Son vaxtlar Ermənistan cəmiyyətində Kremlin Cənubi Qafqaz siyasəti ciddi şəkildə narazılıqla qarşılanmaqdadır. Maraqlıdır ki, proses artan xətt üzrə inkişaf edir.
Onu da qeyd edək ki, artıq Ermənistanda Rusiyaya qarşı əhval-ruhiyyə küçə və meydanlara sıçramağa başlayıb. Ötən gün Ermənistan paytaxtı İrəvanda minlərlə erməni Rusiya əleyhinə etiraz yürüşünə çıxıb. Ermənilər birağızdan Rusiyanı sərt şəkildə ittiham edən şüarlar səsləndiriblər. Üstəlik, Rusiya prezidenti Vladimir Putinin ünvanına təhqiramiz ifadələr işlədiblər. Və bütün bunlar son günlər Rusiyanın Ermənistandan üçtərəfli anlaşmaların icrasını tələb etməsi fonunda baş verməkdədir.
İrəvanda Kreml əleyhinə etiraz aksiyalarının fonunda Rusiyanın Ermənistandakı səfiri Sergey Kopırkin ermənilərə 44 günlük savaş dövründə baş verənləri xatırladıb. Rus səfir bildirib ki, ötən ilin payızında Rusiya siyasi cəhətdən Ermənistanın yanında olan yeganə dövlət idi: "İndi müxtəlif regionlardan bəzi ölkələr yeni regional sistemdə özləri üçün nəsə tapmağa və əldə etməyə çalışırlar. Ancaq ötən ilin payızında həmin ölkələr çox təmkinli davranırdılar. Onlar susmağa üstünlük verirdilər".
Anlaşılan odur ki, rus səfir, əslində, Rusiyanın Ermənistanı tamamilə məhv olmaqdan xilas etdiyinə eyham vurur. Eyni zamanda, bu etirafı ilə Ermənistanı nankorluqda qınayır. Rus səfirinin ermənilərə şamil etdiyi fikri nə dərəcədə əsaslı saymaq olar?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, hərbi əməliyyatlar dönəmində Ermənistan Qərb ölkələrinə çox böyük ümidlər bəsləyirdi: “Qısa müddətdə başa düşdü ki, bu faydasızdır. Çünki başı seçkilərə qarışan ABŞ və daha çox sözdə Ermənistana böyük dəstək verən Fransa onlara arzuladığı dəstəyi verməyəcək. Etiraf etmək lazımdır ki, Makron özünü Ermənistan dövlətinin rəsmi nümayəndəsi kimi aparırdı. Verdiyi bəyanatlar, ardıcıl şəkildə bizim Prezidentə etdiyi zənglər, bizi güya terrorçulardan istifadə etməkdə təqdirləndirmək buna sübutdur. Merkel də dəfələrlə Azərbaycan Prezidentinə zəng edərək əks-hücum əməliyyatlarının dayandırılmasını istədiyini biıdirdi. Elə o dövrdə ermənilər başa düşdülər ki, Qərbdən nə qədər sözdə dəstək görsələr də, regionda söz sahibi Rusiyadır. Rəsmi Moskva, üzərinə götürdüyü öhdəliklərə uyğun olaraq, Ermənistana yardım etdiyini dəfələrlə bəyan edib. Ancaq bu yardım, təbii ki, kifayətedici səviyyədə olmadı. Rusiya yardımı daha çox ermənilərin bəhanələrini kəsmək üçün edirdi. Bilirdi ki, Ermənistan nə vaxtsa “müttəfiüimiz bizə yardım etmədi” fikrini dövriyyəyə buraxacaq. Hərbi əməliyyatların taleyini pliotsuz uçan aparatlar və qırıcı təyyarələr həll edirdi. Bu sahədə Rusiya Ermənistana lazım olan dəstəyi verə bilmədi. Heç onu vermək imkanı da yox idi. Çünki Rusiya dronları onları İsrailin lisenziyası ilə istehsal edir. Yəqin ki, həmin silahı üçüncü ölkəyə verməməklə bağlı İsraillə aralarında razılaşma da var. Qırıcı təyyarələrə də raket vermədi. Ermənistan hərbi cəhətdən açıq-aşkar uduzdu. Bunu Ermənistanda yaxşı dərk edirlər ki, Rusiya onlara lazım olan yardımı etmədi. Uzun illərdi təbliğ olunurdu ki, Azərbaycan hərbi əməliyyatlara başlasa, Rusiya Ermənistana lazımi hərbi dəstəyi verəcək. 1993-cu ildə Rusiyanın 3 diviziyası vuruşub. Onlar torpaqları işğal edib Ermənistana verdilər. Ermənilər bu dəfə də həmin dəstəyi gözləyirdi, amma olmadı. Yaxşı anlayırlar ki, Rusiya onları satdı. Rusiyaya qarşı açıq-aşkar getməyə də cəsarət etmirlər. Başa düşürlər ki, bunun nəticələri ağır ola bilər. İndiki narazılıq Ermənistanın sülh danışıqlarına yanaşması ilə bağlıdır. Həmin ölkə danışıqların Minsk Qrupunun vasitəçiliyi ilə aparılmasını istəyir. Üzdə Rusiya da bunun tərəfdarı olsa da, vasitəçiliyi təkbaşına etməyə çalışır. Ermənistan prosesə Fransa və ABŞ-ı qoşmağa çalışır ki, status məsələsi gündəmdən düşməsin. Biz isə bunu istəmirik. Anti-Rusiya ovqatının kökündə duran başlıca amil budur. Rusiyanın vasitəçiliyi qətiyyən Ermənistanı qane etmir. Hesab edirəm ki, belə vəziyyət Azərbaycanın xeyrinədir. Çünki Minsk Qrupunu qətiyyən prosesə yaxın buraxmaq olmaz”.
Məhəmmədəli QƏRİBLİ
