Teokratik rejimin əl buyruqçuları olan bəzi “mömin müsəlmanlar” son günlər də Azərbaycana qarşı təxribatlarını davam etdirir. Azərbaycandan İrana qaçan milli satqınlar, bəzi “dindar”lar Yutubda Azərbaycan xalqına “mesaj göndərirlər” ki, guya Azərbaycan əhalisi türk deyil, özünü türk sayanlar isə “bir ovuc səlcuq, monqol törəmələridir”.
Vaxtilə Qumda oxuyublar və molla rejimindən, onun xüsusi xidmət orqanlarından aldıqları təlimata uyğun olaraq Azərbaycanda təxribatlar, dini məzhəb ayrıseçkiliyi kimi yolverilməz əməllər törətmək üçün əllərindən gələni edirlər. Əslində isə milçək kimi könül bulandırmaqdan o yana gedə bilmirlər. Deyirlər ki, “dahi rəhbər”lərinin hər kəlməsinə əməl edib Azərbaycana mesaj göndərirlər. İranda oturub Azərbaycan xalqına, onun tarixi kökünə şər atmaq, hədyanlar yağdırmaq üçün canfəşanlıq edən bəzi “azərbaycanlılar” dövlətinə, xalqına xəyanətinin cəzasını çəkəcək. Onlar Azərbaycanın daxilində heç bir xaos, qarışıqlıq yarada bilmədilər və ədalət məhkəməsindən canlarını qurtarıb molla rejiminə sığındılar. Son günlər Azərbaycana “mesaj göndərən”lərin içində Şeyx Bəxtiyar Bayramov, Şeyx Sərxan Məmmədov və Şeyx Əli Qumi xüsusi canfəşanlıq edib, “rəhbər”in tapşırığını can-başla yerinə yetirmək üçün sanki yarışa giriblər.
Ekspertlər deyir ki, bu gün molla rejiminin əlində oyuncaq olan və Azərbaycan dövlətinə və xalqına xəyanət etdiklərinə görə İran vətəndaşlığı, maaşla, dolanışıqla mükafatlandırılan bir qrup “mömin” zərərli təbliğatlarından qalmır, hətta polisi də, digər güc qurumlarını da “dindarlar”ı müdafiə etməyə çağırırlar.
“Düşmən dəyirmanına su tökən bu şəxslərin hamısı xəyanətkardır, onlara başqa ad vermək olmaz”
Tarixçi Pərviz Ağalarov “Bakı-Xəbər”ə bildirdi ki, Azərbaycan xalqının tarixi kökünə böhtan atanların məqsədi suyu bulandırmaq, şər kampaniyasını genişləndirməkdən ibarətdir. Bu iddiaların heç bir əsası olmadığını deyən P.Ağalarov hesab edir ki, bu cür böhtanlar Azərbaycan cəmiyyətində bölücülük yaratmağa xidmət edir: “Azərbaycanda əhalinin mütləq çoxluğunu türk kökənli əhali təşkil edir. Eyni zamanda ölkəmizdə milli azlıqlar da yaşamaqdadır. 44 günlük müharibədə Azərbaycanda yaşayan bütün xalqlar çiyin-çiyinə döyüşdülər, qələbəmizdə bu faktor da mühüm rol oynadı.
Bu həmrəylik çoxlarını qorxudur və təbii ki, bəzi qüvvələr bundan çox narahatdırlar. Bu cür iddiaları irəli sürənlər Azərbaycanın zəiflədilməsi və parçalanmasında maraqlı olan qüvvələrdi.
XlX əsrdə çar Rusiyasının Azərbaycanın şimal torpaqlarını işğal etməsi yeni siyasi reallıqlar ortaya qoydu. Müstəmləkə zülmünə dirəniş nəticəsində milli ziyalılarımız Azərbaycançılıq ideyasını irəli sürdülər. Bu, xalqımızın özünü qoruma instinkti kimi də qələmə verilə bilər. Çünki din və dil fərqi olan bir imperiyanın müstəmləkə siyasəti xalqımızı assimilyasiya təhlükəsi qarşısında qoyurdu.
Daha sonra bu ideya üzərində "Türkçülük, çağdaşlaşma və islamçılıq” şüarı irəli sürüldü və Azərbaycan Xalq Cümhuriyyəti dövründə rəsmi ideologiyaya çevrildi, dövlət bayrağımızda da öz əksini tapdı. Azərbaycan adlı dövlətin yaradılması nə Rusiyanın, nə də İranın maraqlarına heç vaxt daxil olmayıb. Ona görə də sovet tarixşünaslığı Azərbaycanın şimal hissəsində yaşayan əhalinin türk olmaması və yalnız Xl əsrdə səlcuq-oğuz axınları nəticəsində “türkləşməsi” tezisini irəli sürdü.
1925-ci ildə Pəhləvilərin hakimiyyətə gəlişi ilə Azərbaycanın cənubunda da bu məsələ paniranizm nöqteyi-nəzərindən şərh edilməyə başladı. Yəni Azərbaycanın əhalisi “türk olmayıb” və hansısa “irandilli kökə malikdir”, zorla türkləşdirilib və sair”.
Necə oldu ki, XI əsrdə Səlcuqların gəlişi ilə məhz Azərbaycan əhalisi türkləşdi, farslar, ərəblər və başqa xalqlar türkləşmədi. Bu imperiyanın sərhədləri Mərkəzi Asiyadan, Əfqanıstandan Suriyaya qədər idi. Necə oldu ki, Azərbaycan əhalisi türkləşdi? –deyə P.Ağalarovdan soruşduqda o qeyd etdi ki, bu, quru və boş iddiadan başqa bir şey deyil: “Bunlar hamısı cəfəng şeylərdir. Məqsəd nədir? Azərbaycanı türk kökündən ayırmaq, türk dünyası ilə bağlarından qoparmaqdır. Bunda da maraqlı olan qüvvələrin kimliyi aydındı. Xüsusilə də son dövrlər bu cəfəng məsələ İranda qabardılmağa başlayıb. Azərbaycanın şimalına Arran, Şirvan deyirlər. İran rəsmiləri Azərbaycan Xalq Cumhuriyyəti ifadəsini heç vaxt işlətmirlər, Azərbaycan Respublikası ifadəsini də həmçinin dillərinə gətirmirlər, Bakı Cumhuriyyəti deyirlər. Bunların hamısının arxasında həmin o türk qorxusu var. Çünki biz, təbii ki, farslarla eyni kökə malik deyilik və türk soyunun gclənməsi, ayağa qalxması İran üçün bir təhlükədir. Bu təhlükəni görərək bu çürük ideyanı ortaya sürürlər. Çox təəssüflər olsun ki, Azərbaycan vətəndaşlarının da müəyyən bir qismi bu təbliğatın təsirinə uyur. Amma aydın məsələdir ki, konkret olaraq bu adamlar hansısa dövlətin maraqlarına xidmət edən adamlardır və bu, xəyanətdən başqa bir şey deyil. Tariximizi başqa cür təqdim etmək, bizi aşağılamaq yalnız bir məqsəd daşıyır ki, güclü Azərbaycan olmasın. Güclü Azərbaycan İran üçün də, Ermənistan üçün də, elə Rusiyanın özü üçün də təhlükədir. Ona görə də bu ölkələr Azərbaycanın zəifləməsinə çalışırlar. 44 günlük müharibədən sonra İran-Azərbaycan münasibətlərinin gərginləşməsi elə Azərbaycanın güclənməsi ilə bağlıdır. İranı qorxudan məhz budur. Halbuki, Azərbaycan heç vaxt qonşu dövlətlərə qarşı hansısa ərazi iddiaları irəli sürməyib və sürmür də, mehriban qonşuluq, dostluq əlaqələri saxlamağa çalışır. Xüsusən də islam dünyası, istər İran, istər Türkiyə, istərsə də Pakistan və digər müsəlman ölkələri ilə. Lakin bəzi qüvvələr, antitürk qüvvələr məhz bu yanlış tezisləri ortaya atır və bunlar heç cür qəbul oluna bilməz. Düşmən dəyirmanına su tökən bu şəxslərin hamısı xəyanətkardır, onlara başqa ad vermək olmaz” - deyə P.Ağalarov qeyd etdi.
İradə SARIYEVA
