Ermənistan rəhbərliyi, onun keçmiş oğru rəhbərliyi, sadəcə olaraq, dünyanın zəngin ermənilərini aldadaraq, marafonlar düzəldərək o pulları cəlb edib özləri üçün bildikləri kimi xərcləyiblər. Bunu Prezident İlham Əliyev Xocavənd rayon ictimaiyyətinin nümayəndələri ilə görüşündə çıxışı zamanı deyib.
Dövlət başçısının sözlərinə görə, 30 il ərzində Hadrutda demək olar heç nə dəyişilməyib: “Hərbçilər üçün iki bina tikilmişdi, bir məktəb də təmir olunmuşdu. Qalan bütün binalar necə var idi, elə də qalıb. Yəni kütləvi səfalət hökm sürüb, bir daş daş üstünə qoyulmayıb. Görün yollar, binalar nə gündədir. Bəzi binalarda ümumiyyətlə insan necə yaşaya bilər, böyük sualdır. Sual olunur, bəs 30 il ərzində Ermənistan dövləti xarici ermənilərdən milyonlarla pul alıb. Onlar hər il marafon düzəldirdilər, hər il təqribən yüz milyon dollardan çox pul yığılırdı. Onu vurun 30 ilə, görün təxminən nə qədər pul edir. Bəs, yığılan bu milyardlar hara gedib? Deməli, Ermənistan rəhbərliyi, onun keçmiş oğru rəhbərliyi, sadəcə olaraq, dünyanın zəngin ermənilərini aldadaraq, marafonlar düzəldərək o pulları cəlb edib özləri üçün bildikləri kimi xərcləyiblər. Onların böyük bir fondu var, adı Hayastandır. Bu Hayastan fondu, dediyim kimi, bəlkə də bir neçə milyard pul yığmışdır. Həmçinin Amerikada yaşayan zəngin ermənilər öz xüsusi fondlarını yaradıblar, öz ailə üzvlərinə aid fondlar yaradıblar. Otuz il ərzində bəlkə də ən azı bir neçə milyard pul yığılıbdır və o pulun taleyi, necə deyərlər, məlum deyil”.
Həqiqətən də ötən 30 il ərzində ABŞ-da və digər inkişaf etmiş ölkələrdə erməni lobbisinin təşkil etdiyi marafonlar çərçivəsində milyardlarla vəsait toplanıb. Məlum olur ki, yardım məqsədilə yığılan həmin vəsaitlər təyinati üzrə xərclənməyərək mənimsənilib. İstənilən halda, Qarabağ məsələsi artıq həll olunub. Belə olan halda maraqlıdır, bundan sonra da erməni lobbisinin Ermənistana əvvəlki qaydada yardım üçün marafonlar yolu ilə Hayastan Fonduna pul toplamaları davam edəcəkmi? Vəsaitlərin mənimsənildiyini nəzərə alsaq, erməni diasporu bundan sonra həmin marafonların keçirilməsinə necə baxacaq?
“Bundan sonra erməni lobbisi marafonlar keçirsə belə, əvvəlki illərdə olduğu kimi böyük vəsaitlər toplaya bilməyəcəklər”
Məsələyə münasibət bildirən sabiq diplomat, politoloq Fikrət Sadıqovun fikrincə, məlum biabırçılıqlardan sonra erməni lobbisi, əvvəlki illərdə olduğu kimi, təmtəraqlı marafonlar keçirə bilməyəcək: “Heç bununla bağlı ciddi səy göstərəcəkləri də real deyil. Çünki bunun üçün elə bir səbəb yoxdur. Birincisi ona görə ki, Qarabağ məsələsi artıq həll olunub. Orada quruculuq işlərini Azərbaycan aparır. İkincisi, marafonlarda yığılan vəsait Ermənistanda hakimiyyətdə olan qüvvələr tərəfindən mənimsənilib. Yığılan pullar ölkənin inkişafına sərf olunmayıb. Belə olan halda xaricdəki erməni əsilli şəxslər ianələrin toplanılmasına ən azından əvvəlki kimi maraq göstərməyəcək. Bu bir reallıqdır. Digər tərəfdən, marafonlarda yığılan pulların hara xərclənməsi ilə bağlı Ermənistan hakimiyyəti hesabat verməlidir. Nəzərə almaq lazımdır ki, son dövrlər erməni ictimaiyyətində marafonlarda yığılan vəsaitlərin mənimsənilməsi ətrafında ciddi müzakirələr gedir. Deyirlər ki, niyə həmin ianələr təyinati üzrə yox, kimlərinsə ciblərinə getməlidir. Ona görə də Prezident İlham Əliyev düzgün dəyərləndirmə ortaya qoydu. Qarabağ adı altında milyonlarla vəsait toplansa da, ermənilərin yaşadığı kənd və qəsəbələr bərbad vəziyyətdədir. Bundan sonra erməni lobbisi marafonlar keçirsə belə, əvvəlki illərdə olduğu kimi böyük vəsaitlər toplaya bilməyəcəklər. Çünki artıq sözügedən məsələdə erməni əsilli şəxsləri allatmaq o qədər də asan olmayacaq”.
Politoloq hesab edir ki, bu məsələdə erməni lobbisi fiasko ilə üzləşəcək.
Vidadi ORDAHALLI
