Vətən müharibəsindəki Zəfərimizin ilk ildönümünə sayılı günlər qalıb. Bu ərəfədə ən çox müzakirə olunan siyasi mövzulardan biri də Azərbaycanla Ermənistan arasında sülh müqaviləsinin imzalanması yönündə yayılan məlumatlarla bağlıdır. Tez-tez belə fikirlər səslənir ki, sülh sazişi ilə bağlı tərəflər arasında intensiv iş gedir.
Bu günlərdə Fransanın Ermənistana yeni təyin olunmuş səfiri Ann Luyon bəyan edib ki, Fransa Rusiya və ABŞ-la birlikdə Qarabağla bağlı uzunmüddətli sülh müqaviləsinin imzalanması üzərində işləyir. Lakin səfir detalları açıqlamayıb. Ancaq Ermənistanın Armenianreport.com saytında sülh müqaviləsinin məzmunu ilə bağlı bəzi informasiyalar yayılıb. Qeyd edilir ki, mövcud vəziyyətdə problem yalnız erməni tərəfinin fundamental güzəştləri hesabına həllini tapa bilər. Məqalədə həmin bəndlər belə sıralanır: “Birincisi, sənədi imzalayan tərəflər bir-birinin ərazi bütövlüyünü tanımaq, bütün dövlətlərarası kommunikasiyaların açılması və təhlükəsiz işləməsini təmin etmək, habelə SSRİ-nin dağılması zamanına kimi iki respublika arasında mövcud olmuş inzibati sərhədləri əsas götürməklə sərhədlərin delimitasiyası və demarkasiyası prosesinə başlamaq öhdəliyini götürür. Müqavilənin ikinci bəndində onu imzalayacaq tərəflər öhdəlik götürür ki, 44 günlük müharibədən sonra təhlükəsizliyi Rusiya sülhməramlıları tərəfindən təmin edilən ərazidəki insanların hüquqları ilə bağlı məsələlərin həllini Minsk Qrupunun himayəsi altında axtarmağa davam edəcəklər. Və bu problemləri həll etmək üçün yenə Minsk Qrupunun himayəsi altında ikitərəfli komissiya yaradılır. Nəhayət üçüncüsü, Rusiya sülhməramlı kontingenti komissiyanın işi bitənə və bütün məsələlər razılaşdırılana qədər ərazinin təhlükəsizliyini təmin etmək üçün mandat alır”.
Maraqlıdır, deyilənlər nə dərəcədə real ola bilər?
“Çox güman ki, sülh müqaviləsinin məzmunu barədə informasiyaları Fransa tərəfi erməni mətbuatına sızdırıb”
Məsələyə münasibət bildirən Yeni Yol Partiyasının sədri Ramil Hüseynovun fikrincə, imzalanacaq yeni sülh müqaviləsinin məzmunu barədə birmənalı fikir söyləmək çətindir: “Əvvəla, yaxın perspektivdə sülh sazişinin imzalanacağı real görünmür. Çünki tərəflər arasında məsələyə yanaşmalarda kəskin fərqlər var. Azərbaycan tərəfi ərazilər işğaldan azad ediləndən sonra Qarabağ məsələsinin artıq həll olunduğunu bəyan edir. Ancaq Ermənistan yenə də statusdan dəm vurur və problemin həll edilmədiyni iddia edir. Düzdür, son vaxtlar Ermənistan tərəfi kommunikasiyaların açılması ilə bağlı müsbət siqnallar verir, delimitasiya məsələlərindən danışır. Üstəlik, MDB-nin son görüşündə Paşinyan çıxış edərkən statusdan danışmadı. Bütün bunlar müəyyən ümidlər yaradıb. Ancaq erməni tərəfinə etibar etmək olmaz. Ola bilsin ki, onlar bunu sonrakı mərhələyə saxlayıblar. Fransanın Ermənistandakı yeni səfirinin hazırlanan sülh müqaviləsi ilə bağlı ümumi fikirlər səsləndirməsi diqqəti çəkir. Çox güman ki, sülh müqaviləsinin məzmunu barədə informasiyaları Fransa tərəfi erməni mətbuatına sızdırıb. Həmişə olduğu kimi, yenə də Qarabağla bağlı gedən proseslər barədə məlumatları xarici mediadan öyrənirik. Belə bir şey varsa, yaxşı olardı ki, birinci bizim mətbuat xəbər versin”.
Partiya sədri hesab edir ki, sözügedən proses vaxt aparacaq.
Vidadi ORDAHALLI
