“Siyasi konyunkturadan asılı olaraq, Qərbdə bəzi qüvvələr vaxtaşırı Azərbaycanı gözdən salmaq, onun mövqeyini zəiflətmək üçün iftiralardan və böhtanlardan istifadə etməyə çalışır”.
Bunu Prezident İlham Əliyev İtaliyanın “La Repubblica” qəzetinə müsahibəsində deyib.
Ölkə başçısının sözlərinə görə, Azərbaycanın Qarabağda əldə etdiyi qələbə Qərbdə bəzi dairələrin xoşuna gəlməyib: “Əlbəttə ki, İkinci Qarabağ müharibəsində Qələbə bir çoxları üçün sürpriz oldu. Bu onların xoşuna gəlmədi. Onlar Azərbaycanı zəif, asılı, işğal altında olan və hər zaman münaqişənin həlli üçün yardım istəyən ölkə kimi görmək istəyirlər. İndi isə bir halda ki, Azərbaycan bunu özü etdi və Ermənistanı məğlub etdi, Ermənistana sıx bağlılığı olan Qərbdəki həmin dairələr yenə böyük fəallığa keçiblər. Biz bunu gözləyirdik. Əslində biz bilirdik ki, Azərbaycana qarşı yeni qarayaxma kampaniyası planlaşdırılır”.
Görünən odur ki, Azərbaycanın Qarabağda əldə etdiyi qələbədən ən çox Qərbdəki dairələr narahat olub. Belə görünür ki, üstündən bir il keçsə də, hələ də həmin dairələr bunu həzm etmək istəmir. O səbəbdən müxtəlif vasitələrlə Azərbaycanı qaralamağa çalışırlar.
“Bu səbəbdən ölkəmizlə bağlı həqiqətə uyğun olmayan informasiyalar yayırlar”
Məsələyə münasibət bildirən hərbi ekspert İbrahim Rüstəmli hesab edir ki, Qərbdəki dairələrin belə narahat olmasının bir neçə səbəbi var: “Əvvəla, Azərbaycanın belə qısa müddət ərzində sürətlə işğal altında olan əraziləri azad edəcəyini gözləmirdilər. Hesab edirdilər ki, əksər strateji yüksəkliklər Ermənistan ordusunun nəzarətində olduğundan və güclü mühəndis istehkam qurğuları qurulduğundan, Azərbaycan əraziləri azad edə bilməyəcək. İkincisi, Qərbdəki bəlli dairələr Cənubi Qafqazda hərbi balansın Azərbaycanın xeyrinə dəyişməsini istəmirdilər. Bu səbəbdən uzun illər işğalçı ilə işğala məruz qalan tərəfə fərq qoymurdular. Üçüncüsü, Azərbaycan müstəqil siyasət yeridir. Qarabağ azad ediləndən sonra Azərbaycanın müstəqil siyasət yeritmək imkanları daha da genişlənib. Hansı ki, ərazilərin uzun illər işğal altında qalması müəyyən mənada daha çevik manevrlər etməyə mane olurdu. Artıq 1 ildir bu problem də ortadan qalxıb. Bax, bütün bunlar Qərbdəki bəlli dairələri, Azərbaycanı sevməyən qüvvələri ciddi narahat edir. Bu səbəbdən ölkəmizlə bağlı həqiqətə uyğun olmayan informasiyalar yayırlar. Ancaq nə indi, nə də bundan sonra həmin dairələr Azərbaycanı zəiflədə bilməyəcək. Çünki ötən illər ərzində dövlətçiliyimiz daha da möhkəmlənib”.
Bu səbəbdən hərbi ekspert hesab edir ki, Azərbaycan tutduğu yoldan dönməyəcək.
Vidadi ORDAHALLI
