İran və Səudiyyə Ərəbistanı hər iki ölkədə konsulluqların yenidən açılması barədə razılıq əldə edib. Bu barədə İran mediası diplomatik mənbəyə istinadən məlumat yayıb:
"Konsulluqların işinin bərpası ilə bağlı razılığa əldə edilib", - agentlik onun sözlərindən sitat gətirib. "Düşünürəm ki, yaxın həftələrdə münasibətlərin normallaşdırılması ilə bağlı razılaşma olacaq".
Bir müddət əvvəl İran Xarici İşlər Nazirliyinin sözçüsü Səid Xatibzadə Tehranla Ər-Riyad arasında indiyə qədər beş raund danışıqların keçirildiyini bildirmişdi. Belə kritik situasiyada İranın bu gedişi nə ilə əsaslandırıla bilər?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Səudiyyə Ərəbistanı ilə İran arasındakı danışıqlar İraqın vasitəçiliyi ilə bu ilin aprel ayından başlayıb: “Çoxları bu qənaətə gəlirdi ki, danışıqların heç bir nəticəsi olmayacaq. Çünki iki ölkəninin arasındakı ziddiyyətlər daha dərinə getmişdi. 2015-ci ildən dövlət arasında diplomatik münasibətlər pozulmuşdu. Bu əlaqələrin bərpa olunma ehtimalı çox aşağıydı. Görünən budur ki, hər iki ölkə münasibətləri düzəltmək istiqamətində qəti addımlar atmaq istəyir. Bunun kökündə nə dayanır? Bir neçə il əvvəl onlar Yəməndə qarşı-qarşıya gəliblər. Səudiyyə Ərəbistanının ətrafında olan ərəb koalisiyası hakimiyyəti, İran isə müxalif qüvvələri müdafiə edib. Təbiidir ki, hər iki ölkə bu işə çox böyük iqtisadi potensial cəlb edirdi. Görünür anlayırlar ki, müəyyən razılığa gəlinməlidir. Güman edirəm ki, bu məsələdə İran güzəştə gedəcək. Bu ilin əvvəlindən İranla ABŞ arasında Tehranın nüvə proqramı ilə bağlı danışıqların bərpa ediləcəyinə dair ümidlər yaranıb. İran rəhbərliyi bəyanat verdi ki, ABŞ sanksiyaları götürsə, onlar danışıqları bərpa etməyə hazırdır. Bayden də bu təklifə müsbət reaksiya verdi. Görünür, İran güman edir ki, Səudiyyə Ərəbistanı həm də ABŞ-la münasibətlərin düzəldilməsi kontekstində onlara yardımçı ola bilər. Məlumdur ki, hazırda Türkiyə ilə Səudiyyə Ərəbistanı arasında da müəyyən gərginlik yaşanır. Ərəb jurnalistin Türkiyədə qətlə yetirilməsindən sonra bu münasibətlər daha da pisləşib. Türkiyə ilə Səudiyyə Ərəbistanı da münasibətləri düzəltmək istiqamətində müəyyən addımlar atır. Regionda təklənmiş vəziyyətə düşən İran özündən iqtisadi cəhətdən qat-qat güclü olan Səudiyyə Ərəbistanı ilə münasibətləri normal məcraya salmaqda çox maraqlıdır. İran son zamanlar iqtisadi vəziyyətini düzəltməyə çalışır. Bu yaxınlarda Şanxay Əməkdaşlıq Təşkikatına üzv oldu. İndi də ərəb dünyası ilə yaxınlaşmaq yolunu tutub. Azərbaycanla bağlı atdığı ağılsız addımlar onun Pakistan və Türkiyə ilə münasibətlərini də korlamış olub. Belə bir dağınıq siyasətə görə İran çıxılmaz vəziyyətdə qalıb. Hesab edirəm, İran rəhbərliyi anlamalıdır ki, öz real gücünə uyğun addımlar atmalıdır. Dünyanın iqtisadi cəhətdən inkişaf edən ölkələrinin sıralamasında heç ilk 20-liyə düşə bilməyən İran ayağını yorğanına görə uzatmağı bacarmalıdır”.
Məhəmmədəli QƏRİBLİ
