“Vejnəli qızıl yatağının qanunsuz istismarında iştirak edən xarici şirkətlərin məhkəməyə verilməsi prosesinə start verilib”. Bu sözləri Prezident İlham Əliyev Zəngilan rayon ictimaiyyətinin nümayəndələri ilə görüşündə bildirib. Prezident onu da əlavə edib ki, bu işdə iştirak edən xarici şirkətlərin məhkəməyə verilməsi prosesinə start verilib.
Qeyd edək ki, ötən il Baş Prokurorluq Laçın, Kəlbəcər və digər işğal olunmuş rayonların ərazilərində erməni əsilli xarici dövlətlərin vətəndaşları olan şəxslərin ekologiya və Yerin təkinin istismarı qaydalarının kobud şəkildə pozulması ilə nəticələnən qanunsuz sahibkarlıq fəaliyyəti ilə məşğul olmaları faktları üzrə Baş Prokurorluğun İstintaq idarəsində 21.10.2015 və 30.03.2018-ci il tarixlərdə Cinayət Məcəlləsinin 192.2.3 (qanunsuz sahibkarlıq) və 318.2-ci maddələri ilə (dövlət sərhədini qanunsuz keçmə) cinayət işlərinin başlanması ilə bağlı məlumat yaymışdı.
Həmin cinayət işlərindən biri işğaldan azad olunmuş Zəngilan rayonunun Vejnəli kəndi ilə bağlı olub. İstintaq zamanı Baş Prokurorluğun İstintaq idarəsinin qərarı əsasında Azərbaycan Respublikasının Vergilər Nazirliyi tərəfindən müəyyən edilib ki, Zəngilan rayonu Vejnəli kəndində əlvan metal yataqlarından qanunsuz sahibkarlıq fəaliyyəti ilə məşğul olaraq gəlir əldə edən İsveçrə Konfederasiyasında rəsmi qeydiyyatdan keçmiş “Vallex Group” şirkətlər qrupunun filialı olan “Base Metals” Qapalı Səhmdar Cəmiyyəti 2009-2017-ci illər ərzində cəmi 301 milyon 918 min manat məbləğində qanunsuz gəlir əldə edib.
“Azərbaycanın sərvətini talayan xarici şirkətlər beynəlxalq tribina qarşısında ölkəmizdən üzr istəməli və təzminat ödəməlidirlər”
Siyasi şərhçi Azər Həsrət məsələ ilə bağlı bildirdi ki, ölkə başçısı İlham Əliyev müharibəyə qədər və müharibədən sonra da dəfələrlə öz çıxışlarında Ermənistana və bu ölkənin arxasında duranlara mesaj göndərmişdi ki, qanunsuz istismarla bağlı məsələ məhkəmədən kənar yolla da həll edilə bilər. Ancaq işğalçı ölkə buna əhəmiyyət vermədi: “Danılmaz faktdır ki, işğal altında olan Azərbaycan torpaqları uzun illər istismar edilib. O cümlədən, Vejnəli qızıl yatağı da talan edilib. Ermənilər Azərbaycanın milyard dollarla vəsaitini oğurlayıblar. Belə olan halda Azərbaycan dövləti Vejnəli qızıl yatağı ilə bağlı məhkəməyə müraciət etməli idi”.
Ekspert onu da əlavə etdi ki, Azərbaycan tərəfi tək Vejnəli yatağı deyil, eyni zamanda, işğal altında olan torpaqların talan edilməsi ilə bağlı sona qədər gedib Ermənistan və onun arxasındakı qüvvələrdən öz haqqını tələb edəcək: “Azərbaycanın sərvətini talayan xarici şirkətlər beynəlxalq tribina qarşısında ölkəmizdən üzr istəməli və təzminat ödəməlidirlər”.
Günel CƏLİLOVA
