssamların çoxlu rəsm əsərləri qalıb və onlar o əsərləri saxlayırlar. Karaxanyan deyir ki, erməni tərəfində qalan azərbaycanlı rəssamların rəsmlərinin “işğal olunmuş ərazilərdə qalan erməni mədəni dəyərləri“ ilə mübadiləsinə Azərbaycan razılıq verməyib.
Həyasızlığın dərəcəsinə baxın ki, separatçılar belə iddialar irəli sürür, bizim Qarabağdakı rəsm qalereyalarımızdakı əsərləri öz sərvətimizlə mübadilə etmək istəyirlər. “Arsax” adlı separatçı qurumun artıq çoxdan tarixin zibilliyində canı çıxıb. Karaxanyan kimdir ki, durub ərazisində yaşadıqları Azərbaycan dövlətinə belə təklif etsin? Qarabağda olan bütün irs Azərbaycan dövlətinindir, Azərbaycan xalqınındır. Məsələ burasındadır ki, qondarma “nazir” Azərbaycanın böyük maddi-mədəni irsinin ermənilərin əlində, Ermənistanda olduğunu açıqlayıb, bununla da Ermənistanın cinayətlərini ifşa edib.
“Erməni “nazir” öz cəfəngiyyatları ilə əslində Ermənistanın və ermənilərin oğurluğunu ifşa və bizim maddi irs nümunələrimizi mənimsədiklərini etiraf edib”
Azərbaycan Milli Elmlər Akademiyası (AMEA) A.Bakıxanov adına Tarix İnstitutunun əməkdaşı Faiq İsmayılov “Bakı-Xəbər”ə bildirdi ki, vaxtaşırı olaraq özünü məhv olmuş separatçı tör-töküntülərinin “elm, təhsil və mədəniyyət naziri” adlandıran bu şəxsin cəfəng bəyanatlarını erməni KİV-indən oxuyur. “Özünü qanunsuz olaraq “nazir” adlandıran bu şəxs anlamır ki, beynəlxalq səviyyədə tanınan Azərbaycan ərazilərinə təcavüz edən Ermənistan onun 20 faiz ərazisini 28 il işğal altında saxlayıb. “Arsax” adlı qurum yoxdur, burada Azərbaycanın “Dağlıq Qarabağ” və ətraf ərazilərindən söhbət gedir. Ümumiyyətlə, separatçıların dediyi rəsm əsərləri, şəkillər məsələsinə gəlincə, Birinci Qarabağ müharibəsi dövründə bizim dörd şəkil qalereyamız, 23 tarix-diyarşünaslıq muzeyimiz ermənilər tərəfindən qəsb olunaraq talan edilmişdi. Bizim o dörd qalereyada saxladığımız 376 ədəd rəsm əsəri ermənilər tərəfindən mənimsənilmişdi. Eyni zamanda daşınan tarix-mədəniyyət abidələri, muzey eksponatları hardasa yüz min, yüz yeddi min civarında idi. Hardasa 50 min sayda da vətəndaşların mülküyyətində olan, evlərində saxladıqları ata-baba yadigarı olan xalçalar, fərməşlər, ov əşyaları və sairlər ermənilər tərəfindən mənimsənilib, qarət edilib”.
Ermənilərin bizimlə nəyi, hansı haqla, hansı əsasla mübadilə etmək istəyinə gəlincə, F.İsmayılov bildirdi ki, uzun illər Azərbaycan əraziləri Ermənistan tərəfindən işğal altında saxlanılıb və bizim bu ərazilərdəki mədəni irsimiz ermənilər tərəfindən vandalizmə, mənimsəməyə məruz qalıb: “Ermənilər saxladıqları, mənimsədikləri həm muzey eksponatlarını, həm rəsm əsərlərini, həm də digər irs nümunələrimizi qeyd-şərtsiz olaraq bizə qaytarmalıdırlar. Onlar qaytarmalıdırlar, özümüzə təhvil verməlidirlər, burada heç bir mübadilədən söhbət gedə bilməz. Əlimizdə təkzibolunmaz faktlar var ki, işğal dövründə ərazilərimizdən aparılan muzey eksponatları Ermənistanda saxlanılmaqla yanaşı, həm də bir çox dövlətlərdə satılıb. Konkret olaraq İngiltərədə gümüş işləmələrlə hazırlanan bir qadın əl çantası satışa çıxarılıb. Laçın rayon tarix-diyarşünaslıq muzeyindən aparılan bu eksponat 16 min avroya satılıb. Erməni “nazir” öz cəfəngiyyatları ilə əslində Ermənistanın və ermənilərin oğurluğunu ifşa və bizim maddi irs nümunələrimizi mənimsədiklərini etiraf edib.
Yəni ermənilərin bizə təklif etdiyi “mübadilə mexanizmi”ni qətiyyən anlamıram. Ermənilərin bizdə nəyi var ki? Onların nə Qarabağda, nə də ətraf ərazilərdə bir dənə də olsun daşınmaz maddi-mədəniyyət abidələri, hətta kilsələri belə yoxdur. İkincisi də, orada onlara aid heç bir mədəni irs qalıqları yoxdur. Biz ərazilərimizi İkinci Qarabağ müharibəsində işğaldan azad etdikdə həmin ərazilər artıq boşalmışdı, ermənilər onları söküb aparmışdı. Ermənilərin özlərinin çəkdikləri videolarda da görünürdü ki, Şahbulaqdakı eksponatları necə qablaşdırıb aparırlar. Dədəvəng-Xudavəng monastrının əşyalarını daşıyıb apardıqları da faktdır. Bütün bunlar hamısı baş verib, gerçəklikdir. Ermənilərin danışdıqları öz etdikləri cinayətlərdən boyun qaçırmağa xidmət edir, onların iddiaları tamamilə yersiz və əsassızdır. Onlar qeyd-şərtsiz, heç bir danışıqsız, tələbsiz qarət etdikləri, oğurladıqları bütün irs nümunələrimizi Azərbaycana qaytarmalıdırlar” - deyə F.İsmayılov qeyd etdi.
İradə SARIYEVA
