İran Xalq Mücahidləri Təşkilatı İranın 25 əyalətində - 45 şəhərdə minlərlə vətəndaşın küçələrə çıxdığını qeyd edib. İran mətbuatı xəbər verir ki, aksiyada müəllimlər və təqaüdçülər iştirak edib. Etirazçılar məmurların son aylardakı tələblərini həll edə bilmədiklərini, onları sıxışdırdıqlarını dilə gətiriblər.
Ölkə daxilində keçirdikləri mitinqlər və yürüşlər zamanı etirazçılar yerli təhsil idarəsi qarşısında toplaşıblar. Tehranda və digər şəhərlərdə müəllimlər etiraz aksiyaları zamanı əllərində plakatlar tutaraq vəzifəli şəxsləri sərt tənqid ediblər. Etirazların müxtəlif bölgələrdə davam etdiyi bildirilir.
Çox maraqlıdır ki, özü iqtisadi problemlər içində çabalayan bir ölkə daxili problemlərini həll etmək əvəzinə, qonşularının daxili işinə qarışır, Ermənistan kimi ac-yalavac bir ölkənin sosial problemlərini həll etmək qərarına gəlir. Bu məntiqsiz addımları necə izah etmək olar?
Politoloq Qabil Hüseynli “Bakı-Xəbər”ə açıqlamasında bildirdi ki, İranda sosial problemlərin həddən artıq kəskin olmasını hamı bilir: “Bunu bəzən İran rəsmiləri də qəbul edir və səbəbini ölkəyə tətbiq edilən beynəlxalq sanksiyalarla izah edirlər. Həmin ölkədəki siyasi problemlər də həddən artıq dərindir. Bu il bir neçə dəfə sosial tələblərlə aksiyaların keçirildiyinin şahidi olmuşuq. Həmin aksiyalarda getdikcə sosial problemlərlə bağlı şüarları siyasi tələblər əvəzləməyə başladı. Xüsusən azərbaycanlılar olan şəhərlərdə siyasi şüarlar səslənir. Bəziləri hesab edirdi ki, Xamneyini nəzərə alaraq azərbaycanlılar etirazlarda çıxış etmirlər. Amma indi məlum olur ki, rejimin əleyhinə qalxırlar və siyasi xarakterli dəyişikliklərin olmasını istəyirlər. Belə məzmunlu aksiyalarda əvvəllər Xamneyiyə kəskin etirazlar olmurdu, indisə istefasını tələb edirlər. Proseslərə kənardan təsirləri istisna etmirəm. Sadəcə, İranda azərbaycanlı fəalların çoxu həbsdədir. Onlar azadlıqda olsaydı, siyasi proseslərin kəsərini artıra bilərdilər. İndi yeni-yeni liderlər meydana çıxmaqdadır. İnsanlar bezib. Əhalinin sıxıntısı olduğu halda İran xaricdə silahlı birləşmələri maliyyələşdirir. Məsələn, Suriyadakı ”Haşdi şabi" adlı silahlı qruplaşmanı dəstəkləyir, Livanda “Hizbullah”ı maliyyələşdirir, Yəməndə husilərə kömək edirlər. Azərbaycanın daxili işinə qarışır. İran xalqı bu siyasətdən narazıdır. Ölkənin milyonları kənar hərbi xərclərə yönəlir, amma adi su qıtlığı probleminə sərf edilmir. Düzdür, Xamneyi məmurları tənqid atəşinə tutur, xalqın problemlərini həll etməyə çağırır, amma insanlar bu çıxışları artıq səmimi qəbul etmir. Yaxşı olardı ki, İran gedib öz daxilindəki elementar problemlərinin həlli istiqamətində addımlar atsın. Ancaq biz fərqli siyasətin şahidi oluruq. İran öz əhalisinə təqaüd verə bilmir, ancaq gedib Ermənistanın sosial problemlərini həll edir. Tehran öz siyasətinə korrektələr etməsə, belə sosial tələblər mahiyyətini dəyişib, siyasi məzmunlu aksiyalara çevriləcək. Xüsusilə də Azərbaycana qarşı İranın qərəzli mövqeyi onun daxilindəki “barıt çəlləyi”ni doldurub. Cənubdakı soydaşlarımız hər an Azərbaycanın müdafiəsinə qalxmağa hazırdır”.
Məhəmmədəli QƏRİBLİ
