Son zamanlar cənub qonşumuz İranla aramızda yaşanan gərginlik cəmiyyətimizin ən həssas yerinə çevrilib. Əhalisinin təxminən yarısı azərbaycanlı (türk), əksəriyyəti bizim kimi müsəlman (şiə) olan, ortaq tarixə, mədəniyyətə, ənənələrə malik olduğumuz ölkənin qəribə, bir çox hallarda təəccüb və təəssüf doğuran davranışları xalqımızı və dövlətimizi istər-istəməz narahat edir.
Son zamanlar Azərbaycan ictimaiyyətini düşündürən əsas suallardan biri də budur ki, hazırda iki ölkə arasına gərginliyin pik həddinə çatdığı, ən yüksək səviyyədə bəyanatlar verildiyi, ittihamlar səsləndirildiyi bir vaxtda din xadimlərimiz niyə susur? Baş verənlərin bunlara dəxli yoxdurmu? Niyə şeyxülislam Allahşükür Paşazadə, ölkədə müəyyən zümrə arasında populyarlığı ilə seçilən digər din xadimlərimiz danışıb İrana öz etirazlarını bildirmirlər? Bütün bunlardan belə bir nəticəyə gəlmək olar ki, İran Azərbaycanda, azsaylı da olsa, müəyyən ümid bəslədiyi bir kontingent yarada bilib. Ruhani liderlərin bu məsələdə ehiyatlı davranmasının səbəblərindən biri də həmin kontingentin potensial siyasi dəstəyini itirməmələri ola bilər.
Politoloq Qalib Hüseynli “Bakı-Xəbər”ə açıqlamasında bildirdi ki, dəfələrlə din sahəsində olan bəzi nöqsanlarla bağlı fikirlərini bildirib: "Bu gün tam çılpaqlığı ilə görünür ki, din sahəsində bizim ciddi problemlərimiz var. Bu problemlərin qaynaqlandığı mərkəzlər var. Ölkəmizdə dinə rəhbərlik edənlərin səriştəsiz fəaliyyəti bu uçurumu daha da dərinləşdirir. Qafqaz Müsəlmanları İdarəsi adlı qurum bu proseslərə rəhbərlik etməli idi. Din xadimlərinin ölkədə gedən proseslərə həssas reaksiya verməsi olduqca önəmlidir. Erməni keşişi müharibəyə gedən əsgərin başı üzərinə xaç suyu çəkir. Və yaxud İranda əsgərliyə gedənləri din xadimləri Quranın altından keçirir.
Bəs bizim din xadimləri niyə susur? Məgər bizim bundan ağır vəziyyətimiz olacaq? Hazırda vətəndaşlığın, vətənpərvərliyin sınağa çəkildiyi bir dönəmdir. Bu məqamda dindar da öz vətəndaş mövqeyini ortaya qoymalıdır. Onlar bu ölkənin dövlətçiliyinin keşiyində dayandıqlarını sübut etməlidirlər. Bizim dindarlar isə hərəsi bir küncə çəkilib. Azərbaycanda dini idarələrin və qurumların reforması həyata keçirilməlidir. Vətənpərvər, dövlətin qayğılarını özündən ayırmayan vətəndaşlarımızı dini qurumların başına gətirməliyik”.
Məhəmmədəli QƏRİBLİ
