“Bu hazırlıq nəticədə belə möhtəşəm Qələbəyə gətirib çıxardı”. Bunu Prezident İlham Əliyev Xocavənd rayon ictimaiyyətinin nümayəndələri ilə görüşündə çıxışı zamanı deyib.
Dövlət başçısının sözlərinə görə, torpaqları işğaldan azad etmək üçün sistemli hazırlıq gedirdi: “Azərbaycan tarixi Zəfər çaldı. Bütün bu işlərə rəhbərlik edən şəxs kimi, Ali Baş Komandan kimi bir daha gördüm Azərbaycan xalqı nə qədər böyük xalqdır. Biz təmas xəttinə yaxın olan bölgələrdə sığınacaqlar yaratmaqla bağlı tədbirlər keçirəndə vətəndaşlar özləri gəlib kömək göstərirdilər. Ordumuzun təchizatı tam təmin edilmişdi, heç bir ehtiyac yox idi. Amma vətəndaşlar özləri gəlib kömək göstərməyə can atırdılar. Səfərbərliklə bağlı hərbi komissarlıqların qabağında minlərlə gənc könüllü olaraq döyüşə getmək istəyirdi. Bir nəfər də olsun fərari olmamışdır, bir nəfər də. Əlbəttə, bütün başqa amillərlə bərabər, hazırlıq sistemli xarakter daşımışdı. Uzunmüddətli hərtərəfli hazırlıq işləri gedirdi – iqtisadi, beynəlxalq münasibətlər, ordu quruculuğu sahələrində, vətənpərvərlik, düşmənə nifrət hissi aşılanırdı gənclərimizə. Bu hazırlıq nəticədə belə möhtəşəm Qələbəyə gətirib çıxardı ki, bütün Azərbaycan xalqı, Azərbaycanda yaşayan, xaricdə yaşayan milyonlarla azərbaycanlı bu gün fəxr edir, haqlı olaraq fəxr edir, hamımız fəxr edirik”.
Görünən odur ki, Azərbaycan səbrlə bütün resurslarını zamanla səfərbər edərək, ciddi qələbənin əldə edilməsinə hərtərəfli zəmin yaradıb. Bu baxımdan, Prezidentin səsləndirdiyi məlum fikirləri ekspertlər necə dəyərləndirir?
“Sadalanan bütün faktorlar ordumuzun möhtəşəm qələbə çalmasını qaçılmaz reallığa çevirdi”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, müharibəyə sistemli hazırlıq olmasaydı, bu cür möhtəşəm qələbənin qazanılması çətin olardı: “Daha çox itki ola bilərdi. Eyni zamanda, proses uzana bilərdi. Prezident İlham Əliyevin qətiyyətli, düşünülmüş siyasəti sayəsində müharibəyə kompleks hazırlıq işləri aparıldı. Atəşkəs əldə edildikdən sonra xarici neft şirkətləri ilə saziş imzalandı. Ondan sonra Azərbaycanın iqtisadi, hərbi, siyasi gücünün artırılması istiqamətində davamlı, ardıcıl tədbirlər görüldü. Ordu quruculuğu sahəsində peşəkar hərbi kadrların hazırlanmasına, müasir silah komplekslərinin alınmasına, beynəlxalq müstəvidə ölkənin siyasi nüfuzunun gücləndirilməsinə xüsusi önəm verildi. Aydın məsələdir ki, bütün bu sadalananları qısa müddətdə həyata keçirmək mümkün deyildi. Zamanla və təmkinlə Azərbaycan öz hədəflərinə doğru getməyə başladı. Azərbaycan həqiqətlərinin dünya ictimaiyyətinə çatdırılması və bununla əlaqədar digər işlərin paralel şəkildə həyata keçirilməsi öz töhvəsini verdi. Bu illər ərzində ölkədə milli və vətənpərvərlik ruhunun gücləndirilməsi ilə bağlı çox böyük işlər görüldü. Milli ruh və ölkədə həmrəylik güclü olmadan müharibəyə getmək olmazdı. Məsələ ondadır ki, ölkədə görünməmiş böyük həmrəylik yarandı. Müharibə zamanı bütün xalq Ali Baş Komandanın ətrafında bir yumruq kimi birləşdi. Bu həmrəylik müharibə bitəndən sonra da davam edir”.
V.Rəhimzadə hesab edir ki, sadalanan bütün faktorlar Azərbaycan Ordusunun möhtəşəm qələbə çalmasını qaçılmaz reallığa çevirdi.
Vidadi ORDAHALLI
