Son vaxtlar Ermənistanda orduda koronavirusun yayılması faciəvi hal alıb. Yayılan məlumatlara görə, əsgərlər arasında virusa yoluxanların sayı kütləvi şəkildə artır. Vəziyyət o dərəcədə kritikdir ki, ictimai fəallar, hüquq müdafiəçiləri həyəcan təbili çalır.
Tanınmış ictimai fəal, jurnalist Narine Kirakosyan yerli mediaya açıqlamasında bildirib ki, Ermənistan ordusunda virusa yoluxanların sayı xeyli artıb: “Postlarda dayanan hərbçilər arasında virusa yoluxma halları kəskin şəkildə artıb. Səhiyyə Nazirliyi, Anait Avanesyan, Qayane Saakyan, hərbçilər söyləyirlər ki, xüsusən də postlarda keşik çəkən gənclər arasında virusa yoluxma halları nəzərəçarpacaq dərəcədə artıb. Onlardan bəziləri müraciət etdilər ki, sizdən orduda niyə COVID-19 və mövsümi qrip peyvəndi aparılmadığını soruşum. Müharibə zamanı da eyni vəziyyəti müşahidə etmişdim. Sualımı açıq şəkildə ünvanlayıram ki, jurnalist dostlarım da sizin rəsmi cavabınızı görsün”.
Qeyd edək ki, Ermənistan vaksinasiyanın aşağı səviyyədə olduğu nadir ölkələrdəndir. O cümlədən, digər ölkələrdən fərqli olaraq, Ermənistan o ölkələrdəndir ki, orada orduda da koronavirus geniş yayılıb.
“Bunun bir ucu da gəlib vaksinasiyanın aşağı səviyyədə olmasına çıxır”
Məsələyə münasibət bildirən hərbi ekspert Ramil Məmmədli pandemiyanın Ermənistan ordusunda geniş yayılmasını bir sıra faktorlarla əlaqələndirdi: “Bunun müxtəlif səbəbləri var. Başlıca səbəb onunla əlaqədardır ki, ölkənin iqtisadi durumu bərbad gündə olduğuna görə Ermənistanda ümumən vaksinasiyanın səviyyəsi aşağıdır. Ölkənin özündə cəmiyyət vaksinasiyaya o qədər də ciddi yanaşmır. Dəfələrlə bununla bağlı ölkə mətbuatında məlumatlar yayılıb. Digər tərəfdən, Ermənistanda başıpozuqluğun, dedovşinanın və digər neqativ halların müşahidə olunduğu struktur ordudur. Xüsusən də İkinci Qarabağ müharibəsindən sonra uğradıqları məğlubiyyət səbəbindən orduda xaos müşahidə edilir. Ən başlıcası, məğlubiyyət səbəbindən erməni cəmiyyətində ordu hörmətdən düşüb. Bir çox hallarda məğlubiyyətə görə ordu mənsublarını aşağılayırlar. Başqa bir səbəb ordu sistemində müşahidə edilən korrupsiyadır. Robert Köçəryanın prezidentlik dövründən üzübəri orduda güclü korrupsiyalaşmış sistem var. Bu, Paşinyan hakimiyyətə gələndən sonra da dəyişməyib. Sadəcə, rollar dəyişib. Sabiq müdafiə naziri David Tonayanın həbsi bir daha bunu sübut etdi. Məsələ ondadır ki, əvvəl general Manvel Qriqoryan “tuşonka” oğurlayırdısa, sonra bu oğurluqla Tonayan məşğul olmağa başladı. Belə olan halda, əlbəttə ki, Ermənistan ordusunda hansısa nizam-intizamdan söhbət gedə bilməz. Bu həm də o deməkdir ki, ordunun təchizatı ilə bağlı ayrılan vəsairtlər mənimsənilir. Bunun bir ucu da gəlib vaksinasiyanın aşağı səviyyədə olmasına çıxır”.
Hərbi ekspert onu da qeyd etdi ki, Ermənistan ordusunda problemlərin daha da dərinləşəcəyi güman edilir.
Vidadi ORDAHALLI
