Qarabağda yaşayan ermənilərə ödənilən 68 min dram (140 dollar) müavinətin verilməsi dayandırılıb. Erməni mənbələrinin verdiyi məlumata görə, bu barədə İrəvandakı QHT-lər məlumat yayıb. Məlumatda deyilir ki, hökumət yeni ilin büdcəsində Qarabağda yaşayan ermənilər üçün aylıq müavinəti 25 min drama (50 dollara) endirib. Rəsmi qurumlar müavinət və yardımların dayandırılmasının səbəbini açıqlamayıb.
QHT nümayəndələri bildirir ki, hazırda hökumət rəsmiləri 25 min dram məsələsini müzakirə etsələr də, onun nə zaman veriləcəyi barədə heç nə demirlər: "İndi 25 min dramdan danışırlar. Hesablamalar apardılarmı? İstehlak səbəti ilə tanışsınızmı?”
İrəvanda fəaliyyət göstərən qondarma "Hadrut Uğrunda” adlı təşkilatın rəhbəri Levon Hayıryan isə deyib ki, hazırda 168 min dram aylıq müavinət verilsə belə, problemi həll etmək mümkün deyil. Onun sözlərinə görə, məsələ siyasi qərarla həllini tapmalıdır.
Qeyd edilənə görə, Ermənistan hökuməti Qarabağdakı ermənilərin mənzil, tikinti, pensiya və kommunal xərclərinin qarşılanması məqsədilə 120 milyon dollar pul ayırıb. Bir ildir ödənilən həmin vəsaitin yeni ildən dayandırlması qərarlaşdırılıb.
“Ermənistan höküməti Xankəndidə və onun ətrafında yaşayan erməniləri saxlamağa iqtisadi gücü olmadığını ortaya qoyur və real vəziyyətini göstərir”
“Müasir İnkişaf” Birliyinin rəhbəri Mübariz Göyüşlü hesab edir ki, bu faktı iki tərəfdən şərh etmək olar. M.Göyüşlünün sözlərinə görə, birinci tərəfdən, Ermənistan artıq reallıqla barışır və Qarabağda yaşayan ermənilərin Azərbaycan vətəndaşı olduqlarını qəbul edir: “Görünən odur ki, Ermənistan artıq başqa ölkənin vətəndaşlarına pul ayırmaq istəmir. Paşinyan hakimiyyəti reallıqla barışır, qəbul edir ki, Qarabağda yaşayan ermənilər Azərbaycan vətəndaşlarıdır. Onlar artıq qəbul edirlər ki, Qarabağda yaşayan 25 min nəfər erməninin Ermənistana heç bir aidiyyəti yoxdur, onlar Azərbaycan vətəndaşlığını daşımalıdır, Azərbaycan bayrağının altında, Azərbaycan dövlətinin qayda-qanunları çərçivəsində yaşamalıdırlar. Ermənistan hökümətinin son davranışlarından görmək olur ki, ermənilərin yaşadığı ərazidə Azərbaycan qanunlarına, konstitusiyasına tabe olmalı olduqları reallığı ilə barışırlar.
Eyni zamanda da Ermənistan höküməti Xankəndidə və onun ətrafında yaşayan erməniləri saxlamağa iqtisadi gücü olmadığını ortaya qoyur və real vəziyyətini göstərir”.
M.Göyüşlünün sözlərinə görə, Paşinyan hökumətinin Qarabağ ermənilərinin yardımını kəsməsindən həm də bu qənaətə gəlmək olar ki, artıq sülh danışıqlarına bir addım yaxınlaşırlar, sülh müqaviləsi bağlanmasını istəyirlər. M.Göyüşlü dedi ki, hazırda Xankəndidə və onun ətrafında yaşayan ermənilər separatizmdən əl çəkməlidir, çünki Azərbaycan ərazilərində yaşayırlar. Onlar dərk etməlidirlər ki, bizim vətəndaşlardır, olacaqlar da. Onların Azərbaycan qanunlarına uyğun yaşayacaqlarını deyən M.Göyüşlü hesab edir ki, gec-tez bu belə də olacaq. “Onların Azərbaycan vətəndaşı olmaq üstünlükləri və vətəndaş məsuliyyətləri olmalıdır və olacaq da. Özünü saxlaya və öz probelmlərini həll edə bilməyən Ermənistanın Xankəndidəki ermənilərə hansısa yardımlar vermək, onları saxlamaq imkanı da ola bilməz. Görünür, son dövrə qədər verilən vəsait hansısa xaricdəki erməni fondundan gəlirmiş, indi də o fond maliyyəni kəsib. Ermənistanın iqtisadi gücü hardadır ki... Nə qədər gec deyil, Xankəndidə və ətrafında yaşayan ermənilər Azərbaycan dövlətinə vətəndaşlıqla bağlı müraciət etməlidirlər. Onlar reallıqları qəbul etdiklərini etiraf edib, separatçılıq oyunlarından, rus sülhməramlılarının əlinə baxmaqdan əl çəkməlidirlər”-deyə M.Göyüşlü bildirdi.
İradə SARIYEVA
