Ermənistanın Baş naziri Nikol Paşinyan MDB-nin sammitində çıxışı zamanı Azərbaycana qarşı ənənəvi ittihamları təkrarlasa da ümumən Bakının şərtləri ilə razı olduğu görünür. Məsələ ondadır ki, o Ermənistanın Rusiya və İrana gedən yolları açacağını dedi. Həmçinin qeyd etdi ki, Azərbaycan bölgədə kommunikasiyaların açılması nəticəsində Naxçıvanla dəmir yolu və avtomobil əlaqəsi əldə edəcək.
Paşinyan Azərbaycanla Ermənistan arasında sülh sazişinin imzalanması üçün danışıqların ATƏT-in Minsk Qrupu çərçivəsində baş tuta biləcəyini diqqətə çatdırıb. O bildirib ki, Ermənistan Azərbaycanla sərhədlərin demarkasiyası və delimitasiyası prosesində Rusiyanın dəstəyinə ümid edir. Paşinyan onu da əlavə edib ki, Ermənistan qalan mina sahələrinin xəritələrini Azərbaycana verməyə hazırdır və bunu humanitar aksiya hesab edir: “Bunun müqabilində isə biz istəyirik ki, Azərbaycan bütün əsirləri və məhbusları geri qaytarsın”.
Görünən odur ki, Paşinyan ümumən bir sıra ümidverici vədlər versə də, bununla yanaşı mina xəritələrini alver predmetinə çevirdi.
Bunu ekspertlər necə dəyərləndirir?
Məsələyə münasibət bildirən millət vəkili, politoloq Elman Nəsirov buna bir neçə aspektdən yanaşdı: “Əvvəla, Nikol Paşinyan çox mürəkkəb situasiya ilə üzbəüzdür. Bir yandan çox gözəl dərk edir ki, məğlub ölkə olaraq Ermənistanın blokadadan çıxması həyati əhəmiyyət kəsb edir. Bunun üçün isə kommunikasiyaların açılması, Zəngəzur dəhlizinin işə düşməsi lazımdır. MDB-nin məlum sammitində də bu istiqamətdə hazırlıq nümayiş etdirdi. Fikrimcə, Paşinyanın cənab İlham Əliyevlə görüşündə məhz kommunikasiyaların bərpası istiqamətində müəyyən razılaşmaların əldə edilməsi gözlənilir. MDB tədbirində diqqəti çəkən məqam o idi ki, Paşinyan status məsələsindən danışmadı. Hesab edirəm ki, Paşinyan sonuncu Moskva səfərində bununla bağlı müəyyən təlimatlar alıb. Putinlə görüşündə aldığı əsas təlimatlardan biri o olub ki, status məsələsini qaldırmasın. Çünki status məsələsini qaldırsa, o zaman bütün görüşlər dayanmış olacaq. O üzdən, bu dəfəki çıxışı daha çox sülhpərvər ovqatda idi. Bütün bunlarla yanaşı, daxili auditoriyaya hesablanmış fikirlər də səsləndirdi. Bunda məqsəd revanşistlərin təzyiqlərini zəiflətmək idi. O baxımdan mina xəritələrini alver predmetinə çevirmək cəhdi daxili ictimai rəyə hesablanıb. Bununla özünü sığortalamaq istəyir. Əslində diversantlar 10 noyabrdan sonra saxlanıldığı üçün onlar hərbi əsir sayılmır. Bununla bağlı dövlətimizin mövqeyi ortadadır. Ona görə də “Azərbaycanda hərbi əsir yoxdur mövqeyini” Ermənistan qəbul etməlidir. Ermənistan rəhbərliyi diversantlara görə üzrxahlıq etməlidir. Yoxsa onların Azərbaycanla minnət dili ilə danışmağa haqqı yoxdur. Çünki müharibədə qalib gələn tərəf Azərbaycandır. Dünya tarixində də qalib gələn tərəf öz şərtlərini diqtə edir”.
Bir sözlə, millət vəkili hesab edir ki, Ermənistan reallıqları qəbul etməlidir.
Vidadi ORDAHALLI
