Tiflisdə eks-prezident Mixeil Saakaşvilinin azadlığa buraxılması tələbi ilə keçirilən kütləvi mitinq başa çatıb. Aksiya zamanı heç bir insident qeydə alınmayıb.
"Vahid Milli Hərəkat" partiyasının lideri Nika Melia etiraz aksiyasının minlərlə iştirakçısına gələcək planlarından danışıb. Qeyd edək ki, aksiya Gürcüstanın keçmiş prezidenti Mixeil Saakaşvilinin həbsdən azad edilməsi tələbi ilə keçirilib. Üçüncü prezident oktyabrın 1-də saxlanılıb. Həmin vaxtdan bəri Saakaşvili özünü siyasi məhbus adlandıraraq aclıq aksiyası keçirir. Mitinqdə Saakaşvilinin iştirakçılara müraciət məktubu oxunub. Məktubu eks-prezidentin vəkili Nika Qvaramiya oxuyub: "Əgər biz sivil ölkə istəyiriksə, böyük barışığa getməliyik və revanşı, qisası unutmalıyıq. İstər ölkə daxilində, istər xaricdə, istər həbsxanada, istərsə də azadlıqda olmağımızdan asılı olmayaraq, hamımız birləşməliyik. İndi nə partiya, nə də başqa bir prinsipə görə bölünmə zamanı deyil. Gürcüstanı xilas etməyin vaxtıdır və bu gün birlik zamanıdır". M.Saakaşvili Gürcüstana niyə döndüyünü də izah edib: “Mənə hətta yaxın olan Ukraynada xoşbəxt ola bilmirəm. Sevimli vətənimdə bu qədər amansızlıq və fəlakətlər gördüyüm zaman mən başqa yerdə ola bilmərəm”. Siyasətçinin sözlərinə görə, Gürcüstanı Qərb yoluna qaytarmaq lazımdır: “Biz bir yerdə Gürcüstanı demokratiya, islahatlar və inkişaf mayakına çevirməliyik. Gürcüstanı azad və xilas etmək zamanı artıq yetişib. Bu gün birliyə daha çox ehtiyac var”.
Politoloq Yeganə Hacıyeva “Bakı-Xəbər”ə açıqlamasında bildirdi ki, proseslərin belə inkişafı gözlənilən idi: “Sadə gürcülərin yaddaşında Saakaşvili rüşvəti yığışdıran bir prezident kimi qalıb. Həm də ölkənin iqtisadiyyatını inkişaf etdirmişdi. Saakaşvilinin hakimiyyətdə olmadığı dönəmdə vəziyyət dəyişib. Vətəndaşlarda Saakaşvili dönəmi ilə bağlı bir nostalji hissi var. Amma hər nə qədər yaxşı olsa da, həm də Gürcüstan torpaqlarını uduzan prezident kimi xatırlanır. Onun Gürcüstanın ərazi bütövlüyünü təmin etmək istiqamətində atdığı addımlar ölkənin digər ərazilərinin də itirilməsi ilə nəticələnib. Gürcüstanda 10 minlərlə insanın küçəyə çıxmasının həm də günahsız insanı qorumaq kimi psixoloji məqamları da var. Saakaşvilinin hakimiyyətə gəlmək şansı var. Gürcü xalqı dəyişikliyə meyllidir. Buna görə də daima etiraz edirlər. Gürcüstanda hakimiyyətin dəyişməsini istəyən xarici qüvvələr xalqın bu keyfiyyətlərindən yetərincə istifadə edir. Bir çox hallarda isə bu nəticə də verir. Saakaşvili Gürcüstanda prezident olanda daha çox transmilli korporasiyaların sifarişlırini icra edən ölkə rəhbəri kimi yadda qalıb. Sıravi vətəndaş bunun fərqinə varmır, onun yadında qalan həyatları ilə bağlı mıqamlardı. Saakaşvili Gürcüstanda həm də inqilabların hərəkətverici qüvvəsi kimi tanınır. Buna görə də xaric bu amildən yaxşı istifadə edə bilir. Ancaq Ukrayna təcrübəsi göstərdi ki, inqilab yalnız fərdi liderlərə bağlı deyil, həm də xalqların milli xüsiyyətinə bağlı olan məsələdir. Saakaşvili hazırda dilemma qarşısındadır. Ya hakimiyyətə gəlməlidir, ya da siyasətdən birdəfəlik getməlidir. Saakaşvilinin yenidən hakimiyyətə gəlməsi Azərbaycanla münasibətlərə pis mənada təsir etməyəcək. Gürcüstanda yaşayan soydaşlarımız Saakaşvilinin hakimiyyətə gəlməsini daha çox istəyir. Ancaq region üçün müəyyən dəyişikliklər yarada bilər. 44 günlük müharibədən sonra Azərbaycan yeni reallıqlar yaradıb. ABŞ və Qərb onların maraqlarını ifadə edən bir şəxsi Gürcüstanda hakimiyyətə gətirməyə çalışır ki, Cənubi Qafqazdakı maraqlarını tam əldən verməsinlər. Qısası, Saakşvilinin hakimiyyətə gəlmək şansı var və bunun Azərbaycanla münasibətlərə pis mənada heç bir təsiri olmayacaq”.
Məhəmmədəli QƏRİBLİ
