Ermənistan mətbuatı yazır ki, “Artsax”ın xarici işlər naziri” David Babayan Rusiyada 6-15 oktyabr tarixlərində Rusiya Federasiyasına “işgüzar” səfərdə olub.
“Xarici işlər naziri” Moskvada, Vladimir bölgəsində, Pyatiqorskda və Soçidə Rusiya Federasiyasının siyasi, ictimai və elmi-təhsil dairələrinin nümayəndələri və erməni icması ilə görüşüb. Bir sözlə, sözdə “Arsax”ın “xarici işlər naziri” Rusiyada separatçı əməllərini davam etdirib və yenə “Arsax” haqqında uydurma, mifik sayıqlamalar edib. Separatçı “nazir”in köhnə bayatı çağırması təbiidir, bəs Rusiya niyə onu “nazir” olaraq qəbul edir? Babayan Rusiyaya məhv olmuş rejimin “xarici işlər naziri” statusunda gedir, amma Rusiya buna etiraz etmir.
Nə üçün indiyə qədər Rusiya “Arsaxın xarici işlər naziri” ifadəsinə rəsmi etiraz etməyib?
“Terrorçu dəstənin üzvünün Rusiyada “xarici işlər naziri” kimi qəbul edilməsinə və bu ölkənin buna şərait yaratmasına, göz yummasına Azərbaycan rəsmən etiraz notası göndərməlidir...”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, Rusiyanın buna etiraz etməməsi səbəbsiz deyil. “Bu hərəkətləri ilə Rusiya oyunlarını davam etdirdiyini göstərir. Rusiya Azərbaycanın ərazisi olan Qarabağın bir hissəsində özü üçün əl tutacaq yer saxlayır. Ona görə də müvəqqəti olaraq Rusiya sülhməramlılarının nəzarəti altında olan ərazilərdə separatçıların bu cür qondarma qurumunun qalıqlarının əl-qol açmasına şərait yaradır, onlarla əlaqələr qurur, onlara yardım edir. Dəfələrlə demişik ki, Rusiyanın məkrli məqsədləri var. Rusiya həm Azərbaycanı, həm də Ermənistanı nəzarətdə saxlamaq, təsir imkanlarını bərkitmək üçün Qarabağdakı qanunsuz silahlı dəstələrin zərərsizləşdirilməsini həyata keçirmir. Rusiya bununla həm 10 noyabr, həm də 11 yanvar sənədlərinin tələblərini pozur, öz öhdəsinə götürdüyü vəzifələrini yerinə yetirmir. Hesab edirik ki, artıq dözməyə ehtiyac yoxdu. Azərbaycan Türkiyə ilə bir yerdə məqsədyönlü siyasətini davam etdirməlidir. Rusiya rəhbərliyi qarşısında konkret məsələ qoyulmalıdır, ondan soruşulmalıdır ki, nə üçün oradakı separatçı bir dəstənin nümayəndələrini Rusiyada rəsmən qəbul edirsiniz? Rusiya niyə imkan verir ki, separatçı dəstənin üzvlərindən biri “xarici işlər naziri” olaraq təqdim edilsin? Əgər separatçı, qanunsuz dəstənin nümayəndəsi “xarici işlər naziri” sifətində Rusiyaya gedirsə, demək buna Rusiya özü icazə verir, əks halda bu mümkün olan iş deyil. Bu, Rusiyanın məkrli maraqlarına xidmət etdiyi üçün buna rəsmən etiraz etmir, əksinə, şərait də yaradır”.
A.Nağının sözlərinə görə, Azərbaycan və Türkiyə konkret olaraq Rusiya rəhbərliyi qarşına tələb qoymalıdır ki, Rusiya da, sülhməramlılar da separatçılarla heç bir təmas qurmasınlar, bu qanunsuz dəstənin ləğv olunması, zərərsizləşdirilməsi istiqamətində addımlar atsınlar. Azərbaycanın siyasi müstəvidə addımlarını davam etdirməli olduğunu deyən A.Nağı bildirdi ki, Babayan məsələsinə görə də Azərbaycan Rusiyaya etiraz notası göndərməlidir: “Terrorçu dəstənin üzvünün Rusiyada “xarici işlər naziri” kimi qəbul edilməsinə və bu ölkənin buna şərait yaratmasına, göz yummasına Azərbaycan rəsmən etiraz notası göndərməlidir, Rusiyanı bu mövqyeindən geri çəkilməyə məcbur etməlidir. Eyni zamanda, 30 il müddətində Azərbaycan həm həmsədr dövlətlər, həm beynəlxalq təşkilatlar tərəfindən oynanılan oyunlara dözdü, amma sonra Azərbaycan əsgəri öz sözünü dedi, silahlar danışdı, ədalət öz yerini aldı. Ona görə də Azərbaycan gec-tez öz haqqını müdafiə edəcək və tam qələbəyə nail olacaq...”
İradə SARIYEVA
