Məlum olduğu kimi, BMT-nin Beynəlxalq Ədalət Məhkəməsində Ermənistanın Azərbaycana qarşı iddiası üzrə dinləmələr başlayıb. BMT Beynəlxalq Ədalət Məhkəməsi oktyabrın 15-də Ermənistanın Azərbaycana qarşı iddiasına dair dinləmələrə başlayıb və bu ölkəyə qarşı müvəqqəti tədbirlərin tətbiq olunmasını tələb edib.
Ermənistan məhkəmədən Bakıdakı sözdə kubok parkının bağlanması, erməni hərbi əsirlərin və dinc əhalinin geri qaytarılması da daxil olmaqla bir sıra təcili tədbirlərin görülməsini istəyib.
Ermənilər BMT Beynəlxalq Ədalət Məhkəməsi qarşısında məsələ qoyublar ki, Bakıdakı Hərbi Qənimətlər Parkının bağlanması barədə qərar versin.
Qeyd edək ki, hərbi qənimətlərdən istədiyi səviyyədə istifadə etmək qalib ölkənin haqqıdır.
“Belə fantaziyası olan millətin dünyada normal qəbul edilən təcrübənin əngəllənməsi üçün çağırış etməsi təəccüblü deyil”
Ermənilərin məlum istəyi ilə bağlı fikir bildirən siyasi şərhçi Azər Həsrət “Bakı-Xəbər”ə açıqlamasında qeyd etdi ki, ermənilərin fantaziyası sərhəd tanımır: “Bu millət bütün dövrlərdə öz istəkləri ilə dünyanı özlərinə güldürüb. Onların əsassız iddialarından biri də dənizdən dənizə böyük Ermənistan yaratmaq istəkləridir. Belə fantaziyası olan millətin dünyada normal qəbul edilən təcrübənin əngəllənməsi üçün çağırış etməsi təəccüblü deyil. Məlumat üçün bildirim ki, ötən əsrin əvvəlində 300 min erməninin bu və ya digər formada həlak olduğu bilindiyi halda, onlar illər sonra bu rəqəmi milyon yarıma çıxartdılar. Bütün dünyanı türklərin soyqırım törətdiyinə inandırmağa çalışdılar. Ancaq hər kəs ermənilərin yalan məlumat yaydığını bilirdi. Bu səbəbdən də ermənilərin BMT Beynəlxalq Ədalət Məhkəməsi qarşısında Hərbi Qənimətlər Parkının bağlanması haqqında məsələ qaldırması bizi təəccübləndirmir. Halbuki, bütün dünya ölkələrində, xüsusilə də aparıcı Qərb ölkələrində bu tip muzeylər var”.
Həmsöhbətimiz onu da əlavə etdi ki, Ermənistanın özündə dünyanı dəhşətə gətirəcək heykəl var: “Bu ölkə Azərbaycana qarşı iddia irəli sürməzdən öncə həmin heykələ baxsınlar. Erməni terrorçusunun türk diplomatının kəsilmiş başını ayağının altına qoyduğu halda heykəli ucaldılıb. Ermənistan hər hansı bir tələb irəli sürməzdən öncə özlərində olan heykələ fikir versinlər”.
Günel CƏLİLOVA
