Ermənistan rəsmilərinin iddialarının əksinə olaraq, Moskva-İrəvan münasibətlərində gərgin vəziyyətin hökm sürməsi heç kimə sirr deyil. Belə vəziyyətdə Ermənistanda Rusiya əleyhinə ictimai fikrin getdikcə daha radikal mərhələyə qədəm qoyması da təsadüf hesab edilmir. Bu prosesdə hakimiyyətə yaxın media orqanlarının da xüsusi çəkisi var.
Hazırda belə media orqanları və digər vasitələrlə Ermənistanda Rusiyaya qarşı yeni nifrət dalğası formalaşdırılır. Elə bu günlərdə Milli Demokratik Qütb (MDQ)- Ümumerməni “Sasna Tsrer” və “Ermənistan Avropa Partiyası”ından ibarət erməni blokunun İrəvanda keçirdiyi mitinq də qeyd edilənlərin təsdiq oldu. Mitinq zamanı etirazçılar hökumətə, keçmiş prezident Robert Köçəryana və Rusiyaya qarşı şüarlar səsləndirib, Rusiya prezidenti Vladimir Putini təhqir ediblər. Maraqlı məqam isə Putin əleyhinə səslənən şüarlara nümayişçiləri müşayiət edən güc strukturlarının reaksiya verməməsidir. Hesab edilir ki, bu da təsadüf deyil və hakimiyyət proseslərin bu məcrada inkişafını istəyir. Bundan başqa, məlumdur ki, ölkənin hər yerində: divarlarda, Putinin əks olunduğu plakatlarda Rusiya lideri küçə söyüşləri ilə, ifrat ifadələrlə təhqir edilir. Elə bu günlərdə Ermənistan ərazisində yerləşdirilən və üzərində Rusiya-Ermənistan “dostluğ”unu simvolizə edən, hər iki ölkənin bayraqlarının və Putinin rəsmi olan bilborda yerli əhali tərəfindən rus dilində söyüş yazılıb. Sosial şəbəkə istifadəçilərinin bir qismi bu fotoya gülüşlə yanaşıbsa, digər qisim ermənilərin bu hərəkətini təəccüblə qarşılayıb. Ermənidilli sosial şəbəkə istifadəçiləri vandalizm aktını yüksək dəyərləndirərək, bu hərəkəti edənlərə təriflər yağdırıblar. Ruslar isə bundan çox qəzəblənib və hətta onlardan biri şərhində qeyd edib: “Erməni vandalları özlərinin ənənəvi işləri ilə məşğuldurlar. Axmaqlar, siz Putinə sitayiş etməlisiniz, siz isə belə edirsiniz”. Rusiyalı hərbi analitik Yevgeni Mixaylov da baş verənlərə sərt mövqe sərgiləyir. “Sasna Tsrer” və “Ermənistan Avropa Partiyası”ından ibarət erməni blokunun İrəvanda keçirdiyi mitinqə toxunan ekspert bildirir: “Ermənistanda minlərlə insan küçələrə çıxıb etirazlarını bildirib. İnternetdə yayılmış bu "debillər yürüşünün" videoları Rusiyada da maraqla izlənib. Videolarda yüzlərlə erməninin Rusiyanı söydüyü, Putini lənətlədiyi görünür. Rus milləti satqın, ikiüzlü adlandırılır. Halbuki, elə həmin ermənilərin sağ qalmalarına səbəbkar da Rusiyadır. Kreml Ermənistana ciddi sanksiyalar tətbiq etməlidir. Rusiyaya qarşı çıxan bu nadanlara Rusiya ərazisinə daxil olmaq qadağan olunmalıdır. Qazandıqları yer Rusiya, yaşadıqları yer Rusiya, varlıqlarını borclu olduqları yer Rusiya ola-ola, onlar bizə qarşı çıxırlar”. Mixaylav vurgulayıb ki, rusların ermənilərin nazı ilə oynamasına son qoyulmalıdır: “Bu nankorlar sabah, o biri gün Rusiyaya qarşı ən alçaq addımı atmaqdan da çəkinməzlər. Onlardan nə desən, gözləmək olar”.
Bununla yanaşı, Qarabağda Rusiya sülhməramlılarının fəaliyyətinə kölgə salmaq istiqamətində də ermənilərin məqsədyönlü addımları diqqətdən yayınmır. Məlumdur ki, son günlərdə Rusiya sülhməramlılarının müvəqqəti yerləşdirildiyi Azərbaycan ərazilərindəki qanunsuz erməni silahlı dəstələri ard-arda təxribatlar törədir. Belə ki, Kəlbəcər rayonu ərazisində mülki infrastrukturun tikintisi məqsədilə Tərtər rayonunun Suqovuşan qəsəbəsindən Kəlbəcər rayonu istiqamətində hərəkət edən və qeyri-hərbi yükləri daşıyan avtomobil karvanı Qozlukörpü yaşayış məntəqəsi yaxınlığında qanunsuz erməni silahlı dəstələri tərəfindən atəşə məruz qalıb. Bunun ardınca Füzuli rayonu istiqamətində kəşfiyyat məqsədilə Azərbaycan Ordusunun mövqeləri üzərində uçuşlar həyata keçirməyə cəhd göstərən Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələrinə məxsus kvadrakopter bölmələrimizin sayıqlığı nəticəsində vaxtında aşkar edilərək ələ keçirilib. Daha sonra qanunsuz erməni silahlı dəstələri tərəfindən açılan snayper atəşi nəticəsində Azərbaycan ordusunun hərbi qulluqçusu, əsgər Həmzəyev Əfqan Bəhram oğlu şəhid olub. Bunun ardınca qanunsuz erməni silahlı dəstəsinin üzvləri tərəfindən mülki tibbi yardım maşınından istifadə etməklə Ağdərə istiqamətində bölmələrimizə qarşı növbəti terror-təxribat cəhdi qeydə alınıb. Hərbi qulluqçularımızın sayıqlığı və görülən tədbirlər nəticəsində bu cəhdin qarşısı alınıb və maşında hərəkət edən silahlılar geri dönməyə məcbur edilib. Belə hesab edilir ki, İrəvan Qarabağ və sərhəd məsələləri ətrafında mövcud olan ümumi vəziyyətdən narazıdır. Eyni zamanda, genişmiqyaslı təxribat Rusiyadakı Putin-Paşinyan görüşündən sonra baş verir. Bunlar ermənilərin Rusiya sülhməramlılarının fəaliyyətinə əngəl törətmək cəhdlərini göstərir. Halbuki, Rusiya Elmlər Akademiyasının “Dünya iqtisadiyyatı və beynəlxalq münasibətlər” institutunun direktoru, akademik Fyodor Voytolovskiy Moskvanın İrəvana hər cür yardımlar etdiyini bildirir: “Ötən payız Qarabağ müharibəsi zamanı bizim düşdüyümüz vəziyyətdə Rusiya maksimum dərəcədə bacardığını etdi. Mən qərarların necə qəbul edildiyini bilirəm. Niyə bu maksimum idi? Burada Moskvanın hərəkətini məhdudlaşdıran çox şeyləri, Rusiya ilə Ermənistanın yetərli səviyyədə olmayan qarşılıqlı əlaqələrinə qədər faktorları izah etmək lazımdır. Ermənistan rəhbərliyi Qarabağdakı rejimi tanımayıb, onun Ermənistanın tərkibinə inteqrasiyası imkanını nəzərdən keçirməyib. Ermənistan kömək barədə rəsmi qaydada bir dəfə də olsun Rusiyaya müraciət etməyib”. Onun qiymətləndirməsinə görə, payız müharibəsinin nəticələri əsasında yaranan koordinatlar sistemi bütün postsovet dövründə mövcud olan vəziyyətdən çox fərqlənir: “Biz yalnız Zaqafqaziyada yox, bütün postsovet məkanında beynəlxalq münasibətlərin yeni dövrünə daxil olmuşuq. Bu məkandakı dondurulmuş münaqişələr yeni inkişaf mərhələsinə keçə bilər. Qarabağ münaqişəsini postsovet məkanındakı digər münaqişələrdən fərqləndirəncəhət bu müstəvidə Qərblə Rusiya arasında birbaşa qarşıdurmanın olmaması idi”.
Samirə SƏFƏROVA
