Ermənistan hazırda Azərbaycanda saxlanılan 45 nəfər diversantı “hərbi əsir” kimi qələmə verərək, onların ətrafında beynəlxalq miqyasda müəyyən oyunlar qurur, başqalarını da bu oyunlara qoşmaqda israrlı olduğunu göstərir.
Ermənistan müharibədən sonra Azərbaycan ərazisinə soxularaq burada terror törətməyə cəhd edən, lakin hərbiçilərimiz tərəfindən zərərsizləşdirilərək həbs edilən təxribatçıları Birləşmiş Millətlər Təşkilatının (BMT) Beynəlxalq Ədalət Məhkəməsində (Haaqa məhkəməsi) “hərbi əsir” kimi qələmə verərək onlara “ədalət” istəyir. Ermənistan qondarma “hərbi əsir” şousu ilə bağlı sözügedən məhkəmədə Azərbaycana qarşı iddia da qaldırıb. “Armenpress”in yaydığı məlumata görə, hətta proses keçirilib də. Bu məhkəmə prosesində o qədər uydurma, yalan dolu məsələlərdən bəhs edilib ki, adam məəttəl qalır. Məhkəmənin spikeri iddia edib ki, Ermənistan tərəfin təqdim etdiyi “dəlillərə əsasən” Azərbaycan 9-10 noyabr üçtərəfli bəyanatın “şərtlərini pozur”, 45 “erməni əsir”ini geri qaytarmır.
Məhkəmədə Ermənistan daha bir ağ yalanla beynəlxalq hüququn başına kül ələyib. Əsassız olaraq iddia ediblər ki, Azərbaycan hərbçiləri tərəfindən “hərbi əsir”lərin (diversantların) tutulduğu iki kənd (Azərbaycanın Çaylaqqaya ( Xtsaberd) və Köhnə Tağlar (Hin Tağlar) guya Rusiya sülhməramlılarının nəzarətinə verilməli olan kəndlər imiş. Ermənistanın yeni versiyası doğrudan gülməli və əcaibdir. Yeni versiyalarında iddia edirlər ki, guya 9-10 noyabr razılaşmalarına görə həmin bu iki kənddən Ermənistan silahlı qüvvələri çıxmalı deyilmiş, orada qalmalı imişlər (?) Guya Azərbaycan tərəfi oradakı “əsgərləri əsir” götürüb. Ermənistan 62 nəfərin (indi onlardan 45 nəfəri Azərbaycandadır) diversant olduğunu pərdələmək, gizlətmək üçün bu iki kənd oyununu ortaya atıb.
Ekspertlər bildirdi ki, bu, beynəlxalq məhkəməni aldatmaq üçün Ermənistanın yeni şousudur. Onların fikrincə, Ermənistan və dünyadakı ermənipərəst ölkələrin, beynəlxalq təşkilatların “hərbi əsirlər”lə bağlı Azərbaycana etdiyi təzyiqlər heç bir effekt vermədiyi üçün Ermənistan indi də bu yalanı ortaya atır. Sözügedən kəndlərin Azərbaycan kəndləri olduğu və onlar barədə üçtərəfli bəyanatda hər hansı bir ifadə olmadığını deyən ekspertlərin sözlərinə görə, Ermənistanın iki kənd şousu yeni meydana çıxıb.
“...Ermənistan özünü yenə də dolaşdırır”
Siyasi şərhçi Azər Həsrət bizimlə söhbətində bildirdi ki, Ermənistanın yeni saxta və mifoloji iddiası gözlənilməz deyildi və bu ölkənin bizə qarşı istənilən iftiranı atması da hər zaman olur: “Çünki biz onlardan hər cür yalan, böhtan, fırıldaq görmüşük və gözləyirik də. Təbii ki, müharibədə biabırcasına uduzduqdan sonra Ermənistan Azərbaycanı gözdən salmaq üçün hər cür əmələ əl atır, bu zaman da yalandan, böhtandan gen-bol istifadə edirlər. Söhbət Ermənistanın iddia etdiyi kimi o iki kəndin statusundan və “hərbi əsir”lərin oradan tutulmasından gedirsə, Ermənistan özünü yenə də dolaşdırır.
Çünki Azərbaycan hərbçilərinin tutduğu diversantlar Ermənistan vətəndaşlarıdır, onlar Qarabağda yaşayan sakinlər deyildilər. Üstəlik də, o diversantlar hərbi geyimdə Azərbaycan əsgərlərinə hücum ediblər və bizim əsgərlərimizi öldürüblər, nəticədə də həbs ediliblər. Düşünürəm ki, Ermənistanın bu iddiası və sonradan quraşdırdığı bu variant beynəlxalq hüquq müstəvisində onun öz əleyhinə işləyəcək. Hesab edirəm ki, Azərbaycanın nümayəndəsi də həmin məhkəmədə öz dəlillərini təqdim edəcək və gerçəkliyi üzə çıxaracaq. O ki qaldı kəndlər məsələsinə, Azərbaycan həqiqətən də, 10 noyabr bəyanatında deyildiyi kimi harada idisə orada da dayanıb, nə irəli gedib, nə geri çəkilib. Bu da bəyanatın tələblərindən biri idi. Bununla bağlı Azərbaycan, Ermənistan və Rusiya razılaşmışdı. Ermənistanın Azərbaycana qarşı qaldırdığı əsassız məhkəmə prosesi heç nəyi dəyişən deyil. Biz, sadəcə olaraq, işimizi möhkəm tutmalıyıq, bunu faktlarla beynəlxalq ictimaiyyətə sübut etməliyik”-deyə bildirən A.Həsrətin sözlərinə görə, Ermənistanın şər-böhtan kampaniyası heç zaman effekt verməyəcək.
İradə SARIYEVA
