Qonşu ölkələrdə “sionist” axtaran İran islam rejimi çox bildiyindən, “dimdiyindən tələyə düşmək”dədir. İranın özü özünü ifşa etməyə başlayıb. Dubayda keçirilən EXPO sərgisində baş verənlər isə bunu daha da sürətləndirir. Belə ki, İranın sabiq prezidenti Mahmud Əhmədinejad Dubayda keçirilən EXPO sərgisində İsrail pavilyonuna baş çəkib, onun bu davranışı isə qalmaqal yaradıb.
“Azad İran” Teleqram kanalının verdiyi xəbərə görə, İsrailin Terrorçuluqla Mübarizə Dövlət Təşkilatının rəsmi Tvitter hesabı bu fotoşəkli paylaşaraq iddia edib ki, Dubayda keçirilən beynəlxalq EXPO sərgisində iştirak edən İranın keçmiş prezidenti Mahmud Əhmədinejad İsrail pavilyonuna baş çəkib.
Sözügedən qurum onu İranın yeni islahatçısı adlandırıb!
Mahmud Əhmədinejad İsrail pavliyonuna nə üçün gedə bilər?
Ekspertlər deyir ki, hətta bəzi xarici müşahidəçilər bunu fərqli qiymətləndirərək, onun İran tərəfindən münasibətləri isitmək üçün bu addımı atdığını iddia edir. Yəni M.Əhmədinejadın bu addımının səbəbləri ilə bağlı versiyalar çoxdur.
“Əhmədinejadın belə bir addım atması qeyri-adi hadisə deyil, bu, molla rejiminin pərdəarxası oyunlarının ifşasıdır və iç üzünü açan məqamlardandır”
Azərbaycan Milli Elmlər Akademiyası (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, İran İslam Respublikası adlandırılan ölkənin keçmiş prezidenti Mahmud Əhmədinejadın İsrail pavliyonuna baş çəkməsi qeyri-adi bir məsələ deyil və sabiq prezidentin bu addımı heç də onu təəccüblənmir: “Mənim həmişə düşüncəmdə olub ki, özünü islam dövləti adlandıran İranın görünən və görünməyən üzü olub. Görünən tərəfi odur ki, ABŞ-a, Böyük Britaniyaya, İsrailə və başqa ölkələrə qarşı nifrət üzərindən baxılır. Əslində, bu daha çox görüntüdür. Deyək ki, bu ölkədə yaşayan digər xalqların şiəlik məzhəbi, islam adı altında assimilyasiyasına yönəlib. Ən mühüm məqamlarda molla rejimi öz varlığını qoruyub saxlamaq üçün oyunlar oynamaqdadır. Bu oyunlardan ən təhlükəlisi də zahirən İsrailə, ABŞ-a, Böyük Britaniyaya qarşı düşmən tərzləri ortaya qoymaqdır. Bu, pərdə arxasında da belədirmi? Bu barədə diqqətli olmaq lazımdır. Çünki biz tarixə baxanda da görürük ki, tarix boyu farsların ən çox anlaşdığı xalqlardan biri məhz İsrail xalqıdır, yəhudilərdir. Eləcə də XX əsrin əvvəllərində farslar ingilislərin dəstəyi ilə Qacar türk dövlətini devirdilər və hakimiyyəti qanunsuz şəkildə ələ keçirdilər, hakimiyyəti zəbt etdilər. 1925-ci ildə türk dövləti olan Qacarların devrilib onun yerinə irançıların, pəhləvilərin hakimiyyətə gətirilməsində iki xalq mühüm rol oynayıb. Onlardan biri ingilislərdirsə, o birisi yəhudilədir. Üçüncü yerdə Rusiya, dördüncü yerdə Fransa ola bilər. Ancaq sonrakı dövrlərdə, yəni 1979-cu ildən sonra görürük ki, sanki ABŞ və Böyük Britaniya arxa plana keçir, onun yerini Fransa, arxa planda isə yəhudilər tutur. Mənim düşüncəm bundan ibarətdir ki, İranın sabiq prezidentinin bu davranışı təsadüfi deyil. Mahmud Əhmədinejad bu hərəkəti ilə müəyyən məqamda heç də İsraillə farsların, yaxud molla rejiminin düşmən olmadığını ortaya qoyur. Əslində, bizlər bundan daha çox nəticə çıxarmalıyıq. İran islam Respublikası adlanan ölkədəki türklər, xüsusən də Güney Azərbaycan türkləri ciddi nəticə çıxarmalıdır ki, niyə bu cür həssas məqamda Əhmədinejadın EXPO-da İsrail pavliyonuna baş çəkdiyini əks etdirən məlumatlar yayılır? Bu təsdüfdürmü?. Düzdür, indi Əhmədinejad dövlət başçısı deyil, amma keçmiş dövlət başçısı olan bir şəxsdir. O bununla müəyyən mənada molla rejiminin, farsların əslində İsrailə düşmən münasibəti bəsləmədiyini, bu düşmənçiliyin yalnız sözdə olduğunu ortaya qoyur”.
F.Ələkbərlinin sözlərinə görə, haqsız olaraq Azərbaycanı sionistlikdə, sionistlərlə işbirliyində ittiham edən molla rejimi hər gün öz iç üzünü açıb özünü ifşa edir. Azərbaycana qarşı hədyanlar və əsassız ittihamlar irəli sürən molla rejiminin keçmişdə başında duran bir şəxsin belə addımlar atması nəticəsində də İranın yürütdüyü çoxüzlü siyasətin açığa çıxan tərəflərindən biri olduğunu deyən F.Ələkbərlinin fikrincə, İran Azərbaycanı yalan yerə ittiham etməkdənsə, öz keçmişinə baxsın: “Fars molla rejiminin mahiyyətində bu və ya digər dərəcədə sionistlik var. Bu istisna edilə bilməz. İndi molla rejimini idarə edənlər və onun arxasında dayananlar hər şeyə əl atmağa hazırdır, təki Güney Azərbaycan milli hərəkatı orada ön plana çıxmasın. 1925-ci ildə hakimiyyəti qanunsuz olaraq ələ keçirən Pəhləvilər və bu və digər dərəcədə onun davamçısı olan molla-fars rejimi hər oyuna əl atmağa çalışır ki, bölgədə normal, demokratik bir dövlət quruluşu olmasın. Ona görə də, bu məqamları biz diqqətdə saxlamalıyıq. Xüsusən də molla rejiminin vaxtilə tələsinə düşən bəzi güney və qüzey azərbaycanlılar görsünlər ki, bizi ABŞ-la, İsraillə əməkdaşlıqda ittiham edən, hər cür ləkə atan rejimin sabiq prezidenti İsrail pavliyonuna gedir. Çox ehtimal ki, rejimin sabiq prezidenti bununla İranın İsraili üzdə düşmən, gizlində dost adlandırdığı mesajını çatdırmaq istəyib. Çünki İran İsrailə üzdə düşmən münasibəti bəsləyir.
İran rejiminin şiəlik və islam faktorundan sui-istifadə etdiyi məlumdur. Əslində isə bu rejim nə şiə, nə də islam təəssübkeşidir, sadəcə fars irqçiliyini, fars dövlətçiliyini yaşatmaq üçün hər addımı atmağa hazırdır. Biz bunu İkinci Qarabağ savaşında da gördük.
Əhmədinejadın belə bir addım atması qeyri-adi hadisə deyil, bu, molla rejiminin pərdəarxası oyunlarının ifşasıdır və iç üzünü açan məqamlardandır”.
İradə SARIYEVA
