Erməni lobbisinin təsiri altında olan Avropa ölkələrindən biri də Hollandiyadır. Bu səbəbdən illərdir Hollandiya hakimiyyəti erməni lobbisinin təsirindən çıxa bilmir. Zaman-zaman Azərbaycana münasibətdə qərəzli mövqe sərgiləyir. Görünən odur ki, hələ də bununla bağlı xoşəgəlməz məqamlar qalmaqdadır.
Bu arada Hollandiya xarici işlər naziri səlahiyyətlərini icra edən Ben Knapen həbsdə saxlanılan erməni diversantlara qahmar çıxıb. O, ermənilərə xoş olsun deyə, diversantları hərbi əsir kimi təqdim edib və eyni zamanda onların işinə baxan hakimləri, prokurorları hədəf alıb. Knapen qeyd edib ki, həmin azərbaycanlı hakim və prokurorların, Hollandiya Sülh və Demokratiya İnstitutu da daxil olmaqla, bir qrup qeyri-hökumət təşkilatı (QHT) tərəfindən qara siyahıya salınmasından xəbərdardır. O iddia edib ki, Azərbaycan məhkumlarla rəftar və saxlanma şəraiti ilə əlaqədar beynəlxalq öhdəliklər götürsə də, onlara əməl etmir: “Müxtəlif mənbələr Azərbaycandakı həbsxanaların beynəlxalq standartlara cavab vermədiyini göstərir. Ümumiyyətlə, Azərbaycanda məhkəmə prosesinin müstəqilliyi və qanunun aliliyi şübhə doğurur”.
Ən nəhayət, B.Knapen bir az da irəli gedərək bəyan edib ki, diversantlar dərhal azad edilməlidir. Eyni zamanda, sözügedən məsələni Avrapa İttifaqının gündəliyində saxlayacağına söz verib.
“Müharibə zamanı Azərbaycanın əldə etdiyi qələbələrdən ən çox narahat olan ölkələrdən biri də məhz Hollandiya olub”
Sözügedən məsələ ilə bağlı fikirlərini “Bakı-Xəbər”lə bölüşən Yeni Yol Partiyasının sədri Ramil Hüseynov dedi ki, Hollandiya hakimiyyətinin aşırı ermənipərəst mövqedən çıxış etməsi yeni deyil: “Ermənilərin Avropada Fransadan sonra ən güclü formada təşkilatlanan lobbisi Hollandiyada yerləşib. Bu səbəbdən Hollandiya qondarma “erməni soyqırımı”nın tanınmasında xüsusi canfəşanlıq göstərir. Dəfələrlə Türkiyə və Azərbaycanı hədəf alan açıqlamalarla çıxış ediblər. 44 günlük İkinci Qarabağ müharibəsi zamanı Azərbaycanın əldə etdiyi qələbələrdən ən çox narahat olan ölkələrdən biri də məhz Hollandiya olub. İlk əvvəl onlar Azərbaycanın belə möhtəşəm qələbə qazanacağını gözləmirdilər. Sonra proseslərin fərqli istiqamətdə inkişaf etdiyini gördükdə narahat olmağa başladılar. Müharibə dövründə müxtəlif vasitələrlə buna əngəl olmağa çalışsalar da nəyəsə nail ola bilmədilər. Təəssüf doğuran məqam həm də ondan ibarətdir ki, Azərbaycan Avropanın qaz bazarının şaxələndirilməsinə töhvə verməsinə rəğmən, bir sıra ölkələr, o cümlədən Hollandiya bunu nəzərə almır. Halbuki, Azərbaycan yaxın perspektivdə həm də Türkmənistan qazının Avropa bazarına çatdırılmasında əsas körpü rolunu oynayacaq. Erməni lobbisi Hollandiya hakimiyyətinin gözünü o qədər kor edib ki, onlar həqiqətləri görmək istəmir. Heç şübhəsiz, Hollandiya hakimiyyət rəsmiləri erməni lobbisinin təsirindən çıxsaydılar, vəziyyət tamam başqa cür olardı”.
Partiya sədri hesab edir ki, Azərbaycan diplomatik müstəvidə Hollandiya ilə münasibətlərin keyfiyyətcə yeni müstəviyə daxil olması ilə bağlı səylərini artırmalıdır.
Vidadi ORDAHALLI
