Müdafiə naziri, general-polkovnik Zakir Həsənov oktyabrın 18-də Azərbaycanda səfərdə olan NATO baş katibinin Xarici İşlər və Təhlükəsizlik Siyasəti üzrə köməkçisinin müavini, Qafqaz və Mərkəzi Asiya üzrə nümayəndəsi havyer Kolominanın başçılıq etdiyi nümayəndə heyəti ilə görüşüb.
Müdafiə naziri Azərbaycan Prezidenti, Silahlı Qüvvələrin Ali Baş Komandanı İlham Əliyevin komandanlığı altında Azərbaycan Ordusunun şanlı qələbəsi ilə başa çatan Vətən müharibəsindən sonra azad edilən ərazilərdə ordumuz tərəfindən görülən işlər və Azərbaycan dövlət sərhədində hazırkı vəziyyətlə bağlı qonaqlara ətraflı məlumat verib.
General-polkovnik Z.Həsənov NATO ilə əməkdaşlığın cari vəziyyətindən, əməkdaşlıq sahəsində əldə edilən müsbət nəticələrdən məmnunluğunu bildirib, qarşılıqlı əlaqələrin bundan sonra da inkişaf etdirilməsinin əhəmiyyətini vurğulayıb.
H.Kolomina bölgədə sülhün təmin olunması istiqamətində NATO-nun müvafiq dəstəyi göstərməyə hazır olduğunu qeyd edib.
Görüşdə həmçinin postmüharibə şəraiti və qarşılıqlı maraq doğuran digər məsələlər müzakirə edilib.
Görünən budur ki, NATO bölgəmizdə möhkəmlənməkdə maraqlıdır. Bunun nə kimi perspektivi ola bilər?
Hərbi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Azərbaycanla NATO arasında ilk təmasların tarixi Azərbaycanın bir sıra Mərkəzi və Şərqi Avropa dövlətləri ilə birlikdə NATO-nun yeni yaradılmış məşvərətçi forumuna – Şimali Atlantika Əməkdaşlıq Şurasına (1997-ci ildən Avro-Atlantik Tərəfdaşlıq Şurası) qoşulduğu 1992-ci ilin mart ayına təsadüf edir:
“Azərbaycanın 2004-cü ildə qoşulduğu Fərdi Tərəfdaşlıq üzrə Əməliyyat Planı (FTƏP) müntəzəm siyasi dialoq həyata keçirməyə, ikitərəfli tərəfdaşlığı sistemləşdirməyə və eləcə də qarşılıqlı maraq doğuran məsələlərlə bağlı əməkdaşlıq tədbirini razılaşdırmağa imkan verir. Bu baxımdan da, ölkəmizlə hərbi blok arasında əməkdaşlıq uğurla davam edib. Azərbaycan Kosovo, Əfqanıstanda NATO qüvvələrinin tərkibi də sülhyaratma missiyasında öz əsgəri kontingenti ilə iştirak edib. Ancaq bu heç də o anlama gəlmir ki, biz NATO-ya üzv olmaq və ya Alyansın hərbi bazalarını ərazimizdə yerləşdirmək qərarına gəlmişik. Azərbaycan Qoşulmama Hırəkatının üzvü və hazırda dönəm sədridir. Bu da hər hansı hərbi blokda təmsil olunmağı qadağan edir. Eyni zamanda, bizim Hərbi Doktrinamızda ölkəmizdə hansısa kənar hərbi bazaların olması nəzərdə tutulmur. NATO öz rəqibi olan Rusiyaya doğru genişlənməkdə maraqlıdır. Buna görə də, Rusiya sərhədinə yaxın postsovet ölkələri ilə yaxından təmas qurur. Xüsusilə də həssas region sayılan Cənubi Qafqazda kök atmağa dərin maraq göstərir. Ancaq bu prosesi də ehtiyatla aparmağa çalışır. Bilir ki, Rusiya qıcıqlana bilər. Fikir versək görərik ki, Avropa ilə açıq yaxınlıq edən və buna görə Rusiyadan ciddi zərbələr alan Ukrayna, Gürcüstan kimi ölkələri belə NATO öz üzvlüyünə qəbul etməyə tələsmir. Belə olan təqdirdə, təbiidir ki, NATO ilə Azərbaycanın münasibətləri çox dərinə gedə bilməz. Yalnız qarşılıqlı maraq kəsb edən mısələlər ətrafında əməkdaşlığın olması mümkündür”.
Məhəmmədəli QƏRİBLİ
