Azərbaycan Beynəlxalq Ədalət Məhkəməsində Ermənistana qarşı tələblərini səsləndirib və Ermənistandan azad edilmiş ərazilərinin minalardan sürətli, təhlükəsiz və effektiv təmizlənməsinə imkan verəcək zəruri tədbirləri görməyi tələb edib.
Bu tələbi BMT-nin Beynəlxalq Ədalət Məhkəməsində Azərbaycan tərəfinin münayəndəsi Elnur Məmmədov səsləndirib.
Onun sözlərinə görə, məhkəmə bununla əlaqədar Ermənistanın üzərinə öhdəlik qoymalıdır.
E.Məmmədov həmçinin əlavə edib ki, məhkəmə Ermənistandan "Azərbaycan ərazilərini minalamaqla və ya minalanmasına kömək etməklə azərbaycanlıların həyatını təhlükəyə atmasını dərhal dayandırmağı" tələb etməlidir.
Eyni zamanda, Ermənistan ərazisində fəaliyyət göstərən, Azərbaycana qarşı nifrət və düşmənçiliyə çağıran təşkilatların fəaliyyətinin qarşısı alınmalıdır: "Ermənistan tərəfi azərbaycanlılara qarşı işlənən etnik zəmində cinayətlərin sübutlarının saxlanması, iki ölkə arasında çəkişməni çətinləşdirəcək addımlardan imtina etməsi üçün tədbirlər görməlidir".
“BMT-nin də, digər beynəlxalq qurumların da Ermənistana təzyiq göstərmək səlahiyyətləri və imkanları böyükdür”
AVCİYA-nın vitse-prezidenti, professor, siyasi şərhçi Məhərrəm Zülfüqarlı “Bakı-Xəbər”ə bildirdi ki, Ədalət Məhkəməsi Ermənistanın Azərbaycanın tələblərini yerinə yetirməsi üçün bütün mümkün təsir mexanizmlərindən istifadə etməlidir. M.Zülfüqarlı qeyd etdi ki, Azərbaycan BMT-nin üzvü kimi onun bütün tələblərinə riayət edib, hətta BMT tərəfindən qəbul edilən, lakin icra edilməyən qətnamələri təkbaşına icra edib, işğal altında olan torpaqlarını azad edib. “Bu olduqca aktual məsələdir. Çünki Azərbaycan cəmiyyətində belə fikirlər var ki, beynəlxalq təşkilatlar, Qərb ölkələrində olan beynəlxalq qurumlar çox zaman ədalətli qərarlar çıxarmır. BMT-nin Qarabağla bağlı qəbul etdiyi 4 qətnamənin icra edilməməsi və buna görə də işğalçı Ermənistan silahlı birləşmələrini dinc yolla torpaqlarımızdan qova bilməməyimiz BMT-yə də ümidlərimizi azalmışdı. Bu anlamda bəzi vətəndaşlarımızda belə fikir yarana bilər ki, biz Ədalət Məhkəməsində tələbimizi irəli sürmüşük, amma bunun icrasına oradakı ermənipərəst qüvvələr imkan verməyəcək. Mənim fikrimcə, bu tamamilə yanlışdır. Bizim bəzi vətəndaşlar beynəlxalq aləmdə gedən prosesləri dərindən izləsələr görərlər ki, beynəlxalq təşkilatlarla işləyəndə, onları fakt qarşısında qoyanda, onlarla əməkdaşlıq edəndə müsbət nəticələr olur. Məsələn, mən özüm AVCİYA-nın nümayəndəsi olaraq bir sıra beynəlxalq qurumların tədbirlərində, Belçikada Qarabağla bağlı dinləmələrdə iştirak etmişəm, ABŞ konqresimenləri ilə Qarabağla əlaqədar görüşlərimiz olub. Orada görmüşəm ki, bəzi beynəlxalq qurumlar məlumatsızdır...
Bu gün Azərbaycanın reytinqi qələbədən sonra dünyada çox yüksəkdir, dövlətimizin haqq işini müdafiə edən, dəstəkləyən beynəlxalq qurumların sayı artır. Artıq sübut olundu ki, hansı dövlətin gücü yoxdursa, haqlı olsa da onu müdafiə edənlərin sayı az olacaq, amma hansı dövlətin gücü varsa onu müdafiə edənlərin sayı çox olur. İndi Azərbaycan artıq güclü tərəf kimi öz iradlarını ortaya qoyur. Mənə elə gəlir ki, beynəlxalq qurumlar, beynəlxalq məhkəmələr Azərbaycanın qoyduğu faktlar qarşısında ədalətli qərar çıxarmağa borcludurlar. BMT-nin Ədalət Məhkəməsi Azərbaycanın Ermənistana qarşı irəli sürdüyü tələbləri yerinə yetirməsi üçün bu ölkəyə təzyiq göstərməlidir. Çünki BMT-nin də, digər beynəlxalq qurumların da Ermənistana təzyiq göstərmək səlahiyyətləri və imkanları böyükdür”.
M.Zülfüqarlının sözlərinə görə, 27-30 il müddətində Qarabağ probleminin həlli istiqamətində beynəlxalq qurumlar onun üçün addım atmırdı ki, bunu istəmirdilər və Azərbaycanı bir güc kimi qəbul etmirdilər, dövlətimizi o problemlə barışdırmağa çalışırdılar. “Azərbaycan öz gücünə ədaləti bərpa etməklə ərazi bütövlüyünü təmin edib. İndi isə Azərbaycan tərəfi haqlı olaraq Ermənistanın cinayətlərini ifşa edən addımlar atır və bunu Ədalət Məhkəməsinə çıxarıb. İnanıram ki, BMT-nin Ədalət Məhkəməsi Ermənistanın Azərbaycanın tələblərini yerinə yetirməsi ilə bağlı qərar çıxaracaq” - deyə M.Zülfüqarlı qeyd etdi.
İradə SARIYEVA
