Oktyabrın 14-də Minsk şəhərində keçirilən MDB Xarici İşlər Nazirləri Şurasının iclasında iştirakı çərçivəsində Rusiyanın təşəbbüsü ilə Azərbaycan xarici işlər naziri Ceyhun Bayramovun Ermənistan xarici işlər nazirləri Ararat Mirzoyanla görüşü baş tutub.
XİN-dən verilən məlumata görə, görüşdə C.Bayramov Azərbaycanın bölgədə mövcud olan münaqişə sonrası vəziyyət və iki ölkə arasında münasibətlərin normallaşdırılması ilə bağlı mövqeyini səsləndirib. Nazir 10 noyabr 2020-ci il və 11 yanvar 2021-ci il tarixlərində imzalanmış üçtərəfli bəyanatların tam icra edilməsinin vacibliyini vurğulayıb. Beynəlxalq hüququn prinsiplərinə, xüsusilə dövlətlərin suverenliyi, ərazi bütövlüyü və sərhədlərin toxunulmazlığına hörmət əsasında Azərbaycan və Ermənistan arasında münasibətlərin normallaşmasına hazır olduğumuz ifadə edilib. Bu xüsusda, Azərbaycanın Ermənistanla sərhədlərinin delimitasiyası prosesi üzrə danışıqlara başlanılmasının əhəmiyyət kəsb etdiyi vurğulanıb. Həmçinin regionda bütün nəqliyyat kommunikasiyalarının açılması üzrə razılaşmaların yerinə yetirilməsinin vacibliyi qeyd edilib. C.Bayramov azad edilmiş ərazilərdə insan həyatına birbaşa təhdid olan mina təhlükəsi mövzusunu qeyd edərək, bu xüsusda Ermənistan tərəfindən dəqiq mina xəritələrinin təqdim edilməsinin zəruriliyini bildirib. Nazir, həmçinin, azad edilmiş ərazilərdə həyata keçirilən bərpa-quruculuq işləri barədə də danışıb. Maraqlıdır ki, Ermənistan və Rusiya KİV-ləri görüşlə bağlı rəsmi qaynaqlara istinadən yaydığı məlumatlarda yenidən “Dağlıq Qarabağ münaqişəsi” ifadəsini işlədir. Azərbaycanın rəsmi mövqeyi budur ki, “Dağlıq Qarabağ” adlı ərazi vahidi yoxdur və münaqişə həllini tapıb. Belə olan təqdirdə, Ceyhum Bayramovun bu formatla təqdim olunan görüşdə iştirakı nə dərəcədə doğrudur? Tərəflər buna məhəl qoymursa, belə görüşlərə moratorium qoyula bilərmi?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Azərbaycanın bu məsələ ilə bağlı rəsmi mövqeyi bəllidir: “Prezident İlham Əliyev dəfələrlə bəyan edib ki, bütün dairələr və ölkələr Azərbaycanın inzibati ərazi vahidləri ilə bağlı danışarkən yeni reallıqları qəbul etməlidir. Bilməlidirlər ki, artıq “Dağlıq Qarabağ” adlı ərazi vahidi yoxdur. Dövlət başçısının Azərbaycan Respublikasında iqtisadi rayonların yeni bölgüsü haqqında Fərmanı ilə Qarabağ və Şərqi Zəngəzur iqtisadi rayonları yaradılıb. ATƏT-in Minsk Qrupu 30 ilə yaxın müddət ərzində müxtəlif yollarla münaqişəni dondurmaqla məşğul olub, problemin həllində heç nəyə nail olmayıb. Bu gün artıq münaqişə geridə qalıb, Azərbaycan 44 günlük Vətən müharibəsində özü bu məsələni həll edib, işğal altında olan torpaqlarını azad edib və bu tarixi Zəfəri ilə regionda yeni reallıq yaradıb. Bu mənada, Ermənistan artıq ərazi iddialarına son qoymalı, sülh və əməkdaşlıq yolunu seçməlidir. Azərbaycan bu əməkdaşlığa hazırdır. Bununla belə, bir rəy yaratmaq istəyirlər ki, guya bu münaqişədə Ermənistandan başqa “Dağlıq Qarabağ” adlı tərəf mövcuddur. Məsələni həm də elə təqdim edirlər ki, sanki Dağlıq Qarabağ adlı ərazi bölgüsü, ərazi ancaq ermənilərə aiddir. “Dağlıq Qarabağ”da erməni icması məsələsinin qabardılması da yanlışdır və mənafeyimizə uyğun deyil. İcmanın olması məsələsinin də qoyulması mövqeyimizi zəiflədir. Biz fikir veririk ki, həmin termin daha çox Rusiyanın rəsmi dairələri tərəfindən səslənir. Təsadüfi ola bilməz. Yaxşı olardı ki, bizim rəsmi qurumlar məsələni konkret qoysunlar. Həmin adla təqdimatların olacağı görüşlərdə iştirakdan imtina etsinlər. Çünki bu, Azərbaycanın ərazi bütövlüyünə hörmətsizlikdir”.
Məhəmmədəli QƏRİBLİ
