Prezident İlham Əliyev Xocavənd rayon ictimaiyyətinin nümayəndələri ilə görüşündə Hadrut əməliyyatının unikallığından danışıb.
Ölkə başçısı deyib ki, Hadrut əməliyyatı İkinci Qarabağ müharibəsindəki əməliyyatlar sırasında xüsusi əhəmiyyət daşıyan əməliyyatdır: “Həm hərbi nöqteyi-nəzərdən, həm strateji nöqteyi-nəzərdən bu əməliyyatın çox böyük əhəmiyyəti var idi. Bu əməliyyatın uğurla başa çatması bizə imkan verdi ki, öz hədəfimizə - Qarabağın azad edilməsinə nail olaq. Hadrutun yerləşməsi bu bölgədə strateji nöqteyi-nəzərdən xüsusi əhəmiyyətə malikdir, çünki dağlıq ərazidir. Qəsəbə ətrafında yerləşən təpələr böyük əraziyə nəzarət etməyə imkan verir və Hadrutu götürmək hərbi nöqteyi-nəzərdən çox çətin idi. Eyni zamanda, Hadrutu götürməklə bizim gələcək planlarımız üçün yeni imkanlar açıldı. Onu da bildirməliyəm, baxmayaraq ki, müharibə zamanı Ermənistan ordusunda on mindən çox fərari olmuşdur və bəzi yaşayış məntəqələrindən onlar tələm-tələsik qaçaraq çıxmışdılar, amma Hadrutda dirəniş göstərdilər, müqavimət göstərdilər və burada gedən şiddətli döyüşlər bir neçə gün davam etmişdir. Buna baxmayaraq, Azərbaycan əsgəri, zabiti qarşısında onlar öz acizliyini dərk edərək burada da məğlubiyyətə uğradılar.
Hadrut əməliyyatının əhəmiyyəti ondadır ki, Ermənistan rəhbərliyi və Ermənistan ordusu gözləmirdi ki, biz Cəbrayıldan sonra Hadrut istiqamətinə gedəcəyik. Onlar hesab edirdilər ki, biz Füzuli istiqamətinə gedəcəyik. Baxmayaraq ki, Hadrutda onların çox böyük canlı qüvvəsi var idi, bizi gözləmirdilər. Çünki hərbi nöqteyi-nəzərdən Hadrutu götürmək doğrudan da çox böyük fədakarlıq və peşəkarlıq tələb edirdi. Biz bu əməliyyatı keçirməklə öz gücümüzü bir daha Ermənistana və bütün dünyaya göstərdik. Göstərdik ki, heç kim və heç nə bizim qabağımızda dura bilməz, nəyin bahasına olursa-olsun, biz bütün torpaqlarımızı azad edəcəyik.
Azərbaycan ictimaiyyəti yaxşı bilir ki, Hadrut əməliyyatı ilə bağlı Ermənistan mətbuatında yalan informasiyalar kifayət qədər çox idi. Biz artıq Hadrutun ətrafında yerləşən bütün dağları işğalçılardan təmizləyəndən sonra aydın oldu ki, qəsəbənin götürülməsi, sadəcə olaraq, müəyyən zaman tələb edir. Biz az itkilərlə qəsəbəni götürmək əzmində idik və buna da nail olduq. Ermənistan rəhbərliyi və Ermənistan Müdafiə Nazirliyi isə bəyan edirdi ki, Hadrut ermənilərin əlindədir. Guya ki, onlar növbəti dəfə taktiki geriləmə ediblər və indi Hadruta qayıdıblar, Azərbaycan əsgərlərini Hadrutdan çıxarıblar. Bütün bu yalanları müşahidə edərək, sadəcə olaraq, təəccüb edirdim. Çünki açıq-aydın idi ki, Hadrut artıq bizdədir. Mən əmr verdim Hadrutda Azərbaycan bayrağı qaldırılsın ki, ermənilərin bu yalanlarına son qoyulsun...”
Göründüyü kimi, ölkə başçısı, gözlənilənlərin əksinə olaraq, bizim Cəbrayıldan sonra Füzuliyə yox, məhz Hadruta doğru hərəkət etdiyimizi bildirib. Ermənilər isə bizim Füzuliyə doğru hərəkət edəcəyimizi gözləyirmiş. Hər şey ermənilərin gözlədiyi kimi olsaydı, yəni biz Cəbrayıldan sonra Füzuliyə doğru hərəkət etsəydik nələr olardı?
Hərbi-siyasi ekspert, ehtiyatda olan polkovnik-leytenat Daşdəmir Əliyev “Bakı-Xəbər”ə açıqlamasında bildirdi ki, müzəffər Ali Baş Komandan İlham Əliyevin rəhbərliyi ilə həyata keçirilən döyüş əməliyyatları dünya hərb tarixində bundan sonra da dərindən öyrəniləsi və istinad olunası bir məqamdır: “İlham Əliyevin rəhbərliyi altında hazırlanan döyüş əməliyyat planları o dərəcədə incə hazırlanmışdı ki, düşmən bundan duyuq düşə bilmədi. Baxmayaraq ki, özlərinin və bir sıra ölkələrin kəşfiyyatı onlara yaxından kömək edirdi. Bəli, onlar bizim müharibəyə başlayacağımız əsas hücum istiqaməti kimi Ağdam –Ağdərə və Horadiz cəbhəsini gözləyirdilər. Ancaq biz tam başqa istiqaməti seçdik. Döyüş əməliyyatlarının aparılması elə alındı ki, Hadrut əməliyyatı zərurəti ortaya çıxdı. Çox çətin relyefə malik, ətrafı dağlarla əhatələnən bir şəhəri almaq asan deyildi. Ancaq bizim ordumuz bunun öhdəsindən gəlməyi bacardı. Bəli, düşmən bizim Füzuliyə hücum edəcəyimizi gözləyirdi, ancaq biz Hadruta yürüdük. Bununla da düşmən tam çaşqın vəziyyətə düşdü. Çünki Füzuliyə gözlənilən hücum istiamətində düşmən güclü istehkamlar qurmuşdu. Həmin istiqamətdə müdafiəsini yaxşı təşkil etmişdi. Hadrutu ələ keçirəndən sonra biz Füzuliyə tam fərqli istiqamətdən həmlə etdik. Təbiidir ki, biz müharibəni Ağdamdan başlasaydıq, Cəbrayıldan sonra Füzuliyə hücum etsəydik, çoxlu sayda insan itkisi ilə üzləşməli olacaqdıq. Ağıllı hücum taktikası ilə biz həmin itkilərdən yan keçdik. Canlı qüvvə itkisi ilə yanaşı, biz həm də bir neçə gün ərzində ləngiməli olacaqdıq. Bu da ordumuzda yorğunluq, ruh düşgünlüyü yarada bilərdi. Bütün bunlarla yanaşı, bizim ordumuzun və şəxsi heyətin fədakarlığını da xüsusi vutğulamalıyıq ki, belə çətin əməliyyatın öhdəsində uğurla gəldilər. Hadrut həm də keçmiş Dağlıq Qarabağın ərazi vahidinə daxil olduğundan, oranın işğaldan azad edilməsi bizim üçün böyük əhəmiyyət daşıyır. Həmin əməliyyatda və bütün müharibədə həlak olan şəhidlərimizə Allahdan rəhmət, qazilərimizə şəfa, sağ qalan döyüşçülərimizə isə can sağlığı arzulayıram”.
Məhəmmədəli QƏRİBLİ
