Azad edilmiş ərazilərdə minatəmizləmə istiqamətində Fransa ilə sənədin imzalanması nəzərdə tutulur. Azərbaycan Respublikasının Minatəmizləmə Agentliyindən (ANAMA) verilən məlumata görə, ANAMA-nın sədri Vüqar Süleymanov Fransanın ölkəmizdəki səfiri Zakari Qrosun müşayiət etdiyi Piyadalar əleyhinə minaların məhv edilməsi üzrə Milli Komissiyasının (CNEMA) nümayəndə heyəti ilə görüş keçirib.
Görüş zamanı işğaldan azad edilmiş ərazilərdə ANAMA tərəfindən həyata keçirilən minatəmizləmə əməliyyatları barədə məlumat verilib, prezentasiya keçirilib: “Səfərin başlıca məqsədi Azərbaycanda icra edilən humanitar minatəmizləmə fəaliyyətinə Fransa Respublikasının mümkün töhfəsinin verilməsi, eləcə də minadan zərərçəkənlərin ehtiyaclarının öyrənilməsi və bu sahədə lazımi dəstəyin göstərilməsinin müzakirəsindən ibarət olub. Yaxın zamanda ikitərəfli əməkdaşlıq çərçivəsində qeyd olunmuş istiqamətlər üzrə sənədin imzalanması nəzərdə tutulur”.
O da məlumdur ki, Fransa ermənipərəst mövqe sərgiləyən dövlətdir. Ötən il baş verən 44 günlük müharibə zamanı bu bütün çılpaqlığı ilə özünü göstərdi. Fransa ATƏT-in Minsk Qrupunun həmsədri olsa da, tərəfsiz mövqe sərgiləmədi. Açıq formada Ermənistanın yanında durdu. Belə olan halda minaların təmizlənməsi işində Fransa ilə əməkdaşlıq etmək nə dərəcədə doğrudur? Nəzərə almaq lazımdır ki, minatəmizləmə işləri böyük vaxt və vəsait tələb edir. Belə çıxır ki, bununla biz həm də Fransaya pul qazanmaq imkanı yaratmış olacağıq.
“Ərazilərin minalardan təmizlənməsi işində Azərbaycana dost ölkələrlə əməkdaşlıq etmək lazımdır”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, prinsipcə minatəmizləmə işində Fransa ilə əməkdaşlıq etmək doğru deyil: “Fransanın ermənipərəst mövqeyi hər kəsə yaxşı məlumdur. Bu günlərdə ANAMA rəhbərliyinin Piyadalar əleyhinə minaların məhv edilməsi üzrə Milli Komissiyasının (CNEMA) nümayəndə heyəti ilə görüşü keçirilib. Görüşdə müəyyən müzakirələr aparılıb. Ancaq hesab edirəm ki, sözügedən məsələdə bizim Fransa ilə əməkdaşlıq etməyimiz doğru olmaz. Ən azından, mənəvi baxımdan belə bir addım atmaq doğru deyil. Ona görə ki, Fransa zaman-zaman işğalçı Ermənistanın yanında olub. İşğala son qoyulması ilə Ermənistana heç bir təzyiq göstərməyib. Əksinə, müxtəlif vasitələrlə işğalçı tərəfə yardım göstəriblər. Belə olan halda Fransa ilə əməkdaşlıq etmək doğru sayılmaz. Hesab edirəm ki, işğaldan azad olunmuş ərazilərin minalardan təmizlənməsi işində Azərbaycana dost olan ölkələrlə əməkdaşlıq etmək lazımdır. Bununla bağlı bizə dost olan ölkələrin imkanlarından faydalanmalıyıq. O baxımdan hesab edirəm ki, bu kimi məqamlar nəzərə alınmalı və buna diqqət edilməlidir”.
Partiya sədri hesab edir ki, Azərbaycan bütün vasitələrdən istifadə edərək ərazilərin minalardan təmizlənməsi işini sürətləndirməlidir.
Vidadi ORDAHALLI
