Milli Demokratik Qütb (MDQ) - Ümumerməni "Sasna Tsrer" və "Ermənistan Avropa Partiyası"ndan ibarət erməni bloku Ermənistanın paytaxtı Yerevanda çoxvektorlu mitinq keçirib.
Erməni mətbuatının verdiyi xəbərə etirazçılar hökumətə, keçmiş prezident Robert Köçəryana və Rusiyaya qarşı şüarlar səsləndiriblər, Rusiya prezidenti Vladimir Putini təhqir ediblər.
Qeyd edək ki, MDQ bloku bir müddət əvvəl bu gündən "itaətsizlik aksiyasına" başladığı barədə bəyanat yaymışdı.
Ermənistanda anti-Rusiya ovqatını kimlər qızışdırır və maraq nədir?
Ermənilər əsgərimizi snayperlə vurdu - Təxribatın arxasında hansı dövlətlər dayanır?
Politoloq Rəşad Bayramov “Bakı-Xəbər”ə bildirdi ki, son vaxtlar Qarabağ məsələsində Moskvanın fəallığı nəzərə çarpır: “Bunun da fonunda biz Qarabağdakı erməni terrorçularının fəallaşdığını və Ermənistanda anti-Rusiya ovqatının qalxdığını müşahidə edirik.
Erməni silahlı birləşmələrinin açdığı atəş nəticəsində Azərbaycan ordusunun hərbi qulluqçusu şəhid oldu. Ermənilərin bu əməlinin hərbi-siyasi məqsədlərə hesablanmış təxribat olması heç bir şübhə doğurmur.
Oktyabrın 14-də Azərbaycan və Ermənistan xarici işlər nazirlərinin Belarusun paytaxtı Minskdə görüşü baş tutdu. Bu görüş Azərbaycanla Ermənistan arasında sülh müqaviləsinin bağlanması prosesini sürətləndirmək üçün mühüm əhəmiyyət kəsb edirdi. Belə bir gərgin situasiyada iki ölkənin baş diplomatlarının görüşü 10 noyabr üçtərəfli razılaşmanın bəndlərinin yerinə yetirilməsinin vacibliyini bir daha önə çəkirdi. Görüşdə sərhədlərin demarkasiya və delimitasiyası, eləcə də nəqliyyat-kommunikasiya məsələlərinin vacibliyi də müzakirə olunub. Görünür, bu cür təxribatlarla iki ölkə arasında normal münasibətlərin qurulmasını, üçtərəfli razılaşmanın müddəalarının icrasını və sülh müqaviləsinin imzalanmasını əngəlləməyə çalışırlar.
Oktyabr ayının 12-də Paşinyanla Putinin görüşü oldu. Görüşdə üçtərəfli bəyanatın müddəalarının yerinə yetirilməsinin vacibliyi müzakirə mövzusu olmuşdu. Bundan bir neçə gün əvvəl isə Ermənistanın müdafiə naziri Arşak Karapetyan Rusiya müdafiə naziri Sergey Şoyqu ilə görüşmüşdü. Bu görüşdə də Azərbaycan-Ermənistan sərhədindəki vəziyyət masanın əsas mövzusu idi.
Oktyabrın 13-də Azərbaycan, Rusiya və Ermənistan dini liderlərinin Moskvadakı görüşü də Moskvanın təşəbbüsü sayılırdı. İki dövlət arasında münasibətlərin normallaşdırılması məqsədilə din xadimlərinin də eyni mövqedə olmasını mühüm amil kimi önə çıxarırdı.
Müşahidə olunan budur ki, artıq müharibə ikinci fazaya - diplomatik müstəviyə daxil olub. Bu məsələdə də Rusiya nəzarəti tam ələ alıb. Təbiidir ki, bu ABŞ və bəzi Qərb ölkələrinə sərf etmir. Bu səbəbdən də Ermənistandakı revanşistləri anti-Rusiya ovqatına kökləyirlər. Gürcüstanda baş verənlər də bunun məntiqi davamıdır. Qərb və ABŞ Cənubi Qafqazda itirdiyi maraqları bu cür üsullarla bərpa etməyə çalışır”.
Məhəmmədəli QƏRİBLİ
