Çinin Benbu şəhərində Tayhu Dünya Mədəniyyət Forumunun 6-cı illik konfransı başlayıb. Çində mədəniyyət sahəsində ən böyük tədbir olmaqla yanaşı, dünyada da bu istiqamətdə nüfuzlu müzakirə platformalarından olan Tayhu Forumunun builki devizi “Sivilizasiyaların qarşılıqlı öyrənilməsi: bəşəriyyət üçün birgə gələcəyin qurulması”dır. Forumun tarixində ilk dəfədir bir dövlət – Azərbaycan “Fəxri qonaq ölkə” statusunda iştirak edir.
Prezidentin köməkçisi Anar Ələkbərov açılış mərasimində Azərbaycan Prezidenti İlham Əliyevin Tayhu Dünya Mədəniyyət Forumunun 6-cı illik konfransının iştirakçılarına müraciətini çatdırıb. Müraciətdə Prezident bir sıra məsələlərə toxunub. Qeyd olunub ki, indiki həssas dönəmdə belə müzakirələrin aparılmasına ciddi ehtiyac var: “Dünyanın indiki həssas və təlatümlü dövründə “Sivilizasiyalararası dialoq: bəşəriyyət üçün ortaq gələcəkli cəmiyyətin birgə qurulması” mövzusunun müzakirəsinə ciddi ehtiyac vardır. Xüsusilə dünyanı cənginə almış COVID-19 pandemiyasının yaratdığı mürəkkəb vəziyyət və bəşəriyyətin qarşılaşdığı çağırışlar sivilizasiyalararası dialoqun və qarşılıqlı dəstəyin nə qədər vacib olduğunu bir daha təsdiqləyir. Azərbaycanda dövlət siyasətinin əsas prioritetlərindən biri də multikulturalizmdir. Multikulturalizm xalqımızın həyat və yaşam tərzini özündə əks etdirən mühüm dəyərlərdəndir. Məhz bu səbəbdən müxtəlif mədəniyyətlərin nümayəndələrinin bir araya gəlməsini və qlobal problemlərin həlli istiqamətində müzakirələri vacib sayır və Tayhu Forumunun builki toplantısı çərçivəsində də bu məsələlərin diqqət mərkəzində saxlanılacağına inanırıq”.
Bütövlükdə, Azərbaycanın sözügedən tədbirə qatılmasını, prezidentin müraciətində yer alan məqamları ekspertlər necə dəyərləndirir?
“Prezident İlham Əliyev müraciətində dünya üçün vacib olan bir sıra məsələlərə toxunub”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, Azərbaycanın belə bir mötəbər tədbirdə iştirak etməsi çox müsbət haldır: “Əvvəla qeyd edim ki, Tayhu Dünya Mədəniyyət Forumu Çin hökumətinin dəstəyi ilə 2008-ci ildə yaradılıb. 2011-ci ildən illik iclasları keçirilməyə başlanılıb. Forumda dünyanın bir çox ölkələrindən görkəmli siyasətçilər, ekspertlər, mütəxəssislər, iş adamları iştirak edir. Tədbirdə müxtəlif məsələlər - iqtisadi, mədəni, ekoloji xarakterli mövzular müzakirə olunur. Bir sözlə, dünyanı narahat edən məsələlərin birgə həlli ilə bağlı çağırışlar səsləndirilir. Forumun müxtəlif bölmə iclaslarında mədəni müxtəlifliyin təşviqi, “Bir kəmər, bir yol” sivilizasiyasının keçmişi və gələcəyi, iqlim dəyişikliyinə qarşı birgə mübarizə, yoxsulluğun azaldılması, bəşəriyyət üçün birgə gələcəyin qurulmasında elm və texnologiyanın dəstəyi mövzuları müzakirə olunur. Belə bir mötəbər tədbirdə Azərbaycanın iştirakı önəmli məsələdir. Bu bir daha ölkəmizin bəşəri dəyərlərə xüsusi önəm verməsinin göstəricisidir. Zatən Azərbaycan Prezidentinin müraciətində bununla bağlı məqamlar öz əksini tapıb. Çünki Prezident İlham Əliyev müraciətində dünya üçün vacib olan bir sıra məsələlərə toxunub. Azərbaycan multikultural dəyərlərə önəm verən ölkə olaraq, yaranan problemlərin birgə həllinə xüsusi önəm verir. Eyni zamanda, zaman-zaman bir sıra beynəlxalq tədbirlərə ev sahibliyi edərək bu işə öz töhfəsini verib”.
Bir sözlə, ekspert hesab edir ki, sözügedən tədbirdə ölkəmizin iştirak etməsi Azərbaycanın beynəlxalq nüfuzunu artıracaq.
Vidadi ORDAHALLI
