Şuşanın kəndləri və Laçın şəhəri yaxında Azərbaycana veriləcək - parlamentdə şok iddia…

Yeganə Hacıyeva: “Beynəlxalq hüquqa əsasən, Azərbaycanın bütün suveren ərazilərində bizim yurisdiksiyamız bərqərar olunacaq”

img

Yaxın vaxtlarda Şuşanın ətraf kəndləri və Laçın şəhəri Azərbaycana veriləcək. Bu barədə Ermənistan parlamentinin "Şərəf duyuram” blokundan olan deputatı Tiqran Abramyan bildirib.

O, sərhədlərin delimitasiya və demarkasiya prosesindən danışarkən qeyd edib ki, bu məsələlər toponimlə deyil, xəritələrlə həllini tapır. Deputat əsas problemin Azərbaycan-Ermənistan sərhədi ilə yox, Qarabağla bağlı olduğunu bildirib: "Ermənistan hökuməti yaxın üç ildə aparılacaq danışıqlarda təminat verə bilmir ki, hansı əraziləri güzəştə gedəcək və ya getməyəcək. Bununla bağlı prinsipial mövqeyi də yoxdur. Azərbaycan-Ermənistan sərhədini müəyyən etmək əsas problem deyil. Əsas məsələ Şuşa ətrafı kəndlər və Laçın şəhəridir. Belə davam edərsə, yaxın zamanlarda Şuşanın ətrafındakı kəndlər və Laçın şəhəri Azərbaycana veriləcək”.

Deputat daha sonra əlavə edib ki, Ermənistan hakimiyyəti artıq Qarabağla bağlı heç bir iş görmür: "Ermənistan hökuməti bizə deyir ki, Qarabağla bağlı sualları onlara ünvanlamayaq. Açıq şəkildə deyirlər ki, Qarabağla bağlı məsələləri onlardan soruşmayaq. Onlar artıq bu problemlə bağlı heç bir iş görmək istəmirlər və sakitcə əllərini hər şeydən çəkiblər. Humanitar yardım məsələsindən başqa heç bir mövzuda məsuliyyəti üzərlərinə götürmürlər”.

Ermənistan parlamentində bu cür müzakirələrin yer alması nəyin əlamətidir?  Ermənilərin deyilən istiqamətdəki narahatlıqları nə dərəcədə əsaslıdır?

Politoloq Yeganə Hacıyeva “Bakı-Xəbər”ə açıqlamasında bildirdi ki, 10 noyabr razılaşmasının həyata keçirilməsi üçün bilinən və bilinməyən istiqamətlər mövcuddur: “Elə müddəalar var ki, onlar barədə şifahi razılıq əldə olunub. Məsələ burasındadır ki, işğala yaxın zamanlarda ermənilərin ələ keçirdiyi bütün yaşayış məntəqələri Azərbaycana qaytarılmalıdır. Bəzən bunu səhv olaraq Azərbaycana verilməlidir kimi təqdim edirlər. Əslində, həmin ərazilərin hamısı Azərbaycanındır. Söhbət həmin yerlərdə Azərbaycanın yurisdiksiyasının təmin olunmasından keçir. Ermənilər həmin ərazilərin boşaldılmasını hələ  gecikdiriblər. Əslində, dərhal etməliydilər. Xüsusilə də Laçın rayon mərkəzi dəhliz keçdiyi üçün yubadılır. Onunla bağlı məsələ razılaşdırılıb. Alternativ yol çəkiləndən sonra ermənilər oranı boşaltmalıdır. Xüsusilə də Ermənistan Qazaxın kəndləri və Naxçıvanın Kərki kəndinin təhvil verilməsini yubadır. Beynəlxalq  hüquqa əsasən, Azərbaycanın bütün suveren ərazilərində bizim yurisdiksiyamız bərqərar olunacaq. Bunu ermənilər gözəl bilir. Bu səbəbdən də  prosesi başqa cür təqdim edirlər. Ermənistan cəmiyyətini revanşızmə çağırmaq niyyəti güdürlər. Şuşanın 36 kəndi var. Onlardan bizim nəzarətimizdə olmayanları var. Qısa müddətdə bizim nəzarətimizə keçməlidir. Laçın rayon mərkəzi ilə bağlı məsələni Prezidentin özü ətraflı izah edib. Yol oradan keçdiyi üçün Laçın şəhəri müvvəqəqti olaraq Rusiya sülhməramlılarının nəzarətinə verilib. İkinci yolun çəkilməsi ümumi Zəngəzur layihəsinə daxildir. Ermənistan son zamanlar göstərməyə çalışır ki, güya daxildə bu addımlara ciddi etirazlar var. Əslində isə o, bu süni gərginliyi yaratmaqla öhdəliklərə əməl etməkdən yayınmaq istəyir. Azərbaycan Gorusdakı 21 kilometlik yolun təcrübəsini Laçın dəhlizinə də tətbiq edə biləcək. Ermənistan öhdəliklərə əməl etməsə, biz çox rahat şəkildə koridora nəzarəti də öz üzərimizə götürəcəyik. Ermənistan koridor məsələsində çığallığı davam etdirəcəksə, biz bu addımı ata bilərik. Başqa tərəfdən Zəngəzur dəhlizinin açılmasının vacibliyini əsaslandırmağa çalışırlar. Bunu edənlər isə Paşinyanın tərəfdarlarıdı”.

Məhəmmədəli QƏRİBLİ

Son xəbərlər