İran XİN sözçüsü Səid Xətibzadə yenə Azərbaycandan danışıb və iddia edib ki, əllərində 44 günlük müharibə başlayan vaxtdan terrorçu qrupların Azərbaycan ərazisinə keçirilməsi ilə bağlı dəlil-sübut, hətta səs yazıları var.
O bunu belə əsaslandırmağa çalışıb: “Terrorçu qruplaşmaların Azərbaycan ərazisinə gətirilməsi ilə bağlı xəbərlərin yayıldığı ilk vaxtdan buna dair əlimizdə faktlar və hətta onların telefon danışıqları var. Habelə, İran kəşfiyyatı onları dəqiq nəzarətdə saxlayır. Biz Azərbaycan tərəfinə bunun bizim üçün qəbuledilməz olduğunu bildirdik və bizə ən yüksək səviyyədə söz verdilər ki, narahatlıqlarımızı aradan qaldıracaqlar”.
Belə görünür ki, İran rəsmiləri lap ağ ediblər. Çünki özü işğalçı Ermənistana hərtərəfli dəstək verməklə Azərbaycan xalqını və dövlətini ən çətin günlərdə - Qarabağ müharibəsində yalnız qoyan İran hökuməti üzdə İslam ümmətindən, birlikdən, dostluqdan, qonşuluqdan və qardaşlıqdan ağızdolusu dəm vursa da, əməldə başqa cür davranır. Bütün bunlar bir daha İran hakimiyyətinin Azərbaycana qarşı riyakarlığını ortaya qoyur. Əvvəllər bu cür sərsəm xarakterli məlumatları Ermənistan və onun havadarları yayırdısa, indi də İran bu kimi uydurma xarakterli məlumatları gündəmə gətirməyə çalışır.
“Bu hansısa bazar arvadının söhbətindən başqa bir şey deyil”
Sözügedən məsələ ilə bağlı fikirlərini “Bakı-Xəbər”lə bölüşən ekspert Azər Həsrətin sözlərinə görə, bütün bunlar onu göstərir ki, İranda hakimiyyətə gələn mühafizəkar komandanın diplomatiyadan xəbəri yoxdur: “İbrahim Rəisi prezident seçiləndən sonra formalaşdırdığı kabinet çox naşıdır. Belə anlaşılır ki, hökumətdə ciddi siyasəti, diplomatiyanı anlamayan adamların sayı çoxalıb. İstər xarici işlər naziri Hüseyn Əmir Abdullahian, istər onun sözçüsü Səid Xətibzadə o qədər qeyri-ciddi fikirlər səsləndirirlər ki, bunların diplomat olmasına adam şübhə edir. Adicə onların sosial mediadakı paylaşımlarına baxanda hiss olunur ki, bunların diplomatiyadan xəbəri yoxdur. Ona görə də indi güya Azərbaycanda terrorçuların, onların səs yazılarının olması ilə bağlı deyilənlər sadəcə cəfəngiyyatdır. Eyni zamanda, onların səsləndirdiyi fikirlər hansısa bazar arvadının söhbətindən başqa bir şey deyil. Yəni o səviyyəli bəsit fikirlərdir. Bu adamlar siyasətdən anlamadıqlarına görə, Azərbaycanla İran arasında münasibətlərin gərginləşməsinə səbəb olacaq açıqlamalar verirlər. Ona görə də İran prezidenti Rəisi bu biabırçılığa son qoymalıdır. Xarici işlər naziri və onun sözçüsü öz işlərinin öhdəsindən gələ bilmirsə, o zaman həmin şəxslər digər diplomatlarla əvəz olunmalıdır. Bu səviyyəli diplomatlarla nəinki İranın, heç bir ölkənin xarici siyasətini normal səviyyədə qurmaq olmaz. Çünki bu, sadəcə biabırçılıqdır”.
Ekspert hesab edir ki, bu cür ritorika İranı uçuruma yuvarlayır.
Vidadi ORDAHALLI
