İkimci Qarabağ müharibəsi ermənilərə elə dərs oldu ki, onların illərlə uydurduğu miflər qısa bir zamanda puç oldu. Artıq öz keçmişlərini təftiş edən ermənilər anlamağa başlayıblar ki, hansısa erməni dövlətçiliyindən danışmaq sadəcə gülüncdür.
Bu arada erməni mətbuatı yazır ki, artıq Ermənistan dövləti yoxdur: “Mübahisəolunmaz fakt budur ki, artıq dövlətimiz yoxdur. Ermənistan sadəcə BMT-yə üzv olan ölkələr siyahısında Argentina və Avstraliya arasında yerləşən əlifba sırasında göstəricidir, ritual detaldır, siyasi anlaşılmazlıqdır. Ermənistan dövləti kapitulyantın günahı ucbatından yox olmayıb, səbəb daha dərindir. Dövləti millət yaradır. Artıq Ermənistan Respublikası yoxdur, çünki erməni milləti yoxdur. Bu gün bir millət yerinə 29.000 kvadrat kilometr ərazidə bioloji populyasiya yaşayır. Populyasiyanın isə dövləti ola bilməz. Ən yaxşı halda arealı ola bilər. Başqa sözlə, ermənilər artıq siyasi varlıq deyil, tezliklə Qırmızı Kitabda yer alacaq etnoqrafik alt növdür. Və heç bir dövlət yoxdur, çünki onu yaradan insanlar sadəcə yoxa çıxıblar”.
Vəziyyət o yerə gəlib çatıb ki, artıq ermənilər öz keçmişlərilə bağlı yazılanları ələ salırlar.
“Bu da regionda yeni münasibətlərin yaranmasına kömək edir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, bütün bunlar onu göstərir ki, Azərbaycan Ordusunun qələbəsi artıq ermənilərin bir hissəsini ayıldıb: “O saxta tarix, millətçilik, böyük Ermənistan xülyasını dərk edib, bunun boş bir şey olduğunun fərqindədilər. Özü də belə fikirlərlə təkcə hakimiyyəti tənqid edənlər yox, digərləri də çıxış edir. Çünki erməni etnosunu Cənubi Qafqaza gətirən Çar Rusiyası olub. Rusiya imperiyası bunlardan öz məqqsədləri üçün istifadə edib, bunlar üçün forpost dövlət yaradıblar. Özləri heç bir şey həll etmir. Hər şey Moskvadan idarə olunur. Olan-qalan gəlirli sahələr Rusiyanın mülkiyətindədir, Ermənistanda hərbi bazalar var və s. Ona görə də Ermənistanda az-çox açıq düşüncəli, proseslərə praqmatik yanaşan insanlar bütün bunları anlayır. Belə düşüncəli insanların sayı nə qədər çox artsa, bu bir o qədər ümumi işin xeyrinə olacaq. Ermənilərin qonşu dövlətlərlə bağlı düşmənçiliyi azalacaq. Artıq dünyaya inteqrasiya olunmaq üçün bütün əvvəlki saxta fikirlərdən də əl çəkəcəklər. Bu da regionda vəziyyətin düzəlməsinə öz müsbət təsirini göstərəcək. Hesab edirəm ki, ötən il Azərbaycanın qələbəsi olmasaydı, Ermənistanda belə fikirlər yaranmazdı. Bunlar yenə də xülyalarla yaşayacaqdılar. Yenə də yalan fikirlərlə qonşulara qarşı ərazi iddiaları ilə çıxış edərdilər. Bütün bunlar o deməkdir ki, revanşist qüvvələr artıq mövqelərini itirir. Ermənistanda reallığı dərk edən qüvvələrin sayı artır. Bu da regionda yeni münasibətlərin yaranmasına kömək edir”.
Professor bildirdi ki, sözügedən tendensiyanın daha da genişlənəcəyi güman edilir.
Vidadi ORDAHALLI
