Məlum olduğu kimi, oktyabrın 9-da Ermənistan mətbuatında guya həmin gün gündüz saatlarında Qarabağda - Tərtər rayonunun Ağdərə şəhəri ərazisində yerli sakinin həlak olması, Arazdəyən istiqamətində isə erməni hərbi qulluqçusunun yaralanması barədə informasiyalar yayılıb.
İlkin olaraq Ermənistan tərəfi onun tarlada işləyən traktorçu olduğunu bildirib. Sonradan bu şəxsin bağda olduğu və snayper tərəfindən öldürüldüyü iddia edilib. Bəzi erməni saytları həmin şəxsin guya Rusiya hərbçilərinin gözü qarşısında vurulduğunu bildirib.
Elə həmin gün, yəni oktyabrın 9-da Azərbaycan Müdafiə Nazirliyi mətbuat xidməti tərəfindən mətbuata verilən məlumatda qeyd olunub ki, Ermənistan mətbuatında Azərbaycan Ordusunun bölmələri tərəfindən Ağdərə istiqamətində guya atəş açılması nəticəsində traktor sürücüsünün ölməsi, Arazdəyən istiqamətində isə erməni hərbi qulluqçusunun yaralanması barədə yayılan məlumatlar yalandır və həqiqəti əks etdirmir.
Görünən odur ki, Ermənistan tərəfi son günlər Azərbaycanla bağlı heç bir əsası olmayan məlumatlar yayır. Maraqlıdır, hazırkı dövrdə bu cür yalan məlumatlar nə məqsədlə uydurulur?
“Əsas məqsəd tərəflər arasında gözlənilən sülh danışıqlarını tormozlamaqdır”
Sözügedən məsələyə aydınlıq gətirən hərbi ekspert İbrahim Rüstəmlinin fikrincə, belə uydurma məlumatların yayılmasında bir neçə məqsəd var: “Bunlardan biri informasiya təxribatıdır. Zaman-zaman Azərbaycana yönəlik informasiya xarakterli təxribatlar aparılır. Ötən illər ərzində o qədər belə hallarla üzləşmişik ki, artıq onların görünməyən tərəfi yoxdur. Bununla belə, saxta rəy yaratmaq istəyirlər ki, Qarabağda və Azərbaycan-Ermənistan sərhədində hərbi gərginlik davam edir. Eyni gündə müxtəlif istiqamətlərlə bağlı belə uydurma məlumatın yayılması sözügedən məqsədə xidmət edir. Azərbaycan tərəfi hazırkı dönəmdə hər hansı bir eskalasiyada qətiyyən maraqlı deyil. Belə olan halda o cür məlumatların yayılması sırf təxribat xarakterlidir. Bununla yanaşı, son günlər bu səpkili məlumatların yayılmasında əsas məqsəd tərəflər arasında gözlənilən sülh danışıqlarını tormozlamaqdır. Bəlli olduğu kimi, düz bir aydan sonra 10 noyabr razılaşmasının 1 ili tamam olur. Azərbaycan və Ermənistan arasında ən yüksək səviyyədə təmasların qurulması ilə bağlı müəyyən proseslər gedir. Yaxın perspektivdə sülh sazişi gözlənilməsə də, sərhədlərin delimitasiyası və digər məsələlərlə bağlı razılaşmaların əldə olunmasına müəyyən ümidlər var. Belə görünür ki, bütün bunları pozmaqdan ötrü süni şəkildə vəziyyəti gərginləşdirmək istəyən qüvvələr var. Çünki məhz son günlər erməni tərəfinin belə dezinformasiyalar yaymağı təsadüfü deyil. Belə görünür ki, yenə nələrisə yubatmaq istəyirlər. Ancaq hesab edirəm ki, bu cür siyasət daha çox Ermənistanın ziyanına işləyəcək. Onlar bundan daha çox itirəcək, nəinki Azərbaycan”.
Hərbi ekspert onu da qeyd etdi ki, bu kimi yalan məlumatların yayılması bir müddət davam edə bilər.
Vidadi ORDAHALLI
