Oktyabrın 11-də Müstəqil Dövlətlər Birliyinin (MDB) iştirakçısı olan ölkələrin Daxili İşlər Nazirləri Şurasının onlayn formatda növbəti iclası keçirilib.
Daxili İşlər Nazirliyinin (DİN) Mətbuat xidmətindən verilən məlumata görə, tədbirdə üzv dövlətlərin Daxili İşlər nazirliklərinin əməkdaşlığının prioritet istiqamətləri və cinayətkarlıqla mübarizədə dövlətlərarası proqramların icra vəziyyəti barədə ümumi fikir mübadiləsi aparılıb, Şuranın terrorizm, ekstremizm, narkotrafik, mütəşəkkil cinayətkarlıq və insan alveri ilə mübarizədə geniş və əhatəli iş apardığı, qurumun MDB məkanında təcrübə və informasiya mübadiləsi istiqamətində də səmərəli fəaliyyət göstərdiyi vurğulanıb.
İclasda çıxış edən Azərbaycan Respublikasının Daxili işlər naziri, general-polkovnik Vilayət Eyvazov gündəlikdəki bütün məsələlərin aktuallığını, onların daxili işlər orqanlarının qarşısında duran, günümüzün reallıqları ilə uzlaşan vəzifələrə uyğun olduğunu qeyd edib, müzakirələrin əməkdaşlığın daha da intensivləşməsinə və genişləndirilməsinə yeni impuls verəcəyinə əminliyini bildirib.
V.Eyvazov qeyd edib ki, 2019-2021-ci illər ərzində Birlik üzvü olan ölkələrin DİN-lərinin aidiyyatı qurumları tərəfindən sıx işbirliyində yüzlərlə ağır cinayətlərin üstü açılıb, çoxsaylı mütəşəkkil transmilli kriminal qruplar zərərsizləşdirilib, təhlükəli cinayətkarlar tutularaq ekstradisiya olunub.
Birlik çərçivəsində tərəfdaşlığın kifayət qədər yüksək səviyyədə olduğunu qeyd edən nazir son iki il ərzində narkotik vasitələrin qanunsuz dövriyyəsinə qarşı mübarizədə təxminən 4,5 ton narkotik vasitənin müsadirə edilməsinin Azərbaycan hüquq mühafizə orqanlarının bu istiqamətdə barışmaz mövqe sərgilədiyinin əyani sübutu olduğunu bildirib.
General-polkovnik V.Eyvazov son illər ölkəmizdə cinayətkarlıqla aparılan qətiyyətli mübarizənin müsbət nəticələri, ümumilikdə cinayətlərin, o cümlədən ağır və xüsusilə ağır cinayətlərin açılması, azalma tendensiyası, dövlətlərarası axtarışa verilən təqsirləndirilən şəxslərin tutulması, əlverişli kriminogen durum, ictimai asayişin qorunması sahəsində həyata keçirilən tədbirlər barədə danışıb, transmilli mütəşəkkil cinayətkarlığın yeni təhdid və çağırışlarına birgə səylərlə cavab verilməsinin zəruriliyini diqqətə çatdırıb.
Dostluq və konstruktiv əməkdaşlıq şəraitində keçən toplantıda planlaşdırılan bütün məsələlər üzrə müvafiq qərarlar qəbul edilib.
Daxili işlər naziri Vilayət Eyvazov qeyd edib ki, transmilli mütəşəkkil cinayətkarlığın yeni çağırış və təhdudləri ilə birgə mübarizə zəruridir. Nazir bu sahədə hansı yeni çağırış və təhdidlər nəzərdə tutur?
“Burada söhbət insan alverinə, narkoticarətə, terrorimzə, ekstremizmə qarşı dövlətlərin birgə mübarizəsindən gedir”
“Polisə Dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə bildirdi ki, Vilayət Eyvazov hələ daxili işlər nazirinin birinci müavini olarkən insan alveri ilə mübarizə üzrə milli koordinator idi. O dövrdə də insan alverinə qarşı mübarizənin təşkil olunmasında, transmilli mütəşəkkil cinayətkarlıqla mübarizədə böyük dönüş yarandığını xatırladan Ş.Əliyevin sözlərinə görə, hətta beynəlxalq tribunalarda V.Eyvazov milli koordinator kimi hesabat verərkən o tədbirlərin uştırakçıları təəccüblənirdilər ki, necə olur Azərbaycan bu sahədə böyük irəliləyişlər əldə edir? “Bu videokonfransda da cənab nazirin çıxışı yaddaqalan oldu. Nazir təklif etdi ki, beynəlxalq aləm, bütün dövlətlər transmilli mütəşəkkil cinayətkarlığa qarşı birgə mübarizə aparmalıdır. Çünki burada söhbət insan alverinə, narkoticarətə, terrorimzə, ekstremizmə qarşı dövlətlərin birgə mübarizəsindən gedir. Əgər bu sahələrdə dövlətlər koordinasion qaydada mübarizə aparmasalar və əlahiddə şəkildə ölkələr daxilində mübarizə aparılarsa, bu səmərə verməyəcək. Ona görə də burada bütün beynəlxalq hüququn prinsiplərinə və beynəlxalq konvensiyaların tələblərinə müvafiq birgə işlər görülərsə daha böyük səmərə verər”.
Ş.Əliyevin sözlərinə görə, onsuz da Azərbaycanın mütəşəkkil cinayətkarlıqla, terrorizmlə, insan alveri ilə, narkoticarətlə mübarizədə əldə etdiyi uğurlar hətta dominantlıq edən dövlətlər tərəfindən də müsbət qarşılanır, təqdir edilir. “Cənab nazirin bu çağırışı tam olaraq yerinə düşdü, məhz bu məsələdə də yenə təşəbbüs Azərbaycanın əlində oldu. Əgər doğrudan da bütün dövlətlər bu təklifə qoşularsa, bu sahələrdə birgə mübarizə apararlarsa, bu bütövlükdə beynəlxalq aləm üçün təhlükə yaradan neqativ amillərə qarşı bir sipər rolunu oynayar. Bu istiqamətlərdə mübarizə sahəsində birlik göstərməkdən başqa yol yoxdur, birləşmək ümümbəşəri zərurətə çevrilib. Çünki bu yalnız bir-iki dövlətin problemi deyil, bütün dünyanı narahat edən, incidən, əndişədə saxlayan bir mənfi haldır. Hesab edirəm ki, Azərbaycanın bu təşəbbüsünə bütün ölkələr qoşulacaq” - deyə Ş.Əliyev vurğuladı.
İradə SARIYEVA
