İran rejiminin soydaşlarımıza qarşı siyasətinə hələ beynəlxalq reaksiya yoxdur – halbuki, hüquq müdafiəçiləri...

Mübariz Göyüşlü: “Beynəlxalq təşkilatlar və böyük dövlətlər öz maraqlarına uyğun gəldikdə İrana qarşı sərt addımlar atır, amma söhbət Azərbaycan türklərindən gedirsə, onda susurlar”

img

İran rejimi tərəfindən soydaşlarımızın başına gətirilən müsibətlər hədd, sərhədd tanımır. 44 günlük Vətən müharibəsində Azərbaycanın qazandığı qələbəni bayram edən və İranın Ermənitsana dəstəyini hələ də davam etdirməsini etirazla qarşılayan soydaşlarımız mollakratiyanın xüsusi xidmət və güc orqanları tərəfindən həbs edilərək min bir işgəncəyə məruz qalırlar.

Bilirik ki, Azərbaycandakı hüquq müdafiəçiləri İran rejimi tərəfindən həbs edilib işgəncələr verilən azərbaycanlı fəallarla bağlı beynəlxalq təşkilatlara müraciətlər ediblər və etməkdə də davam edirlər. Amma beynəlxalq təşkilatlar təcili surətdə bu müraciətləri nəzərə almalı olduğu halda, bir dəfə də olsun reaksiya verməyiblər, hər hansı bir dinləmələr, müzakirələr keçirməyblər. Gerçəklik budur ki, İran rejimi soydaşlarımızın başına min bir oyun açır, amma beynelxalq təşkilatlar susur...

Qeyd edək ki, Azərbaycanın 30 ildən sonra öz torpaqlarını azad etməsinə səs verən 12 nəfər fəal Azərbaycan Ordusuna dəstək və İranın Ermənistana yardımlarına etiraz olaraq Ərdəbil şəhərinin Ciral parkında aksiya keçirib. Aksiya zamanı İran rejiminin təhlükəsizlik qüvvələri tərəfindən döyülərək həbs edilən fəallara 2021-ci il 9 oktyabr tarixində Ərdəbil şəhər məhkəməsi tərəfindən ümumilikdə 180 ay həbs və 888 qamçı cəzası hökmü çıxarılıb. Azərbaycanın bir qrup hüquq müdafiəçisi isə İranda fəalların həbsi ilə bağlı BMT və "Amnesty İnternational"a müraciət edib.

  • “...Onlar bu ölkəyə “azərbaycanlılara qarşı işgəncəni, hüquq pozuntsunu, etnik ayrıseçkiliyi dayandır,” çağırışları etməlidir, amma hələ bir tərpəniş yoxdur”

Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki,  Azərbaycana münasibətdə qaşınmayan yerdən qan çıxarmağa adət etmiş beynəlxalq təşkilatlar azərbaycanlıların hüquqlarının müdafiəsinə gəlincə susurlar. “Beynəlxalq təşkilatlar və böyük dövlətlər çox nadir hallarda Azərbaycanın səsinə səs verir, haqlı işini, doğru olanlarını dəstəkləyirlər. Çox nadir hallarda baş verən bu dəstək də real, praktik heç bir fəaliyyətlə tamamlanmır. Daha dəqiq desək, baxın, BMT-nin 4 qətnaməsi vardı, amma icra prosesi yox idi, bunu Azərbaycan özü icra etdi. Yəni o mənada deyirəm ki, ən yaxşı halda bir qərar qəbul edərlər, yaxud bir bəyanat verirlər, onun da heç bir praktik, əməli nəticəsi olmur. Azərbaycanın hüquq müdafiəçilərinin də İranda fəalların həbsi ilə bağlı BMT və "Amnesty İnternational"a və digər beynəlxalq təşkilatlara müraciətinə də yenə ikili standartlardan yanaşma özünü göstərir. Baxmayaraq ki, Azərbaycandan bir qrup hüquq müdafiəçisi beynəlxalq qurumlara müraciət edib, amma həmişə olduğu kimi bu dəfə də onlardan adekvat reaksiyanı görə bilmirik. Biz 30 il hansı haqsızlıqlarla, ədalətsizliklərlə qarşılaşmışdıqsa, 44 günlük müharibə zamanı da bu tendensiya davam etdi. Yəni görməzdən gəldilər. Dəfələrlə Ermənistan bizim mülkü əhalini, şəhərlərimizi, kəndlərimizi, Gəncəni, Bərdəni, Tərtəri, Ağdamı, Ağcabədini, Naftalanı qadağan olunmuş silahlardan atəşə tutdu, günahsız insanlarımızı öldürdülər, şikəst etdilər, amma biz dünyanın böyük dövlətlərindən, beynəlxalq qurumlardan elə də ciddi reaksiyalar görmədik. Bu bir gerçəklikdir.

Hesab edirəm, çoxsaylı müraciətlərə baxmayaraq, beynəlxalq qurumlar molla rejiminin işgəncələrinə məruz qalan güneydəki soydaşlarımızın probleminə göz yumurlar. Güneydəki soydaşlarımıza qarşı İranın tutduğu mövqe beynəlxalq qurumların kəskin təndiqinə tuş gəlməli və onlar bu ölkəyə “azərbaycanlılara qarşı işgəncəni, hüquq pozuntsunu, etnik ayrıseçkiliyi dayandır,” çağırışları etməlidir, amma hələ bir tərpəniş yoxdur.  

Baxmayaraq ki, ABŞ başda olmaqla, bir sıra dövlətlər İrana çox ciddi təzyiqlər göstərirlər, bu ölkəni sıxışdırırlar, perspektivdə də bu təzyiqi, blokadanı artırmağı düşünürlər. Amma bununla belə, beynəlxalq qurumlar və iri dövlətlər soydaşlarımızın üzləşdiyi işgəncələri, dəhşətləri, hüquq pozuntularını dayandırması üçün İrana çağırışlar etmirlər, təzyiqlər göstərmirlər. Beynəlxalq təşkilatlar və böyük dövlətlər öz maraqlarına uyğun gəldikdə İrana qarşı sərt addımlar atır, amma söhbət Azərbaycan türklərindən gedirsə susurlar. Bilirik ki, həmişə azərbaycanlılara, Azərbaycana qarşı ikili standatlar tətbiq olunub. Biz bu məsələdə də ikili standartları əyani şəkildə yenə də görürük”.

M.Göyüşlü hesab edir ki, İran rejimi soydaşlarımıza qarşı işgəncələri dayandırmalı, onları həbsdən azad etməlidir. Onun sözlərinə görə, Azərbaycanın sərgilədiyi davranışlar və hüquq müdafiəçilərinin soydaşlarımızla bağlı beynəlxalq təşkilatlara müraciətləri İranı konstruktiv addımlar atmağa sövq edəcək.

İradə SARIYEVA

Son xəbərlər