Azərbaycanda uğurla həyata keçirilən sosial-iqtisadi siyasətin mərkəzində ölkə vətəndaşı, onun sosial-rifah halının, yaşayışının yaxşılaşdırılması dayanır.
Buna nümunə olaraq, bu gün dövlət başçımız cənab İlham Əliyevin “Əhalinin sosial rifahının qorunması sahəsində əlavə tədbirlər haqqında” Sərəncamını göstərmək olar. Həqiqətən də, Prezident İlham Əliyevin sosial sahə ilə bağlı qərarları, Fərman və sərəncamları inqilabi xarakter daşıyır. Bu yöndə qərarlar 2018-ci ildən etibarən xüsusilə intensivləşib. Qeyd edək ki, 2018-ci ildən başlayaraq, sosial islahat paketləri nəticəsində müavinət və təqaüdlərin, pensiya və əməkhaqqlarının ciddi şəkildə artımı təmin edilib, yeni sosial təminat növləri təsis olunubdur. Bu gün isə cənab Prezidentin imzaladığı Sərəncam birbaşa əhalinin, xüsusilə həssas qruplardan olan vətəndaşların sosial rifahının qorunmasını təmin edir. Əməkhaqlarının, pensiya və sosial müavinətlərin, təqaüdlərin və digər sosial ödənişlərin məbləğlərinin artırılması ilə bağlı Nazirlər Kabinetinə verilən tapşırıqlar 2022-ci ildə xalqımızın sosial rifahının əvvəlki illərə nisbətən daha da yaxşılaşacağına zəmanət verir. Sosial ödənişlərdə növbəti artımların edilməsi, ölkə başçımızın siyasətində prioritet istiqamət hər zaman vətəndaş rifahının təminatı və həssas qrupların sosial müdafiəsi olduğunu deməyə əsas verir. Hesab edirəm ki, 2022-ci il xalqımız üçün sosial inkişaf, əhalinin sosial müdafiəsi baxımından ötən illərdən fərqlənən bir il olacaqdır. Çünki “Əhalinin sosial rifahının qorunması sahəsində əlavə tədbirlər haqqında” yeni Sərəncam ölkəmizdə sosial inkişafın davamlı xarakter almasına və ümumilikdə 1 milyon 800 min nəfərədək vətəndaşımızın rifahının daha da yaxşılaşmasına xidmət edəcəkdir. Bildiyiniz kimi, artıq illərdir ki, hər bir Azərbaycan vətəndaşının rifah halının yaxşılaşdırılması, sosial müdafiəsinin gücləndirilməsi istiqamətində ciddi addımlar atılır . Bu cür sosial inqilab xarakterli qərarlar davamlı xarakter alıb. Çünki dövlət siyasətinin mərkəzində vətəndaş və onun rifahı dayanır. İllərdir Azərbaycanda şəhid ailələrinin və qazilərin sosial müdafiəsinin gücləndirilməsi istiqamətində də görülən bütün işlər nümunəvi xarakter daşıyır. Çünki Azərbaycanda aparılan siyasət ən humanist, ən ədalətli, ən vicdanlı siyasətdir. Böyük yaşayış komplekslərinin, evlərin tikilərək şəhid ailələrinin və qazilərin ixtiyarına verilməsi sıradan bir hadisə kimi qəbul edilməsin. Heç bir dövlətdə şəhid ailələrinə, qazilərə bu cür diqqət, bu cür qayğı göstərilmir. Bu fakt bir tərəfdən Azərbaycan dövlətinin gücünü göstərir, digər tərəfdən isə ölkəmizdə aparılan siyasətin mahiyyətini əks etdirir. Ölkəmizdə vətəndaş maraqları hər şeydən üstün tutulur. Dövlətimiz özünün dərinməzmunlu sosial siyasətinə hər zaman sadiqlik nümayiş etdirir. Ölkəmizdə 2025-ci ilədək 11 min şəhid ailəsinin və qazinin mənzillərlə təmin edilməsi nəzərdə tutulub. Azərbaycan dövlətinin şəhid ailələrinin və müharibə əlillərinin sosial müdafiəsinin gücləndirilməsi istiqamətində görülən tədbirlər sırasında onların dövlət vəsaiti hesabına tikilən mənzillərlə, fərdi evlərlə və avtomobillərlə təmin olunması da xüsusi yer tutur. Bu da Azərbaycana xas olan bir nümunədir.
Xatırladaq ki, Prezident İlham Əliyev 25 yanvar 2021-ci il tarixində “Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında” Sərəncam imzalayıb. Bu sənəd 2020-ci ildə Ordumuzun həyata keçirdiyi hərbi əməliyyatlar zamanı şəhidlik zirvəsinə yüksələn qəhrəmanlarımızın ailələrinin və bu müharibə ilə əlaqədar əlilliyi müəyyən edilən şəxslərin də mənzil və ya fərdi evlərlə təminatını nəzərdə tutur. Azərbaycan sosialyönümlü dövlətdir və hər il vətəndaşların sosial vəziyyətinin yaxşılaşdırılması istiqamətində bu cür qərarlar qəbul edilir. Əhalinin sosial müdafiəsinin gücləndirilməsi və yaxşılaşdırılması Azərbaycan dövlətinin və dövlət başçısının siyasətinin əsas xəttini təşkil edir. Lamiyə İsazadə, “Kimsəsiz Uşaqların Sosial Müdafiəsi” İB-nin sədri
