NATO baş katibinin siyasi məsələlər üzrə müavini, Qafqaz və Mərkəzi Asiya üzrə xüsusi nümayəndəsi Havyer Kolomina Azərbaycana səfər edəcək.
Bu barədə H.Kolomina öz "Twitter" səhifəsində yazıb.
X.Kolomina qeyd edib ki, səfər bu həftə tutacaq: “Qafqaza ilk səfərimi səbrsizliklə gözləyirəm. NATO-nun Qafqazdakı fəaliyyətini daha da genişləndirməyin yollarını müəyyən etmək üçün qurumun Qafqaz və Mərkəzi Asiya üzrə yeni xüsusi nümayəndəsi olaraq Azərbaycan, Gürcüstan və Ermənistana səfər edəcəm”.
Məlumata görə, NATO Baş katibinin Cənubi Qafqaz və Mərkəzi Asiya üzrə xüsusi nümayəndəsi ilk səfərini oktyabrın 19-20-də Gürcüstana edəcək. Ondan sonra digər iki Cənubi Qafqaz ölkəsinə səfər edəcək. Belə görünür ki, NATO Azərbaycanda öz iştirakını genişləndirmək şansı axtarır. Düzdür, ötən illər ərzində NATO bir sıra proqramlar çərçivəsində Azərbaycanla əməkdaşlıq edib. Görünür, sözügedən əməkdaşlığı daha da dərinləşdirmək nəzərdə tutulur.
Bütün hallarda, ekspertlər sözügedən səfəri necə dəyərləndirir?
“Qərbin enerji təhlükəsizliyində Azərbaycanın oynadığı rol, antiamerikanizm mövqeyi ilə seçilən İranla qonşuluq faktoru, Rusiyanın...”
Məsələyə münasibət bildirən politoloq Elşən Manafov buna bir neçə prizmadan yanaşdı: “Azərbaycan 1994-cü ildən bəri NATO ilə Sulh Naminə Tərəfdaşlıq Proqramı çərçivəsində əməkdaşlıq edir. Sözügedən əməkdaşlıq təlim və təhsil, habelə ordumuzda NATO standartlarının tətbiqi ilə baglı amilləri özundə ehtiva edir. Digər tərəfdən, 2002-ci ildən NATO Baş Assambleyası ilə də münasibətlərin genişləndirilməsi istiqamətində işlər gedir. Bundan əlavə, beynəlxalq terrorizmə qarşi mubarizə işində də Azərbaycan NATO-nun yanında yer alaraq İraqda, Əfqanıstanda Turkiyə Silahli Quvvələrinin tərkibində məhdud sayda hərbi kontingenti ilə təmsil olunub. Azərbaycan Əfqanıstana yüklərin daşınmasında yardım göstərib. Azərbaycan geostrateji baximdan olduqca vacib əhəmiyyətli bölgədə yerləşdiyindən, NATO-nun bizimlə əməkdaşlığın format və xarakterinin dəyişməsi ilə bağlı məsələlərdə maraqlı olması da anlaşılandır. Qərbin enerji təhlükəsizliyində Azərbaycanın oynadığı rol, antiamerikanizm mövqeyi ilə seçilən İranla qonşuluq faktoru, Rusiyanın Cənubi Qafqazda getdikcə artmaqda olan rolu NATO-nun ölkəmizə marağını artırır. Nəhayət, Azərbaycan Ordusunun bölgənin ən güclu ordusu olması faktoru və Ermənistanla 44 günlük savaşda bunun öz təsdiqini tapması da, Azərbaycana olan marağın artmasının səbəblərinə aid edilə bilər. Bununla belə, Azərbaycan Qoşulmayan dövlətlərin blokunda təmsil olunduğundan, bu və ya digər hərbi-siyasi bloklarla münasibətləri də bu blok qarşısında üzərinə götürdüyü öhdəlikləri, özünün milli təhlükəsizlik maraqlarını, nəhayət bölgə ilə bağlı geosiyasi reallıqları nəzərə alaraq qurur”.
Politoloq hesab edir ki, məhz buna görə də Qərbin təhlükəsizlik sisteminə, yəni NATO-ya qoşulmaqla bağlı məsələlər hazırda müzakirə obyekti ola bilməz.
Vidadi ORDAHALLI
