Erməni vitse-premyerin ikibaşlı Zəngəzur bəyanatı - dəhlizdə avtoban da olacaq...

Bəhruz Quliyev: “Ermənistan tərəfinin avtomobil yolu ilə bağlı müsbət siqnal verməsi təsadüfi deyil”

img

Məlum olduğu kimi, Moskvada Azərbaycan, Rusiya və Ermənistan üçtərəfli İşçi Qrupunun növbəti iclası keçirilir. Görüşdə üç ölkənin baş nazirlərinin müavinləri Şahin Mustafayev, Aleksey Overçuk və Mqer Qriqoryan iştirak edir. Azərbaycan-Ermənistan dövlət sərhədində vəziyyətin gərginləşməsi səbəbindən İşçi Qrupun işində müvəqqəti fasilə yaranmışdı, lakin son vaxtlar üçtərəfli formatda görüşlər yenidən başlayıb.

Məlumat üçün qeyd edək ki, Azərbaycan Prezidenti İlham Əliyev, Rusiyanın dövlət başçısı Vladimir Putin və Ermənistanın baş naziri Nikol Paşinyan arasında 2021-ci il yanvarın 11-də Moskvada keçirilən danışıqlardan sonra üç ölkənin baş nazir müavinlərinin rəhbərliyi altında İşçi Qrupun yaradılması barədə qərar qəbul edilib. Ondan sonra tərəflər arasında bir sıra görüşlər keçirib.

Bu arada Ermənistan baş nazirinin müavini Mher Qriqoryan üçtərəfli müzakirələrlə bağlı deyib ki, mümkün dərəcədə bölgədəki bütün kommunikasiyaların açılması İrəvan üçün prioritetdir: “Prosesin MDB-nin hüquqi tənzimləmələri çərçivəsində həyata keçiriləcəyi ilə bağlı müəyyən fikirlərimiz və anlayışlarımız var. Avtomobil yollarının açılması məsələlərini də müzakirə etməliyik”.

Burada diqqəti çəkən məqam Ermənistanın avtomobul yolları ilə bağlı verdiyi müsbət siqnaldır. Halbuki, indiyə qədər onlar bunu inkar edirdilər, yalnız dəmir yolundan söhbət getdiyini deyirdilər. Ancaq bizim üçün ən əsası Zəngəzur dəhlizində dəmir yolu ilə paralel avtomobil yolunun da çəkilməsidir. Prezident İlham Əliyevin qətiyyətli tələbi ilə bu məqam 10 noyabr razılaşmasında öz əksini tapıb. Azərbaycan tərəfi dəfələrlə bəyan edib ki, dəmir yolu ilə paralel, avtomobil yolu da açılmalıdır. O baxımdan bütün bunları ekspertlər necə şərh edir?

  • “Prezidentimizin qətiyyətli mövqe sərgiləməsi qarşı tərəfi avtomobil yolu ilə bağlı razılığa gəlməyə məcbur etdi”

Məsələyə münasibət bildirən “Səs” Media Qrupunun rəhbəri, politoloq Bəhruz Quliyevin fikrincə, bütün bunlar onu göstərir ki, artıq Ermənistan kommunikasiyaların açılması istiqamətində real addımlar atmaq istəyir: “Məsələ ondadır ki, Nikol Paşinyan son açıqlamasında 10 noyabr razılaşmasının bütün bəndlərinin yerinə yetirilməsi ilə bağlı, dolayı da olsa, fikir səsləndirdi. Yəni Paşinyan Zəngəzur dəhlizinin dəmir yolu və avtomobil əlaqəsi üçün açıq olacağını elan etdi. Bununla da Azərbaycanın qətiyyətli mövqeyi qarşısında geri çəkildi. Məhz Prezident İlham Əliyevin Zəngəzur dəhlizi ilə bağlı qətiyyətli mövqe sərgiləməsi Ermənistanı avtomobil yolu ilə bağlı razılığa gəlməyə məcbur etdi. O baxımdan Ermənistan tərəfinin avtomobil yolu ilə bağlı müsbət siqnal verməsi təsadüfü deyil. Belə görünür ki, Ermənistan artıq 10 noyabr razılaşmasında nəzərdə tutulan bəndlərin həyata keçirilməsinə razılıq verib. Bütün bunlar da təsadüfi deyil. Burada məsələnin görünən və görünməyən tərəfləri var. Məsələ ondadır ki, Ermənistan buna məhkumdur. Onlar sözügedən məsələdə barışmaz mövqe sərgiləyəcəklərsə, o zaman bundan itirəcəklər. Çünki Ermənistan iqtisadi təcrid vəziyyətindən çıxmaq istəyirsə, o zaman mütləq konstruktiv mövqe sərgiləməlidir. İş ondadır ki, İkinci Qarabağ müharibəsindən sonra tamamilə yeni reallıqlar yaranıb. Artıq bu reallıqları qəbul etdiklərindən, baş nazirin müavini Mher Qriqoryan avtomobil yolları ilə bağlı o cür pozitiv məzmunlu açıqlama verir. Artıq anlayırlar ki, ağır iqtisadi vəziyyətdən çıxmağın yolu loyal qonşuluq siyasəti aparmaqdan keçir”.

Politoloq onu da qeyd etdi ki, artıq bu yöndə gedən proseslər geridönməz hal alıb.

Vidadi ORDAHALLI

Son xəbərlər