Məlum olduğu kimi, ATƏT-in Minsk Qrupunun həmsədrləri (Fransadan Stefan Viskonti, Amerika Birləşmiş Ştatlarından Endryu Şefer və Rusiya Federasiyasından İqor Xovaev) bəyanat yayıb.
Belə ki, həmsədrlər 7 və 8 oktyabr tarixlərində Cenevrədə BMT-nin Qaçqınlar üzrə Ali Komissarı Filippo Grandi və Beynəlxalq Qırmızı Xaç Komitəsinin (BQXK) vitse-prezidenti Gilles Carbonier ilə məsləhətləşmələr aparıblar. Görüşlərdə ATƏT-in fəaliyyətdə olan sədrinin şəxsi nümayəndəsi Anjey Kasprşik də iştirak edib. Bütün iştirakçılar işlərini həyata keçirmək üçün beynəlxalq humanitar təşkilatların tam və maneəsiz çıxışının vacibliyini vurğulayıbar.
BMT Baş Assambleyası çərçivəsində Ermənistan və Azərbaycan XİN rəhbərlərinin son konstruktiv görüşü fonunda həmsədrlər Azərbaycanın bir erməni hərbçisini azad etməsini alqışlayıb, həmçinin mümkün deeskalasiya və humanitar tədbirləri müzakirə ediblər. Bununla belə, həmsədrlər görüşməyə hazır olan Prezident Əliyev və Baş nazir Paşinyanın açıq bəyanatlarını alqışlayıblar. Onlar tərəflərlə belə bir görüşün şərtlərini və detallarını müzakirə etməyi səbrsizliklə gözlədiklərini və bu prosesdə növbəti addımları müzakirə etmək üçün yaxın gələcəkdə bölgəyə səfər etməyə hazır olduqlarını bir daha bəyan ediblər.
Bütün bu deyilənlərin fonunda maraqlıdır, Əliyev-Paşinyan görüşü nə qədər mümkündü və hansı məsələlər müzakirə edilməlidir?
“Tərəflərin fərqli niyyət və mövqelərlə danışıqlara getməsi indiki mərhələdə danışıqları əngəlləyə bilər”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Azərbaycanın, Ermənistanın dövlət və hökumət başçıları arasında münasibətlərdəki problemlərin həlli məqsədilə yüksək səviyyədə görüşün keçirilməsi region üçün həyati əhəmiyyət kəsb edəcək bir məsələdir. Münaqişə tərəfləri olan bu dövlətlər arasında münasibətlərdə həllini gözləyən məsələlər ətrafinda raziliqlar əldə etmədən, bütövlükdə regionda stabillik və təhlükəsizliklə bağlı problemləri tam mənada həll etmək mümkün deyil. Danışıqlarda müzakirə predmeti ola biləcək məsələlər çoxçeşidlidir. Bura diversantların qaytarılmasından tutmuş, dövlətlər arasında delimitasiya və demarkasiyaya qədər olan bir sıra məsələlər daxildir. Ancaq gündəmdə olan əsas məsələlərdən biri, əlbəttə, Moskva razılaşmasının şərtlərinin Ermənistan tərəfindən yerinə yetirilməsi ilə baglı olan məsələdir. Yəni nəqliyyat kommunikasiya dəhlizlərinin açılması. Ən nəhayət, tərəflər arasında böyük sülh sazişinin də şərtlərinin muəyyən edilməsinə ehtiyac var. Çünki tərəflər faktiki olaraq hələ də müharibə vəziyyətindədir. Nəhayət, Ermənistan ATƏT-in Minsk Qrupunun vasitəçiliyi ilə Dağlıq Qarabağla bağlı danışıqların da bərpa edilməsində maraqlıdir. Sonuncunu çıxmaq şərtilə, əlbəttə, rəsmi Bakı bütün məsələlər ətrafında müzakirələrə hazırdır. Vasitəçi tərəf olaraq Avropa İttifaqı da artıq öz mövqeyini ortalığa qoyub. Azərbaycan Prezidentinin də məhz Aİ-nin vasitəçiliyi ilə danışıqlara hazır olmasını bildirməsi ölkəmizdə ATƏT Minsk Qrupunun məlum mövqeyinə munasibətdən irəli gələ bilər. Paşinyanın son açıqlamalarını da nəzərə alsaq, erməni tərəfi də danışıqlara hazırdır. Lakin tərəflərin fərqli niyyət və mövqelərlə danışıqlara getməsi indiki mərhələdə danışıqları əngəlləyə bilər”.
Bu baxımdan politoloq hesab edir ki, birmənalı proqnoz vermək çətindir.
Vidadi ORDAHALLI
