Azərbaycanın tarixi-mədəni, dini irsini talan edib dağıdan, təhqir edən, böyük bir hissəsini yer üzündən silən Ermənistan yenə də öz çirkin niyyətlərindən, yalançılığından və saxtakarlığından əl çəkmir. Necə deyərlər, “adımı sənə qoyaram, səni də yana-yana”. Ermənistan elə bir dövlətdir. Öz cinayətlərini başqalarının ayağına yazmaq onun üçün su içmək qədər asandır.
Ermənistan Xarici İşlər Nazirliyinin mətbuat katibi Vahan Hunanyan “Armenpress”ə müsahibəsində həyasızcasına iddia edib ki, guya Azərbaycan “hərbi cinayətlərini gizlətməyə çalışaraq” “erməni mədəni irsinin təhlükə altında olan obyektlərinə” UNESCO -nun ekspert missiyasının girişini “əngəlləyir” və ya “maksimum məhdudlaşdırır”.
Bu qədər də ağ yalan olar? Faktiki olaraq Azərbaycan 30 ildi ki, UNESCO-nu bura çağırır, amma UNESCO atlı, Azərbaycan isə piyada olub, bu qurumu heç cür bölgəyə gətirə bilmir. Əlbəttə, buna ermənilər mane olur. UNESCO missiyasının indiyə qədər bölgəyə gəlməməsinin, azad edilən ərazilərdə olmamasının günahkarı Azərbaycan yox, Ermənistandır və yalançı erməni təbliğatıdır. Azərbaycan ərazisində heç bir erməni abidəsi yoxdur, olmayan bir şey necə dağıdıla bilər ki?
Ekspertlər deyir ki, bütün hallarda bu məsələdə məsuliyyət Ermənistanın və indiyə qədər missiya göndərməyən UNESCO-nun üzərindədir.
“Ermənistan tərəfi bu məsələdə də hər zamankı kimi aşkar həyasızlığını sərgiləməklə, necə deyərlər, UNESCO-nun “ayağına pas ötürür...”
Siyasi şərhçi Rövşən Rəsulov “Bakı-Xəbər”ə şərhində bildirdi ki, Ermənistan XİN-in sözçüsü bu cəfəng bəyanatla həm öz ölkəsini, həm də UNESCO-nu ifşa edib. O qeyd etdi ki, Azərbaycan əraziləri 11 aydır işğaldan azad edilib, amma faktiki olaraq UNESCO bir dəfə də olsun Azərbaycanı yada salmayıb. “Ermənistanın 30 ilə yaxın müddət ərzində işğal altında saxladığı ərazilərimizdə tarixi, mədəni, dini və mənəvi irsimizi dağıdaraq məhv etməsi artıq danılmaz bir faktdır və bu barədə Prezident İlham Əliyev dəfələrlə öz çıxışlarında vurğulayıb. Lakin məsələnin mahiyyəti ondadır ki, Azərbaycan tərəfi istər torpaqlarımız işğal altında olarkən, istərsə də sonrakı müddətdə UNESCO-nun rəhbərliyinə erməni vandallığının aşkar və ifşa olunması üçün çoxsaylı müraciətlər etsə də, qarşı tərəf həmin müracitələrə məhəl qoymayıb. Dövlət başçımız haqlı olaraq irad bildirib ki, UNESCO ikili standartlarla fəaliyyət göstərir və nədənsə Ermənistanın ifşa olunmasında maraqlı görünmədiyini nümayiş etdirir. Halbuki, Ermənistan tərəfi bu məsələdə də hər zamankı kimi aşkar həyasızlığını sərgiləməklə, necə deyərlər, UNESCO-nun “ayağına pas ötürür”, yəni qurumun işğaldan azad edilən ərazilərimizə gəlməməsi üçün sərsəm ittihamlarla çıxışlar edir. Misal üçün, Ermənistan XİN-in mətbuat katibi sərsəmləyir ki, sən demə UNESCO-nun Azərbaycana gəlməməsini Bakı “əngəlləyir” və s. Göründüyü kimi, əsl erməni həyasızlığı bir daha özünü sübuta yetirir. Necə olur ki, Azərbaycanın dövlət başçısı xarici KİV-ə verdiyi çoxsaylı müsahibələrində adıçəkilən qurumu ölkəmizə dəvət edir, erməni vandallığının ifşası üçün, faktları əldə etməsi üçün çağırışlar, dəvətlər səsləndirir, erməni tərəfi isə əksini iddia edir? Məncə, təkcə bu amil artıq özü-özlüyündə həmin sualın cavabını verməkdədir. Təbii ki, UNESCO-nin işğaldan azad edilmiş ərazilərimizə gələrək dağıdılmış, məhv edilmiş tarixi abidələrimizi, irsimizi fiksasiya etməsini əslində Ermənistan istəmir və qabaqdangəlmişlik göstərməklə qeyd edilən axmaq iddialarını irəli sürür.
Eyni zamanda düşünürəm ki, bu gün missiyanın ölkəmizə gəlməməsinin köklü səbəblərini yalnız Ermənistan tərəfində deyil, elə həmin missiyanın rəhbərliyində də axtarmaq lazımdır.
Yeri gəlmişkən, mövzunun kontekstindən çıxmamaq şərtilə daha bir faktı da diqqətinizə çatdırmaq istərdim. Bildiyimiz kimi, Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva yalnız ölkəmizdə deyil, eyni zamanda Avropa ölkələrində bəşəri mədəniyyət abidələrinin, Avropanın qədim irsini tərənnüm edən tarixi binalarının, muzeylərinin, dini abidə komplekslərinin təmirlərini, bərpa işlərini həyata keçirməklə əslində Azərbaycanın tarixi irslərə, dəyərlərə necə qiymət, dəyər verdiyini nümayiş etdirib”.
R.Rəsulovun sözlərinə görə, belə olan halda UNESCO-nun qarşılıqlı addım atması zərurətə çevrilməlidir, çünki söhbət bu dəfə Azərbaycanın abidələrindən, irsindən gedir və sözügedən missiya tərəfindən müşahidə etdiyimiz davranış əsla anlaşılan deyil. Siyasi ekspert hesab edir ki, bax, bu səbəbdən cənab İlham Əliyev işğaldan azad edilmiş Zəngilana səfəri zamanı dağıdılmış, viran qoyulmuş tarixi məscidin qarşısında haqlı ittihamlarını bəyan etmişdi. “Onu da deyim ki, həmin bəyanat yalnız UNESCO-nun deyil, ümumilikdə ikili standartlardan çıxış edən edən xristian klublarına aid beynəlxalq təşkilatlara vurulan tərs şillə idi. Necə olur, Şuşanın azad edilməsi uğrunda döyüşlərdə kilsə binası bir az zərər görən kimi bu qurumlar hay-haray qaldırmaqla az qala Azərbaycanı “bütün dünyanın xristian abidələrinin qənimi” kimi göstərməyə cəhdlər etdilər, amma dağıdılan, təhqirlərə məruz qalan yüzlərlə məscidimiz, abidələrimiz, qədim irsimiz heç kimsədə zərrə qədər də olsa təəssüf hissləri oyatmadı? Dövlət başçımız UNESCO ilə bağlı fikirlərini açıqlayarkən missiyanın iki il əvvəl işğal altındakı torpaqlarımıza gəlmək istəməməsini “məsələni siyasiləşdirmək istəməmələri” ilə əlaqələndirdiyini demişdi. Bəs indi nə oldu..?!
Söz yox ki, cənab Prezident bu fikirləri səsləndirməklə UNESCO-nu idarə edənlərə açıq şəkildə bəyan ki, siz ədalətsizsiniz və Azərbaycan torpaqlarında vəhşiliklər, vandallıqlar törətmiş ermənilərə təəssübkeşlik edirsiniz. Belə olan halda, yəni vandallıqlarına görə heç bir hüquqi cəza almadıqlarını görən ermənilər də UNESCO-nun həmin təəssübkeşliyindən vəcdə gələrək Azərbaycana qarşı məlum qarayaxmalarını irəli sürürlər. Əslində bilirsinizmi məsələ nədədir? Ölkəmiz 30 ilə yaxın dövr ərzində bu kimi ikili standartlarla o qədər çox qarşı-qarşıya qalıb ki, artıq belə davranışlar bizlərdə təəccüb də doğurmur. Lakin hər necə olursa-olsun, həqiqət onsuz da öz sözünü deyir, gec, ya da tez. Elə UNESCO-nun missiyası da nə qədər böyük səhvə yol verdiyini anlayacaq, onda da çox gec olacaq. Azərbaycan dövləti özü öz torpaqlarını işğaldan necə azad etdisə, talanlara, dağıntılara məruz qalmış tarixi abidələrini, milli irsini də özü bərpa edəcək. O cümlədən, bunları törədənlərin də cəzalarını mütləq verəcək, bax buna isə kimsənin şübhəsi olmamalıdır” - deyə siyasi ekspert R.Rəsulov qeyd etdi.
İradə SARIYEVA
