Rusiya prezidenti Vladimir Putin və Ermənistanın baş naziri Nikol Paşinyan arasında görüş baş tutdu. Rusiya mediasının verdiyi məlumata görə, görüşün protokol hissəsində V.Putin və N.Paşinyan çıxış ediblər.
Rusiya prezidenti N.Paşinyanla mütəmadi telefon danışıqları apardığını vurğulayıb: “Əlbəttə, şəxsi görüşlər hər zaman məhsuldar keçir. Ümid edirəm ki, bu dəfə də belə olacaq. Formal və qeyri-formal danışıqlar aparacaq, birlikdə nahar edəcək və mövcud məsələləri müzakirə edəcəyik”.
V.Putin Rusiya-Ermənistan əməkdaşlığına dair əsas məsələləri, eləcə də regionda vəziyyətin nizamlanması barədə fikir mübadiləsi aparacaqlarını da vurğulayıb.
Öz növbəsində, N.Paşinyan çıxışında Rusiya prezidenti ilə dördüncü dəfə görüşdüyünü xatırladıb: “Bu bizim münasibətlərin yüksək dinamikasından xəbər verir. Regionda, ümumilikdə dünyada dinamik proseslər gedir. Çox vacibdir ki, müttəfiqlər tez-tez görüşsünlər, danışsınlar”.
Paşinyan qeyd edib ki, hələlik regionda vəziyyətin tam sabitləşməsindən danışmaq olmaz. Baş nazir əlavə edib ki, regionun təhlükəsizliyinin təmin olunmasında Rusiya açar rolunu oynayır: “Rusiya ATƏT-in Minsk Qrupunun həmsədridir. Əlbəttə ki, bütün bunlar vacib məsələlərdir”.
Prezident Vladimir Putinin Nikol Paşinyanla əsas müzakirə mövzusu üçtərəfli bəyanatların icrası, demarkasiya və delimitasiya məsələləri, o cümlədən Türkiyənin təklif etdiyi “3+3” formatıdır.
Əksər ekspertlər hesab edir ki, Putin-Paşinyan görüşünün əsas məğzi Qarabağ məsələsilə bağlı olub. Ehtimal edilir ki, Paşinyan Moskvaya məhz üzərinə götürdüyü öhdəlikləri yerinə yetirməyə məcbur edilmək üçün dəvət olunub. İki ölkə başçısının Moskva görüşündən hansı nəticələri çıxarmaq olar?
Politoloq Rəşad Bayramov “ Bakı-Xəbər” ə deyib ki, prezident Vladimir Putinin Nikol Paşinyanla əsas müzakirə mövzusu üçtərəfli bəyanatların icrası, demarkasiya və delimitasiya məsələləri, o cümlədən Türkiyənin təklif etdiyi “3+3” formatı olub: “Türkiyə Prezidenti Ərdoğan hələ 2008-ci ildə belə bir təşəbbüslə çıxış etmişdi, sadəcə, o vaxt bu, “Qafqaz platforması” adlanırdı. O vaxt bu təşəbbüsə Rusiya o qədər də aktiv reaksiya vermədi.
Ancaq İkinci Qarabağ savaşından sonra Cənubi Qafqazda geosiyasi konfiqurasiya dəyişdi, AB və ABŞ-ın regionda rolu zəiflədi, əvəzində Türkiyənin mövqeyi gücləndi. Bunu nəzərə alaraq Rusiyanın da mövqeyinin dəyişdiyini düşünmək olar.
Hazırda çoxsaylı çətin suallar var və onların həlli üçün zaman lazımdır. Əsas demarkasiya və delimitasiya, kommunikasiyaların açılması və Qarabağın “statusu”dur ki, bu mövzular ətrafında mütləq mənada müzakirə aparılıb.
Paşinyanın ikiüzlü siyasət yürütməsinin Qərb dairələri tərəfindən hazırlanması və onun hakimiyyət dövrünün Rusiya əleyhinə dövlət siyasəti halına gətirilməsi heç bir halda Moskvanı qane etmir. Bununla yanaşı, növbədənkənar parlament seçkilərindən sonra Paşinyan antirus əhvalını hələ də aradan qaldırmayıb. Ermənistanda rus dili və Rusiya siyasi sisteminə qarşı güvənsizlik mühiti hələ də davam etdirilir. Həmçinin erməni mətbuatında Rusiyaya nifrət geniş şəkildə təbliğ olunur. Paşinyanın Putinlə növbəti görüşü Ermənistanın bundan sonra atacağı addımlarla bağlı məsləhətləşmə xarakteri də daşıyıb. Diqqət çəkən digər məqam budur ki, Paşinyan görüşdə Rusiyanın təhlükəsizlikdə oynadığı rolu açar adlandırıb və Moskvanı Minsk Qrupu həmsədri kimi təqdim edib. Deməli, Paşinyan həmin formatın aktiv qalmasında daha çox maraqlıdır. Zəngəzur dəhlizi həm də Rusiyanın marağına cavab verir. Düşünürəm ki, bu məqamla bağlı Paşinyana konkret tapşırıq verilib”.
Məhəmmədəli QƏRİBLİ
