“Bizim son illər ərzində tibb mərkəzlərinin coğrafiyasına fikir versəniz görərsiniz ki, cəbhəyanı, təmas xəttinə yaxın olan bölgələrə xüsusi diqqət göstərilirdi”. Bunu Prezident İlham Əliyev Xocavənd rayon ictimaiyyətinin nümayəndələri ilə görüşü zamanı deyib.
Ölkə başçısının sözlərinə görə, bütün bunlar təsadüfi deyildi: “Şəhidlərimizin sayının o qədər də çox olmamasının səbəblərindən biri də məhz həkimlərdir. Çünki müharibə başlanan kimi əmrlərimdən birincisi bəlkə də ondan ibarət idi ki, yaralılara ən yüksək xidmət göstərilməlidir. Bizim son illər ərzində tibb mərkəzlərinin coğrafiyasına fikir versəniz görərsiniz ki, cəbhəyanı, təmas xəttinə yaxın olan bölgələrə xüsusi diqqət göstərilirdi. Bu da təsadüfi deyildi. Çünki müharibə qaçılmaz idi. Mən deyirdim ki, torpaqlar işğaldan azad olunacaq. Mən həm deyirdim, həm də inanırdım və bilirdim ki, bu, belə olacaq. Əlbəttə, biz istəyirdik ki, qan tökülməsin, torpaqlarımız sülh yolu ilə azad edilsin. Amma artıq səbir kasamız daşmışdı və məhz müharibəyə hərtərəfli hazırlıq görülmüşdü - həm iqtisadi sahədə, hərbi-quruculuq sahəsində, maddi-texniki təminat sahəsində və eyni zamanda, səhiyyə sahəsində. Ona görə məsələn, biz Füzuli rayonunda təmas xəttinə yaxın iki böyük tibb mərkəzi yaratdıq. Yevlaxda, ondan sonra Goranboyda, Ağdamda, Bərdədə böyük tibb mərkəzləri yaratdıq”.
Görünən odur ki, cəbhəyanı bölgələrdə tibb məntəqələrinin tikilməsi də müharibəyə hazırlığın əsas tərkib hissəsi olub. O baxımdan bu amilin əhəmiyyətini ekspertlər necə dəyərləndirir?
“Ordumuz hücum edən tərəf olsa da, tibbi xidmət yüksək səviyyədə olduğu üçün itkilərimiz az oldu”
Məsələyə münasibət bildirən Tibb Universitetinin Farmakologiya kafedrasının dosenti, tanınmış həkim Aydın Əliyevin fikrincə, həqiqətən də sözügedən amil itkilərin az olmasında vacib rol oynayıb: “Məlum olur ki, Prezident İlham Əliyevin rəhbərliyi ilə ərazilərimizin işğaldan azad olunması ilə bağlı kompleks işlər görülüb. Tarixən müharibələrdə tibb məntəqələrinə, tibbi personala tələbat böyük olur. Döyüşdə tibbi xidmət səviyyəsi nə qədər üstün olursa, bu, bir o qədər yaralılar arasında həyatını itirənlərin sayının az olmasına öz təsirini göstərir. Bunun üçün vacib məqamlardan biri də tibb məntəqələrinin cəbhə bölgəsinə yaxın olmasıdır. Belə olduqda zamanında yaralılara ilkin tibbi xidmət göstərmək mümkün olur və nəticədə həlak olanların sayı az olur. Bu faktorun qabaqcadan nəzərə alınması Prezidentin uzaqgörənliyindən xəbər verir. Tibb Universitetinin cavan həkimləri də müharibədə çox yüksək dərəcədə təmsil olundular və hətta döyüşdülər də. Bütün bunlarla yanaşı, Prezident İlham Əliyev böyük idarəçilik qabiliyyəti və xarizması ilə yüksək psixoloji əhval-ruhiyyə yaratdı. Bütün bunların nəticəsidir ki, ordumuz hücum edən tərəf olsa da itkiləri az oldu. Adətən hücumda olan tərəfin itkiləri çox olur, amma İkinci Qarabağ müharibəsində əksinə oldu. Bunun səbəblərindən biri də yaralılara vaxtında göstərilən tibbi xidmət idi”.
Bu baxımdan həkim A.Əliyev hesab edir ki, döyüşlər zamanı yaralılara göstərilən tibbi xidmət yüksək səviyyədə olub.
Vidadi ORDAHALLI
