“Ermənistan təqribən 30 il müddətində İranla əlbir olaraq Azərbaycanın keçmiş işğal altında olan ərazilərindən Avropaya narkotrafik üçün istifadə edib”. Bunu Prezident İlham Əliyev Müstəqil Dövlətlər Birliyinin Dövlət Başçıları Şurasının videokonfrans formatında keçirilən iclasındakı çıxışında deyib.
Dövlət başçısı vurğulayıb ki, Azərbaycan 30 il Ermənistanın nəzarəti altında olmuş İranla dövlət sərhədinin 130 kilometrlik hissəsində nəzarəti bərpa edəndən sonra keçən bir il ərzində Azərbaycanın Cəbrayıl rayonundan keçməklə İrandan Ermənistana və daha sonra Avropaya narkotrafik marşrutunu bağlayıb: “Azərbaycan-İran sərhədinin digər sahələrində bizim tutub saxladığımız heroinin həcmi əvvəlki illərin müvafiq dövrü ilə müqayisədə iki dəfə artıb. Bu o deməkdir ki, Ermənistan təqribən 30 il müddətində İranla əlbir olaraq Azərbaycanın keçmiş işğal altında olan ərazilərindən Avropaya narkotrafik üçün istifadə edib”.
“Polisə Dəstək” İctimai Birliyinin sədri Şəmsəddin Əliyev baki-xeber.com-a şərhində bildirdi ki, bu məsələnin tam rəsmən təsdiqlənməsi İran və Ermənistan arasındakı münasibətlərin hansı səbəbdən belə “isti” olduğunu üzə çıxarıb. Ş.Əliyevin sözlərinə görə, torpaqlarımız işğalda olduğu dövrlərdə bizim nəzarətimizdən kənarda olan ərazilərimizdən İran və Ermənistanın birgə narkotik vasitələrin əkilib–becərilməsində, istehsalında, Avropaya narkotrafik üçün istifadə edilməsi barədə xəbərlər yayılırdı, amma Azərbaycan tərəf “din qardaş”larımızın belə bir çirkin əməldə Ermənistanla birləşdiyinə ehtimal vermək istəmirdi. Ş.Əliyev deyir ki, biz o vaxtlar bu xəbərlərə inanmaq istəmirdik, amma bu gün bunların tamamilə həqiqət olduğu təsdiqlənir: “O vaxtlar xəbərlər yayılırdı ki, Azərbaycanın nəzarətində olmayan İranla Azərbaycan sərhədindəki ərazimizdən həm insan alveri, həm narkoticarət üçün geniş şəkildə istifadə edilir. Bizim həmin dövrdə ora nəzarətimiz yox idi və həmin sərhəddə bizim sərhədçilər orada xidmət apara bilmirdi, ona görə də ora nə gətirilirdi, ordan nə çıxarılırdı, nə baş verirdi, bizim ondan xəbərimiz olmurdu. Biz gözləmirdik ki, kifayət qədər dinə-imana xidmət, Allahın səmavi kitablarının tələblərinə riayət etdiyini deyən islam dövləti olan İranın dinimizin haram buyurduğu, bütün dövlətlərin qanunlarının qadağan etdiyi, insan üçün asılılıq yaradan, onun sağlamlığına zərbə vuran, yolunu azdıran narkoticarətdə əli ola, o Ermənistanla birləşərək bizim ərazimizdən Avropaya narkotrafik üçün istifadə edə bilər. Düşünürdük ki, “din qardaşları”mız bunu heç vaxt etməzlər, çünki dinimiz də bunu qadağan edir. Amma indi o pərdə qalxdı, ehtimal pərdəsi yırtıldı və məlum oldu ki, bizim “din qardaş”larımız hansı əməllər törədiblər, bizə necə xəyanət ediblər. Narkoticarət öz yerində. İndi bizə məlum olur ki, torpaqlarımız işğalda olduğu vaxtlarda bizim ərazilərimizi, kənd və şəhərlərimizi, var-dövlətimizi çalıb-çapıb aparan elə İran şirkətləri olub. 100-dən artıq İran şirkəti bizim ərazilərin talanmasında iştirak edib. Buna beynəlxalq hüquq müstəvisində, beynəlxalq tribunal səviyyəsində münasibət bildirilməlidir, çünki çox böyük cinayətdir. İndi dəqiq məlumatlar eşidəndə bir Azərbaycan vətəndaşı olaraq ağlıma bir fikir gəlir. Dinimiz də, şəriətimiz də, kitabımız da bir olan bir ölkənin vətəndaşları niyə qardaşa xəyanət yolunu seçiblər? Bizim səcdə etdiyimiz, namaz qıldığımız yerlərdə, məkanlarda ermənilər donuz saxlayıblar, amma erməni ilə işbirliyindən qalmırlar. Mən onlara qarşı bir ifadə işlədirəm: “Allah sizə qənim olsun”. Təsəvvür edin, görün vəziyyət nə qədər əndazəni aşıbmış ki, bunu artıq Prezident İlham Əliyev dilə gətirir. Prezident açıq şəkildə bəyan edir ki, Ermənistan təqribən 30 il müddətində İranla əlbir olaraq Azərbaycanın keçmiş işğal altında olan ərazilərindən Avropaya narkotrafik üçün istifadə edib. Bu bilirsiz nə deməkdir? İranın bizə münasibətini tam ifşa edən bir məsələdir. İranın Ermənistanla əlbir olub Azərbaycanın keçmişdə işğal altında olan ərazilərində narkotik əkib-becərməsi, sonra da onu Avropaya çıxarması faktı artıq ifşa olunub. Hesab edirəm ki, bu məsələyə beynəlxalq hüquq müstəvisində qiymət verilməlidir”.
Ş.Əliyevin sözlərinə görə, İran Ermənistanla arasındakı biznes maraqlarını öz din qardaşının maraqlarından üstün tutub, bununla da əsl mahiyyətini ifşa edib. “İran gərək heç zaman Ermənistanla işbirliyi edib bizim ərazilərimizdə o cür qanunsuz əməllərlə məşğul olmazdı. Amma belə olmadı. İran Ermənistanla işbirliyi qurmaqla öz biznes maraqlarını din-imandan, din qardaşının maraqlarından çox-çox üstün tutduğunu sübut etdi. Məsələ budur. Necə ola bilər ki, İran, islamın iffətini, namusunu, qeyrətini qurban verəsən? Özü də Ermənistana, Allahın evində donuz otaran, Allahın evini murdarlayan bir mürtədə. Bu necə olur? Quranda belə bir kəlam var: “Xristianlardan sizə dost və köməkçi olmaz, onlardan uzaq durun”. Tarixən farsların bütün hərəkətləri ermənilərlə bir olub, onların qanı da, missiyası da, məramı da, məqsədi də birdir. Artıq Azərbaycan torpaqları azad olunub, dövlət sərhədimiz bərpa olunub. Bu gün dost da, düşmən də meydandadır” - deyə Ş.Əliyev qeyd etdi.
İradə SARIYEVA
