Azərbaycan ordusunun məhv etdiyi qondarma “Arsax”ın tör-töküntüləri, təəssüf ki, hələ də qalmaqdadır. İflasa uğradılan “Arsax”ın sözdə “təhsil, elm və mədəniyyət naziri” Lusine Karaxanyan elə sərsəmləyib ki, onun dediklərinə “bişmiş toyuğun belə” gülməyi gəlir. Separatçılıq niyyətlərindən əl çəkmək istəməyən Karaxanyan ağlına gələni sayıqlayıb.
Karaxanyan mənsub olduğu toplumun xarakterinə “sadiq” qalaraq iddia edib ki, guya bu gün Azərbaycan tərəfindən “Arsax”ın “2000-ə yaxın abidəsi işğal edilib” (?). Karaxanyan utanmadan, böyük saxtakarlıq edərək iddia edib ki, guya onlar arasında “122 kilsə, 13 monastır kompleksi, 52 qala, 536 xaçkar, 20 885 eksponat, 617 min ədəbiyyat kitabı, Azıx mağarası və Tiqranakert var”. Təsəvvür edin ki, bu necə böyük saxtakarlıqdır. Əvvəla “Arsax” deyilən bir ərazi vahidi yoxdur və vaxtilə yaradılan qondarma “respublika” bir il bundan əvvəl ordumuz tərəfindən əzilərək məhv edilib, qalanlar, arada bir səsi çıxanlar isə keçmiş saxta rejimin tör-töküntüləridir.
“Biz ərazilərimizlə birgə öz abidələrimizi də işğaldan azad etmişik”
Tarix üzrə fəlsəfə doktoru, arxeoloq-tarixçi Təvəkkül Əliyev “Bakı-Xəbər”ə bildirdi ki, separatçıların saxtakarlığı miqyas tanımır. Onun sözlərinə görə, separatçılar bu iddianı gündəmə gətirməklə əslində dünyanın, xüsusən də xristian aləminin diqqətini özünə cəlb etmək istəyir. T.Əliyevin bildirdiyinə görə, torpaqlarımızın işğal altında olduğu 30 ilə yaxın müddətdə ermənilər Qarabağ ərazisində olan kiçiyindən böyüyünə qədər bütün abidələrin siyahıyaalınmasını həyata keçirib və onların bukletlərini çap edib, kitab şəklində ayrıca nəşr ediblər. “Məhv olmuş separatçı rejim tərəfindən vaxtilə Qarabağda olan bütün abidələrin siyahıya alınması həyata keçirilib və hamısı da saxtalaşdırılıb, erməniləşdirilib. Ermənilərin siyahıya aldığı abidələrin sayı ilə bizim siyahıya aldığımız abidələrin sayında fərqlər var. Sovet dövründə Qarabağda, tutaq ki, təkcə Şuşa rayonu ərazisində 60 abidə qeydə alınmışdı, amma ermənilərin siyahısında 405 abidənin adı var. Nəzərə alaq ki, Sovet dövründə bizim Qarabağ bölgəsindəki rayonların çoxundakı abidələrin tam olaraq siyahıyaalınması olmayıb. Ona görə də, Kəlbəcərdə, Laçında, Zəngilanda olan abidələrin çoxu qeydiyyata alınmayıb. Amma biz bilirik ki, həmin ərazilər bütün dövrlərlə bağlı abidələrlə zəngindir. Separatçılar bizim abidələri öz adlarına çıxırlar, Qarabağda erməni mədəniyyəti yoxdur. Bu baxımdan da onların iddiası boş və mənasızdır”.
T.Əliyevin sözlərinə görə, amma biz bütün hallarda separatçıların və onları dəstəkləyənlərin hücumlarına hazır olmalıyıq. Ermənilərin cəfəngiyatının miqyas tanımadığını deyən T.Əliyevin bildirdiyinə görə, Azərbaycan tərəfi bütün abidələrin siyahısını tam şəkildə hazırlamalı, sənədləşdirməli və yaymalıdır. “Ermənilər torpaqlarımızı işğalda saxladıqları dövrdə orada əməlli-başlı saxtalaşdırma işləri aparıblar. Onların qanunsuz qazıntılar aparması, abidələrimizə qarşı saxtalaşdırma, soyqırım cinayətləri etməsi məlumdur. Separatçılar bu müddətdə abidələrimizin hamısını siyahıya alıb onların müxtəlif dillərdə kataloqlarını tərtib ediblər, bu barədə kitablar çap ediblər. Bu dövrdə əllərindən gələn qədər saxtalaşdırmalar ediblər. Azıx mağarasının, Şahbulağın, digər xristian dövrü abidələrin hamısı Azərbaycan irsidir. Amma görürsüz ki, erməni həyasızlığı, saxtakarlığı sərhədlləri aşır. Hətta Şahbulaq ərazisində qanunsuz qazıntı aparmış olan və burada qondarma “Tiqranakert”i axtaran Hamlet Petrosyan əsassız olaraq iddia edirdi ki, Azərbaycan arxeoloqları Ağdam ərazisində arxeoloji tədqiqatlar aparsalar da, burada “Tiqranakerti” “görməyib”lər, “ona görə qısqanclıqla yanaşırlar”. Amma Petrosyanın xəbəri yoxdur ki, Azərbaycan arxeoloqları Rəşid Göyüşov, Rəhim Vahidov və başqaları 20 ilə yaxın “Gavurqala”da arxeoloji qazıntılar aparıblar, onların tədqiqatlarının nəticəsi nəinki Azərbaycanda, həm də Rusiyada və başqa yerlərdə nəşr olunub. Orada “Tirqanakert” vardı ki, bizim alimlər onu tapsın da?
Torpaqlarımızın işğaldan azad edilməsi və maddi-mədəni irsimizin, abidələrimizin də yenidən özümüzə qayıtması separaçıları bərk narahat edir, ona görə də, bu cür həqiqətə uyğun olmayan məsələlər baradə danışırlar. Biz bu məsələdə işimizi ehtiyatlı tutmalıyıq və ermənilərin hər cür təxribatlarına hazır olmalıyıq. Hətta gözləyirik ki, separatçılar lap bu əsassız iddialarla beynəlxalq konfransalara da çıxa bilərlər. Biz bütün bu iddiaların cavabını effektiv şəkildə verməyə hazır olmalıyıq. Ermənilərin gerçək mədəniyyəti, mədəni irsi var ki, durub 2000 abidədən də danışırlar? Bu cəfəngiyatdır. Biz ərazilərimizlə birgə öz abidələrimizi də işğaldan azad etmişik. Bunu separatçılar da yaxşı bilir, sadəcə məğlubiyyətlərinin acısını dezinformasiyalar yaymaqla çıxmaq istəyirlər”-deyə T.Əliyev qeyd etdi.
İradə SARIYEVA
