Bu il Nobel Sülh Mükafatı alan iki jurnalistdən biri rusiyalı Dmitri Muratovdur (digəri flippinli Mariya Ressadır).“Novaya qazeta”nın baş redaktoru olan Dmitri Muratovun Nobel Sülh Mükafatına layiq görülməsi erməni təbliğatına ciddi zərbə olub.
Məsələ burasındadır ki, D.Muratov Rusiyada müstəqil medianın ən ünlü simalarından biri olmaqla yanaşı, hər zaman erməni separatizminə qarşı çıxıb və 44 günlük savaşda da Azərbaycanın haqq davasını dəstəkləyib.
Qeyd edək ki, Rusiyada insan haqlarını qoruyan, həmçinin hakimiyyətin korrupsiya əməllərini ifşa etdiyi üçün qətlə yetirilmiş məşhur rus jurnalistlərinin bir çoxu, o cümlədən Anna Politkovskaya məhz bu qəzetdə çalışıb. Bu baxımdan da Muratovun Nobel mükafatına layiq görülməsi həm də Rusiya hakimiyyətinin ürəyincə deyil.
44 günlük müharibə dövründə Muratovun Azərbaycan bayrağı fonunda şəkil çəkdirməsi də böyük rezonansa səbəb olmuşdu. Bu cür jurnalistin belə ali mükafata layiq görülməsindən ermənilərin dərin narahatlıq keçirməsinin başqa hansı səbəbləri ola bilər?
Media eksperti Müşfiq Ələsgərli “ Bakı-Xəbər”ə açıqlamasında bildirdi ki, Nobel Mükafatına layiq görülən bu jurnalistin karyerası ciddi KİV-lərlə bağlı olub: “Hazırda təmsil olunduğu “ Novaya qazeta”dan əvvəl “Komsomolskaya pravda”, “ORT” kimi nüfuzlu media quruluşları ilə əməkdaşlıq edib. Hər zaman da öz peşəkarlığı, cəsarətli mövqeyi ilə seçilib. Yaradıcılığında sırf Azərbaycanın nəfindən çıxış etdiyini deməzdim. Sadəcə, öz müstəqilliyini qorumağı bacaran, hadisələrə obyektiv baxışı olan adamdır. Azərbaycan-Ermənistan məsələsinə də əslində həqiqət prizmasından yanaşıb. Həqiqət isə bizim tərəfimizdə olduğu üçün ermənilərin mövqeyinə zidd olur. Bir jurnalist kimi onun tərəfkeşliyini hiss etmirəm. Fəaliyyəti sırf peşə kodeksi daxilindədir. Bu xətt Muratovun başqa mövzulara münasibətində də özünü göstərir. Dmitri hansı mövzuda yazıbsa, bu xarakter onun yaradıcılğında prioritet sayılıb. Bizim də istəyimiz bundan ibarətdir ki, xarici media məsələrə qərəzli deyil, obyektiv yanaşsın. Ermənilər isə haqq olmadıqları üçün yalnız onların sözünü deyən qərəzli mövqeli insanlara simpatiya bəsləyirlər. Sevindirici haldır ki, Dmitri kimi jurnalistlər belə beynəlxalq səviyyəli mükafata layiq bilinir. Arzumuz budur ki, bundan sonra da öz obyektivliyini qorusun. Bizim payımıza öz həmkarımızı ürəkdən təbrik etmək düşür. Elə bilirəm ki, hər bir jurnalist belə mötəbər mükafata layiq görülməyi istərdi. Bu baxımdan Muratov çox böyük uğura imza atmağı bacarıb. Ermənilərin bu məsələdə əndişəsi nəyisə dəyişmək gücündə deyil.Onlar bacarsaydılar, Muratova təsir edərdilər. İndiyə kimi bunu edə bilməyiblərsə, bundan sonra da edə bilməyəcəklər”.
Qeyd edək ki, Nobel Komitəsi mükafatın jurnalistlərə Filippində və Rusiyada ifadə azadlığını müdafiə etmək üçün "cəsarətli mübarizəyə" görə verdiyini bəyan edib.
Sözügedən jurnalistlər öz ölkələrində hakimiyyət nümayəndələrini qəzəbləndirən və onlara ciddi təhlükələr yaradan araşdırmalarıyla tanınırlar.
Nobel Komitəsi, Rusiyanın müstəqil “Novaya qazeta”nın həmtəsisçisi və redaktoru olan Dmitri Muratovun onilliklər ərzində getdikcə çətinləşən bir mühitdə azad sözü müdafiə etdiyini söyləyib.
Rappler xəbər saytının həmtəsisçisi olan Maria Ressa "öz ölkəsi Filippində hakimiyyətdən sui-istifadə, zorakılıq və artan avtoritarizmin ifşası" naminə fəaliyyətinə görə təqdir olunub.
Məhəmmədəli QƏRİBLİ
