Erməni mediasında yayılan məlumatlara görə, Ermənistan tərəfindən Vedi rayonunda yaxın aylarda təxminən 400-600 nəfərdən ibarət fransız hərbi kontingenti yerləşdiriləcək. Onların əsasən Türkiyə-Ermənistan sərhədində dayanacağı qeyd edilir .
Bildirilir ki, Rusiyanın 102-ci hərbi bazasında isə ixtisarlar aparılacaq, ixtisar olunan hərbçilər Suriyaya və Kalininqrada gondəriləcək.
Bu məsələ artıq erməni siqmentlərində, sosial şəbəkələrində geniş müzakirə olunur və “ruh yüksəkliyi” ilə qarşılanır.
Nə baş verir ki, Ermənistan artıq 102-ci bazaya qarşı laqeydlik sərgiləyir və fransız hərbi kontingentini gətirir? Məqsəd nə ola bilər?
“Rusiya bunu çox aqressiv qarşılayacaq”
Hərbi ekspert İbrahim Rüstəmli “Bakı-Xəbər”ə şərhində bildirdi ki, hadisələrin dinamikası bunun fundamental səbəblərindən birinin Ermənistanla Rusiya arasındakı münasibətlərin ciddi problemlərlə bağlı olduğunu göstərir. “Ermənistanla Rusiya arasında son hadisələrdən sonra kəskin fikir ayrılıqları yaranıb. Daha Ermənistan Rusiyaya əvvəlki kimi etibar etmir. Bizim də bildiyimiz kimi, 44 günlük müharibədə Fransa Ermənistanı həm Rusiyadan, həm də dünyanın digər dövlətlərindən daha çox müdafiə etdi, bu sahədə daha çox canfəşanlıq göstərdi. Fransa özünü müharibə dövründə də Ermənistanın ən yaxın, sədaqətli dostu kimi təqdim edirdi. Ona görə də cənab Prezident deyirdi ki, “Əgər Fransa Dağlıq Qarabağ üçün öz müqəddəratını təyinetmə istəyirsə, demək olar ki, sakinlərinin yarısı ermənilərdən ibarət olan Marsel şəhərini onlara versinlər, onlara Dağlıq Qarabağ respublikası elan etməyə icazə versinlər və qoy onlara müstəqillik versinlər”.
Yəni Ermənistanın fransız hərbi kontingentini dəvət etməsinin səbəbi Rusiya ilə aralarında yaşanan ciddi fikir ayrılıqlarıdır. Rusiya Ermənistana münasibətdə Fransadan geri qalır, Fransa Ermənistanı dəsrəkləmə məsələsində çox irəli gedir və bu işi xüsusi həvəslə görür. Ona görə də, Ermənistan höküməti Fransanı Rusiyadan daha etibarlı, güvənli bir tərəf-müqabil kimi görür. Əslində, fransızların Ermənistana gəlməsi Azərbaycan tərəfə sərf edir. Bilirsiz ki, Qafqaz bölgəsi Rusiyanın monopoliyasıdır, təbii, fransız hərbi kontingenti Ermənistana ayaq basarsa, biz burada daha ciddi hadisələrin baş verdiyini görəcəyik. O hadisələrin ki, onların ssenarisini Rusiya yazır. Artıq geosiyasi parametrlər dəyişib, Rusiyanın, Türkiyənin, İngiltərənin və digər dövlətlərin Qarabağ münaqişəsinə münasibətində Azərbaycanın xeyrinə böyük bir sıçrayış yaranıb, dayanıqlı bir fikir formalaşıb. Bunun da başlıca səbəbi Azərbaycan dövlətinin, Azərbaycan Prezidentinin informasiya cəbhəsində əldə etdiyi böyük nailiyyətlərdir, informasiya cəbhəsində təşəbbüsü əldə etməsidir”.
İ.Rüstəmli vurğuladı ki, Fransa Ermənistan üçün özünü oda-közə vurub həmişə, o biri dövlətlər Fransadan alt qatda yer tutur. Fransa Ermənistanı bütün dünyada dəstəkləyən və bunu qabarıq şəkildə göstərən yeganə dövlətdir. “Ona görə də, Azərbaycan Prezidenti dəfələrlə Fransanın adını xüsusilə çəkib. Fransanın hərbi kontingentinin Ermənistana qədəm basması bu ölkəyə müsbət heç nə vəd etmir. Ermənistan Rusiyanın monopoliyası altındadır və fransız hərbi kontingenti bu ölkəyə gələrsə, Rusiya bunu çox aqressiv qarşılayacaq. Bilirsiz ki, Avropa İttifaqı, Qərb dövlətləri Rusiyaya qarşı çox kəskin tənqidi fikirlərlə çıxış edir, Rusiya siyasi xəritədə sıxışdırılmış vəziyyətdə görünür. Fransızların timsalında Avropanın bura ayaq açması Rusiya tərəfindən heç də birməlı qarşılanmayacaq... Fransanın hərbi kontingentinin Ermənistana gəlməsi bölgədə vəziyyətin dəyişməsinə heç bir təsir göstərə bilməyəcək... Fransa dünyada ən aqressiv dövlətlərdən biridir. Fransa bu şəkildə Ermənistana gəlsə, bu ölkəyə çox ciddi problemlər yaşadacaq. Burada çox şiddətli hadisələr baş verəcək. Əgər fransız hərbi kontingenti Ermənistanın timsalında Qafqaza ayaq basarsa, Ermənistan bunun bədəlini iki dəfə artıq ödəyəcək”-deyə İ.Rüstəmli qeyd etdi.
İradə SARIYEVA
