Qarabağdan köçmüş ermənilər Irəvandakı Rusiya səfirliyi qarşısında etiraz akisyası keçirib. Bu haqda erməni mediası məlumat yayıb.
Əsasən Hadrutdan köçmüş bir qrup erməni hökumət binası qarşısındakı aksiyadan sonra yürüşlə Rusiya səfirliyi qarşısına gəlib.
Çıxış edənlər indiyədək Fransa səfirinin Qarabağdan köçmüş ermənilərin nümayəndələrini bir neçə dəfə qəbul etdiyini, ABŞ səfiri ilə onlayn görüşdüklərini bildirərək, Rusiya səfirliyinin son bir ildə onların heç bir müraciətinə cavab verməməsindən gileyləniblər.
Ermənilər bildirib ki, Rusiya səfirliyi qarşısına Ağdərədə erməni traktorçunun qətlə yetirilməsinə etirazlarını bildirmək üçün yığışıblar…
“Mənim ağlıma sığışmır ki, Rusiya kimi qüdrətli dövlət necə Azərbaycanın qarşısını ala bilmir… Rusiya Azərbaycan ordusunun Qarabağdakı erməni yaşayış məntəqələrindən azı 3-5 km məsafəyə çəkilməsini tələb etməlidir. Onlar bufer zona yaratmalıdırlar ki, azərbaycanlılar atəş açaraq ermənilərə ziyan vura bilməsin”- deyə səfirlik qarşısında çıxış edən ermənilərdən biri bildirib.
Ermənilərin indiki məqamda belə bir aksiya keçirməsi təsadüfdür, yoxsa burada başqa siyasi maraqlar var?
Politoloq Elşən Mustafayev “Bakı-Xəbər”ə açıqlamasında bildirdi ki, belə hadisələrin olması təsadüf sayıla bilməz: “Aksiyanın hansı başqa hadisələrin fonunda keçirildiyinə diqqət etmək lazımdır.
Ağdərədə erməni Aramın öldürülməsi ilə nəticələnmiş təxribat Paşinyanın Moskva səfəri ərəfəsinə təsadüf edir. Paşinyanın Putinlə görüşü ilə eyni vaxtda isə ermənilər Rusiya səfirliyi qarşısında etiraz aksiyası keçirir. Bütün bunların planlaşdırılmış olduğu qənaətinə gəlmək olar. Bunu Paşinyan hökuməti edir. Məqsəd Rusiyaya təzyiq göstərməkdir. Onlar anlayır ki, Moskva görüşü kritik ola bilər. Putin Paşinyana təzyiq edər ki, üzərinə götürdüyü öhdəliyi yerinə yetirsin. Buna görə də, ermənilər Rusiyanın mümkün təzyiqlərini neytrallaşdırmaq üçün belə addımlar atırlar. Göstərmək istəyirlər ki, hətta Ermənistanda olan qaçqınlar belə, Rusiyanı yox, ABŞ və Fransanı istəyir. Ermənistanın daxilində anti-Rusiya ovqatını qaldırmaq Paşinyanın müharibədən əvvəlki siyasətidir. Çünki o, ABŞ və Qərb xəttinə daha yaxın adamdır. Ancaq mövcud reallıqlar çərçivəsində Rusiya ilə də hesablaşmağa məhkumdur. Hər iki cəbhə ilə oynamaq isə asan deyil. Buna görə də, Paşinyan balans yaratmaqda maraqlıdır. İstəyir ki, ölkəsində anti-Rusiya ovqatının olduğunu Moskvaya təqdim etsin. Bununla da özünə imtiyaz qazansın. Ancaq Moskva yaxşı anlayır ki, ermənilərin bu blefi keçərli deyil. Çünki onun əlində İrəvana təsir etmək üçün daha ciddi rıçaqlar var. Söhbət həm iqtisadi, həm də hərbi-siyasi təsirlərdən gedir”.
Ekspertin sözlərinə görə, həmin görüşün əsas məğzi məhz Qarabağ məsələsilə bağlı olub: “ Bu baxımdan da Moskvanın özünə sərf edən bütün təlimatları Paşinyana verdiyinə və onların icrasını tapşırdığına qəti şübhə yoxdur”.
Məhəmmədəli QƏRİBLİ
