Oktyabrın 13-ü saat 14:00 radələrində Kəlbəcər rayonu ərazisində mülki infrastrukturun tikintisi məqsədilə Tərtər rayonunun Suqovuşan qəsəbəsindən Kəlbəcər rayonu istiqamətində hərəkət edən və qeyri-hərbi yükləri daşıyan avtomobil karvanı Qozlukörpü yaşayış məntəqəsi yaxınlığında qanunsuz erməni silahlı dəstələri tərəfindən atəşə məruz qalıb.
Müdafiə Nazirliyindən verilən məlumata görə, atəş nəticəsində kolonun önündə hərəkət edən Azərbaycan Respublikası Silahlı Qüvvələrinin Hərbi Polisinin Hərbi Avtomobil Müfəttişliyinin “NİVA” markalı avtomobilinin ön, arxa hissəsi, təkəri və hərəkət mexanizmləri zədələnib. Xoşbəxtlikdən ölən və yaralanan yoxdur: “Azad olunmuş ərazilərdə mülki infrastrukturun bərpa edilməsi üçün Rusiya sülhməramlılarının müşayiəti ilə hərəkət edən mülki təyinatlı avtomobil karvanının qanunsuz erməni silahlı dəstələri tərəfindən atəşə tutulması yolverilməzdir. Bu insidentin araşdırılması üçün Azərbaycan Respublikasının Qarabağ İqtisadi Rayonunun müəyyən hissəsində müvəqqəti olaraq yerləşdirilmiş Rusiya sülhməramlı qüvvələrinin komandanlığına və Rusiya-Türkiyə Birgə Monitorinq Mərkəzinə müraciət edilib”.
Maraqlıdır ki, qanunsuz erməni silahlı dəstələrinin Qarabağda fəallaşması Moskvada üç ölkə dini liderinin görüşündən dərhal sonraya təsadüf edir. Bu iki hadisə arasında hansısa qanunauyğunluq ola bilərmi?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Moskvada Danilov monastırında Moskva və Bütün Rusiyanın Patriarxı Kirillin iştirakı ilə bütün ermənilərin Katolikosu II Qaregin və Qafqaz Müsəlmanları İdarəsinin sədri, Şeyxülislam Allahşükür Paşazadənin görüşü keçirilib: “Həmin görüşdən dərhal sonra erməni silahlılarının bizim mülki qurumların nümayəndələrini atəşə tutması təsadüf deyil. Çünki biz erməni xislətinə uzun illərdi yaxşı bələdik. Onlar hər zaman mühüm görüşlər ərəfəsində belə fəallaşırlar. İşğal dönəmini dərindən təhlil etsək, bunun təsadüf olmadığı qənaətinə bir daha gəlmiş olarıq. Həmin vaxtlarda da ermənilər Azərbaycanın ev sahibliyi etdiyi mühüm tədbirlər zamanı belə təxribatlara əl atırdılar. O vaxt etdiklərində güddükləri məqsəd bəlliydi. İstəyirdilər ki, dünyanın gözündə Azərbaycanı təhlükəsizliyi zəif olan ölkə kimi qələmə versinlər. Bəs indi hansı niyyətləri var? Məlumdur ki, dini liderlərin görüşü humanitar addımların atılması üçün nəzərdə tutulur. Ermənilərə isə bu sərf etmir. Belə olan təqdirdə, onlar ilk növbədə minaların xəritəsini verməli, köçkünlərin doğma yurdlarına qayıdışını təmin etməlidirlər. Ermənilər isə bütün dünyaya göstərmək istəyir ki, münaqişə bitməyib, gərginlik hökm sürür. Bu təzyiqi də orada yaşayan ermənilərin statusu məsələsini gündəmə gətirmək üçün edirlər. Ancaq hesab edirəm ki, Azərbayan buna lazımi reaksiya verməlidir. Artıq zaman fərqlidir. Hazırda bütün üstünlük Azərbaycanın tərəfindədir. Qarabağdakı hərbi vəziyyət də bizim üstünlüyümüzü şərtləndirir. Çox maraqlıdır ki, atəşkəsə nəzarət edən Monitorinq Mərkəzi bu məsələyə reaksiya vermir. Onlar kəskin şəkildə ermənilərin addımını qınamalıdır. Əgər bu cür təxribatlarla da bağlı onların başına sığal çəkiləcəksə, Azərbaycanın özü hərbi gücü ilə həmin təxribaçıları yerində oturtmaq istiqamətində addımlar atmalı olacaq. Görünür, Qarabağın ermənilər yaşayan hissəsində qərarlaşan terrorçu qalıqları ilə bağlı antiterror əməliyytalarını keçirməyin zamanı çoxdan çatıb”.
Məhəmmədəli QƏRİBLİ
